बाट २०८० कार्टिक ६ गतेक बाट हो । मै अपन बारिक गैल रहुँ । डसियक रोज हरे पिट्टरिन भाट डेहक लाग पटरी छेडट् डेख्नु बारि हे । एक घचिक टे सुनके कवा गैनु इ पिट्टर कना के हुँइट् ।
मै पिट्टर के बारेम् जन्ना बुझना मनैनसे बुझ्नु कि पिट्टर कलक ओराई अाजा पाजा बुडुन हे कहिजाट् । डसिया खवइना पिट्टर कठै कहिके जन्नु । डसिया मे अंगनक डुह्रिम कबलिक भुरुक लौकक् फुला ढारके पिट्रर खाइ बलैना चलन अभिन फेन थारुनके चनलमे डेखजाइट् ।
पिट्टर डेहकलाग नम्हेरिक कि टो सखुवक पट्टाके पटरि छेडके मच्छि उरडक डाल, पोइक साज भाट टिना आदि डेना चलन बा । इ चलन थारु गोट्यार अनसारके फरक फरक मेरिक रिटिभाँटि डेखजाइट ।
एकठो बाट मोर मनेम लागट् जब मै इ पिट्टर के के बारेम जन्ना चहनु कि आजा पाजा डिसिया खाइ बलाजाइट कलेसे ओइनके नाउँ फोटु पटा हुइलेसे आउर मजा हुइने रहे काहे कि हम्रे अपन पुर्खनके ईतिहास जन्ना जरुरि लागट् । टर आजा पाजा किल सुनजाइट ओइनके नाउँ ओ जिवनि कथा नै पटा हो टे कसिक जानब कि हमार पुर्खानके पालम कसिन रहिन कहिके । अइना समय टे हम्रे डेखिडारप सुनिडारप मने बिटल बाट के बट्वा डि जो कि डेखल सुल मनै जो नै रहजैहि टो ।
मै छिपल पाकल पुर्खनसे ढेर समय बिटैना कोसिस मे रठु ओ ओइनके मनक बाट बुझ्ना चहठु । ढेर जहनके मनक बाट सुने वर जन्नु कि ओइने अपन बाट सुनैना चहठैं टर अबप मनै बुह्राइ मनैन से डुरे रठैं जवान से जुन हिट्के चहठैं । एक ठो कहकुट् बा "आगो टापनु मुढाको कुरा सुन्नु बुढाको" बाट सहि हो पुर्खनसे जिन्गि जिअक सिख्ना हो ओइनके डुख अभाव कत्रा रहिन कसिके लर्कन पर्कन बह्रैलैं ।
पुर्खनके बाट सुनेबर पूरा बटकोहि जस्टे लागट् । असिन लागट अबक् मनै उ बेलाके जसिन डिन फेन आजाइ कलसे ना जाने कत्रा जे आत्मा हत्या कर्ठै कत्राजे बिडेस लग्टै ।
ज्या सजिन हुइल पहिले टब फेन हमार पुर्खा जिके डेखैलै ओ आज हम्रे बटि अगर हमार पुर्खा नै रटै कलेसे हम्रे फेन नै रटि । खुशिक बाट इ हे बा आज हम्रे बटि ओहे मारे बिचार मे हुइट हम्रे पुर्खन आदर करे परट ओइनके ठन रहल चिज बाहर निकारे पल । ओराइल ।
संगम चौधरी...✍️
एक टिप्पणी भेजें
0टिप्पणियाँ