लावा घरक बाट बटवाइ बेर ।
संगम चौधरीसे पहिले २०६२ सालमे शुक्लाफाँटा–३ जोन्हाँपुरके कल्पना चौधरीक् उज्रल घर डुवार कथा संग्रह प्रकाशित हुइल बा । कंचपुरके थारु साहित्यिक इतिहास खिट्कोर्ना हो कलेसे पुनर्वास–२ मोतिबस्तीक् अशोक चौधरीक् मनके आवाज गजल संग्रह–२०७० छपल बिल्गाइठ । ओस्टके कृष्णपुर–६ सिंहपुरके जोगराज चौधरीक् अस्टिम्किक् गीत–२०७३ फेंन छपल बा ।
कंचनपुरसे अभिनसम एक्केठो किल थारु भासक् सुमिरन बार्सिक पत्रिका सागर कुस्मीके प्रकासन ओ सम्पादनमे आइल आइल बा । थारु भासा साहित्य जोर डेटि आइल इ पत्रिका फेन घुस्करिया कर्टि बा । इ खुसिक बात हो कि कंचनपुरसे फेन पत्रिका निकरल बा कना कंचनपुर बासी गर्व करे सेक्ना अवस्था बा ।
गजल, मुक्तक विधामे युवा स्रस्टा फाटफुट रुपमे कलम चलैलेसे फेंन अभिन आख्यान विधा ओर ओट्रा डटल नैबिल्गैठैं । । २०७४ सालमे सिर्जल मुक्तक संग्रह निकारके अपन थारु भाषा साहित्यहे सेवा कर्टि आइल कृष्णपुर–६ सिंहपुरके साफी चौधरी निबन्ध लेखनमे जमके कलम चलैटी आइल बटि । हुँकार निबन्ध पहर्के आस करे सेक्जाइ कि अइना दिनमे कुछ महिला लेखक लोग फेंन जरुर जन्महि ।
संगम चौधरीक् यि लावा घर कथा संग्रह हुँकार डुस्रा कृति हुइन । एक्के सालमे २ ठो कृति निकर्ना बहुट कर्रा काम हो । साहित्य लिख्ना महा साँसट हो । असिन अवस्थामे फेंन संगम अपन कलमहे डौराइठ डेख्के खुशी लागल बा । थारु साहित्यमे एकठो बख्खारी बान्ढ जाइटा ।
यि कथा संग्रहमे १२ ठो कथा गुँठल बा । जहाँ जिन्गिक् हर मेरिक दुःख, पिरा, व्यथाके चित्र खिंचल बा । गाउँ घरक् समस्या, गरिबके कारण पाइल दुःख बेदना समेटल बा । यि कथा संग्रहमे १२ ठो कथा मन्से लावा घर शीर्षक कथा पारिवारीक कथा हो । जिन्गी गुजारक् लाग हरेक मेर्के सपना रठिन परिवारके सदस्यन्के, जिउ ज्यान डेके फेंन बाधा समस्या अइटि रठिन । गीता ओ विपिनके भूमिकाके रोल बा लावा घर कथा भिट्टरके पात्र लोगनके ।
ओस्टके अच्कचरे सपनामे हरेक मनैन्के कुछ करुँ कना चाहना रहठ । कुछ मजा काम कैके डेखाउँ कना चाहना रहठ । कुछ मजा काम कैके डेखाउँ कना सोनियाके इच्छा रठिस लेकिन घरक् मनै साथ नैडेके ओकर सारा सपना चकनाचुर होके माटिमे मिल्जैठिस ।
दिनेश, विजय ओ रबिनाहे पात्र बनाके सिर्जाइल बिडाइ कथामे लवन्डी लवन्डाके प्रेम कहानी हो । अपन ठरुवाहे छोर्के डोसर ठरुवाहे लेके पाछे जाके दुःख भोगल कथा बा । रगतके रंग कथामे मैननके भावना बुझके प्रेम कथा बनल बा । यम्ने काजल ओ अविनाशके रोल बा । धनी गरिब, धर्म, जातपात नैहेर्के मानवीय गुण डर्साइल बा । ओस्टके छाइ कथामे समाजमे नारी फेंन पुरुष सरह होके काम करे सेक्ठैं कना चित्रण कैल बा ।
भोज कथामे लवन्डा लवन्डी प्रेम कर्ठैं मने पाछे जाके लवन्डा लवन्डीके सम्बन्ध टुटल बिल्गाइठ यम्ने रमेश ओ रेश्माके गार्ह प्रेम कहानी बा । ओस्टके पटुहिया कथामे समाजमे रहल रीतिरिवाज अन्सार भोजमे माँगर गाइल बा । जौन यि कथाके मजा पक्ष हो । अस्टके यम्ने ठरुवा बिट्लो पर पटुहिया अपन सास ससुरवाहे छावा होके घर सम्हाँरल कथा बा । यम्ने सन्ध्या पटुहिया बन्के अपन भूमिका निभैले बटि ।
अस्टके ठकौनी कथामे पुरान बात फेंन खिट्कोरल बा । पहिलेक जबानामे लर्का जन्मनासे पहिले ठकौनी खाडारिंट । लवन्डिक इच्छा बिना भोज कैके अपन छाइ गुमैलक घटना बा । ओस्टके डाइ कथामे २ ठो टुवर लर्कनके कहानी बा । डाइ परलोक हुइल ओरसे डाडु ओ बाबुके कथा बा । ओस्टके बिस्राइल डगर कथामे एकठो लवन्डी अपन जिन्गीक् डगर भुलाके दुःख पाइल कथा बा ।
अर्पण कथाके पात्र अपन जन्माइल बच्चाहे रातके लवन्डक घरक् अंगनामे छोर्के गैल कहानी रचल बा । ओस्टके अन्तिम सफरमे डेउखरसे छारा कैके बुह्रान आके भुँखे प्यासे जिन्गी बिटाके फेंन घर परिवार मजासे बैठल बात डर्साइल बा ।
अट्रा मेहनत कैके लिखल यि कथा छाइ डाइ पटुहिया भोज कथा अक्के अक्केहस लागठ । सक्कु कथा जोर्लेसे एकठो उपन्यास बन्ना मेर्के कथा समेट गैल बा यम्ने । अभिन फेंन कुछ स्रस्टा लोगनके अध्ययनके कमिसे खोजलहस कथा आइ नैसेकठो । हमार समाजमे गाउँ घरमे अभिन शिक्षाके चेतनाके कमि बा । बेरोजगार ढेर बा । अइसिन कथाहे सिमोट्ना जिम्मा आइल बा आब । अपन डाइ बाबा कैसिक पह्रैलैं, कैसिक बहै्रलै कथा आइठ कलेसे आकुर डमडार हुइना रहे । भ्रष्टाचार, अन्याय, दमन, शोषण सहके कमैयाँ, कम्लहरीके कथा पेंmन लिख्ना कथाकारके कन्ढम आइल बा । जेडासे प्रेम कथा सिमोटल यि संग्रह पठनीय टे बा बा ओकर संगसंगे अभिन थारु समुदायमे घटल घटनाके कथा कमे आइटा ।
लोक साहित्यमे धनी थारु समुदायके भिट्टर रहल बट्कुही खोज अनुसन्धान कैके लिखित रुपमे ढैना जरुरी बा । समयके बावजुद फेंन यि पंक्तिकारहे भूमिका लिख्ना मौका डेलकमे कथाकार संगम चौधरीहे सैगर सम्झना बा । अझकल लगटार रुपमे थारु लोक संस्कृतिमे कलम चलैटि आइल रविता चौधरीसे फेन अइना दिनमे लावा कृति आइ कना आस करे सेक्जाइ । जैटि जैटि अइना दिनमे यिहिसे चारगुणा मेहनत कैके टिस्रा कृति हलि निकारिंट सैगर शुभकामना ।
सागर कुस्मी ‘संगत’
शुभकामना
संगम चौधरी कुछ डिन पहिले बट्पकुहि संग्रह निकारटुँ कुछ लिखडेबि कह्के कले रहिँट् । सँपार नै हुके हो कि आउर आउर कारन से हो कुछ बिराउँ होगैल् । टब्बोपर टब्बोपर मोर जियाँमे बाट् नुकल नै रहे । पोस्टाके ओरन्टा पुँछिमे आके फेनसे बाट् खिट्कोर्लाँ । मै झस्कलुँ ओ अपन जिम्मेवारी पूरा कैना वचन सहिँट् कुछ बाट लिखटुँ ।
पोस्टा निकर्ना अपनेमे बहुट् साँसट् काम हो । इ साँसट सहके फेन संगम बट्कुहि पोस्टा निकारटाँ । इ खुशिक बाट हो । हमार सह थारु समुडायमे पठनसंस्कृटिके बिकास नै हुइल हो । उहेकारनसे असिन कामेम बहुट कम मनै लगानि लगैठाँ । पोस्टा जसिक टसिक साँसट सहके हुइले से फेन निकरठ मनो बजार नै पाके घरहिं कुर्ह्याइल रहना हुइसेकठ् । असिन डुरडसामे फेन इ अटगर संगमके मनहे सलाम करे परि ।
संगमके पोस्टामे संगारल बट्कोहिके अन्हार हेर्ना मौका नै जुर हो । गैल बरस फेन हुँकार पोस्टा निकरल रहिन उ फेन हेर्ना मौका मिलल् नैहो । इ कौनो डिन जरुर मौका मिलि । महिहे यम्मे कौनौ गुनासो नै हो । महिँहे लावा सिर्जना कर्ना मनै मन परठ् । ओइके मनके चौकस सौंक मन परठ् , ओइके सिर्जनसिल्टा मे लागल जोस ओ जाँगर मन परठ् । सिर्जना करक लग जँग्रार मनै चाहठ् । जंग्रार मनैनके सिर्ना फेन सुन्डर रहठ् । मुले हरेक सिर्जना सक्हुनहे नै लागे फेन सेकठ् । इ मनैनके रुचि निर्ढारन करठ् । ओट्ररे किल नै सक्कु सिर्जना फेन सुन्डर नै हुइसेकठ् । उहेसे पाठकके रुचिके बिसय एकठो सिर्जना सुन्डरटा हुइसेकठ् । मुले कैयौं गोम्हनियाँ सिर्जना हौसला मागठ् , उर्जा मागठ् ओ उट्साह मागठ् । उहेसे संगके बट्कुहिमे सिड्ढान्ट ओ सिमा साँढ लगैना पच्छे मै नै हुँ । संगम एक उर्जासिल लेखक हुँइट । उहाँक सिर्जनामे कमिकमजोरि कठेक हुइ कठेक । हरेक ग्यान अभ्यास कैटि , बुझटि ओ सिख्टि जैना ओ लेना हो । उहेसे संगमके इ लिख्नैटि संयम हुइन । सिख्नौटिमे कुछ कमि कमजोरि स्वभाविक रहठ् । संगमके हकमे बहट बाट् छयम्मे हुइसेकठ् । अर्ठाट कहि उहाँक सिर्नामे किल्कोर किल्कोर कमजोरि खोज्ना समय नै हो । इ समयमे उहाँकमे उर्जा भर्ना समय हो ।
ओरन्टामे संगमके बट्कुहि पोस्टा पाठकके मन खिँचे , सक्हुनमे रुचि बर्हे ओ अइना डिनमे संगम ढेर पोस्टा निकरटि रहे शुभ कामना बा ।
छबिलाल कोपिला
प्रढान सम्पाडक
लावा डग्गर त्रैमासिक, दाङ-डेउखर
लावा घर
सावनके महिना बर्खा खोप मचल रहट । बड्री ठरकटटे गीटा झसक्के जागजिठिन । ओ चिमचाम पला रठिन । घरीमे समय हेर्ठी ठिक्के राटिक बाह्र बजल रठिन । राट सुनसान रहट पानी झरझर झरझर बर्षटि रहठ । घरक छंपरा चुनाहा हुइलक ओरसे जहोर टहोर पानी ट्यापटुप ट्यापटुप चुहट सुनमिलट, गीटा ढिरेसे उठ्ठी ओ लोट्या खोरिया भाँरा बर्टन पानी चुनाहा ठाउँ डोगडेठी ओ सुट जैठिन । पानी अपन मनका खोप टाल मिलाके अपन अपन आवाज निकारके चुहे ट्यापटुप ट्यापटुप खुभलुङ्ग छुझलुङ्ग कर्टी ।
गीटा आँख टुम्के निडैना चहठिन टर निन नै पर्ठिन कान जागल रठिन । छोटमोट कोनम लर्काहे डुढ चुसैटी घरक छपरा हेरठी । भलीमुन्डा खरले छाईल उहे फेन टीन चार बरस होगिल रठिन छैंलक । खह्रक छपरा खह्रक भित्ता हालसाल के लाग बनाईल घर कसिन रही । मजा घर बनैही फेंन कसिके भर्खर घर फुटके अइलानी जग्गामे घर बनाके बैठल रठै ।
गीटा करोट लेलेके एहोंर ओहोर करटहिन । ओहोर गीटाके जीवन साठी विपिनके बरेमजा निन परल रहिन । निनफे काकरे नै परिहिन विचारा डिनभर घामपानी सहके ईटा ढुङ्गा बोक्के ठकल जीउ । बरे ढेङ्ग ढेङ्ग घरक उप्पर क्याट कुट कर्के चौह्रे पर्ना । गीटा विपिनके कहल बाट सम्झठिन । हालसाल भलीमुडा घर बनाली घामपानी आँढी बटाससे बचप टे होजाई । पाछे ढिरढिरे रुपिया जोर्के मजा घर बनाप । गीटा यह बाट सम्झठी ओ मन बुझैठिन । कब जुटाई सेकही बिचारा विपिन अत्रा ढयार रुपिया ओ मजा घर बनैही । बनैना फेंन कसिक अइलानि जमिन बा काल कहाँ जैना हो पटा नै हो कैक अनेक बाट सोच्टी सोच्टी भिन्सार होजैठिन । गीटा हे उठे पर्ना जुन होजिठिन । विपिन हे अन्गुट्टी कामेम जैना रठिन । खैना बनैना रठिन ।विपिनके लाग खैना पिना सब टयार कर्के ठिकठाक कैके भैटोर बहान डेठी ।
विपिनके रोज डिनके यह डिउटी रठिन । बिहान भिन्सरही जैना ओ साँझ अन्ढार घरे घुम्ना । कबु नै गीटा से मजासेसँगे रहे पैना । गीटा विपिन घरे अइना जुन संपरके रना करिन । संझाके सँगे बेरी खैना अस्रामे बैठ्ना करी गीटा । डिन भर डुनुजे अलग-अलग कामेम रलेसे फेन साँझके मिलन हुईना करिट ओ डुन प्राणी अपन अपन सुख डुःखके बाट साटासाट कर्ना करिट ।
गीटा ओ विपिन खाके नै खाके डुनु प्राणी रुपया जोर्ना ओर लागल रठैं । ओहर्ना बिछौना पुराने रलेसे फेन ओ खटिया टुुटल टुटल रलेसे फेन डुनुजे मिठ निन सुट्ना करिट । गीटा विपिनहे जीवन भर अपन सारा डिलसे हरचिजमे साठ डेम कैक अप्ने आपसे बाचा कर्ले रठिन । गीटा रोज डिन बिहानी उठ्ठी ओ घरक काममे लाग जैठिन । ढेकी कुट्ना चक्या पिस्नासे लेके घरक सारा काम उसर्ना करठिन । बोली चाली मिठास, ठारु पहिरन लेहङ्गा चोलियामे बरे सुहावन डेखैठिन गीटा । सावरमे सुहावन सवारल मन लोभाउन रुपरंग रठिन गीटाके । हजारौंमेसे छाँटलहस रहिन गीटा । ज्ञानगुनके बाट ज्याडा कर्ना । समाजके हिटके लाग ज्याडा चिटैना बानी गीटाके रहिन । अपनसँग कुछ रलेसे नै रहल ओइनहे डेना बानी रहिन । कौनो फेन काम ओ बाट कर्नामे पाछे नै हट्ना । ओहोर विपिन मनैनके घर बनैनामे फुर्सड नै रठिन । आज ओकर उहाँ टे काल ओकर घर बनाई । विपिन के सपना रहिन कि एक रोज अपन सुन्डर घर बनैना । अड्रिक अड्रिक महल घर बनाके अप्ने उहे झोपरीमे सुख शान्टि मिठ निनके सँग राट बिटैना करिट डुनु प्रानि ।
विपिन हे लाखौं रुपया जुटैना रहिन “एकठो सुन्डर लौव घर सजैना । विपिन केवल रुपया कमैना ओ ढ्यार कराके घर बनैना लक्ष्य रठिन । विपिन ठोर बहुट रुपम कमाके विडेश जैना योजना बनालेठैं । श्रीमटी छोरके विपिन विडेश ओर लग्ठैं । बिचारी गीटा आप विपिनके मैया नै पाके जिन्डगी अकेली लागे लग्ठिन । घरे रहलमे राट भर भेंट हुुइना करिन विपिनसे आपटे डिन ना राटके भेंट हुइना । विपिन घरे रहल बेला झोपरीमे सुटके सु:ख डु:खके बाट साटासाट कर्टी मिठ निन परिन । भिन्सरही उठके विपिनके लाग खैना टयार कर्के कामेम पठैना करिन । टर आप उ कर्ना जुन विपिन हे सम्झना करिट गीटा । याड अइना करिन विपिन हे माया करके कामेम पठैलक । साँझके विपिनके अइना जुन संपरके बैठना करिन गीटा टर आप केकर लाग सपर्ना । सँगे बैठके खैना करी हाँस-हाँसके बाट करी सुनैना करी । आप किहिसे बाट कर्ना । गीटा अकेली बैठ्के विपिनके याडमे हेराजाइन ।
गीटा अपन जवानीके डिनमे बिटाइल डिनके समय झलझली सम्झे पुग्ठिन । ठारु परिवारमे जल्मलक् कारण गीटा छोटिसे ठारु संस्कृटि रहसहनमे हुर्कल रठिन । ठारु गीट गैनामे कम नै रहिन । विपिन फेन मन्ड्रा बजैनामे कम नै । सायड यह कारण डुनु जहनके जोरिया परमेश्वर जुराडेठिन । गीटा उहे डिन सम्झठिन । माघी मिलन कार्यक्रम रहट । ठाउँ–ठाउँसे नाचके बगाल अइना रहट । यह नाचके लाग गीटा नचुनियाके लाग छनौट हुइठि ओ विपिन मडरियाके लाग ।
कार्यक्रम शुरु हुइट । कार्यक्रममे ठारु पहिरनमे बगालेक बगाल लवन्डिन घुमल रठैं । अड्रिक अड्रिक गहना घल्ले सुटिया, कारा, बाला, झिलमिल्या, माला, नठिया, लेहङ्गा, चोलिया, झोबन्नासे संपरल । ठारु पहिचानहे झलकैना हर प्रकारके पहिरनमे संपरके ठारु महिला हुँक्र सारा मन्च छोपल रठैं । यह हजारौंके बीचमे गीटा फेंन कम सुग्घुर नै रठिन । हजारौंमे एक रठिन, सुग्घुरमे सुग्घुर साँवरमे सवारल । फुन्ना लागल लेहङ्गा छमछम हुँकार नेगाइ नेगाइके सँग सुवास उरिन । हजारौंमे ढुम मचाडेठि गीटा । हुँकार नाचसे सारा डर्शक होहल्ला परठैं । जस्टै नचुन्या ओस्टे मडरिया । गीटा हजारौंके मन जिटे पुग्ठिन । अत्रै किल नाइ विपिनके मन फेंन चोरा सेकल रहि गीटा । विपिनफें का कम उ फें गीटा के सब कुछ चोरा सकेल रहिट । ऊ डिन गीटा ओ विपिन पहिला नम्बरमे लेह पुग्ठैं । ओ हजारौंके माझ सम्मान हुइठिन । उहे डिन गीटा ओ विपिनके नजर एक डोसर बरे गहिंरसे जुझे पुग्ठिन ।
कारण डुनुजे एक डोसरके साठ पाके हजारौंके बीचमे सम्मान पैठा । डुनुजे एक डोसरहे डिलसे ढन्यवाड ओ जिन्डगीभर साठ डेना बाचा करलेठैं ।
जिन्डगिक् सफलटामे एक डोसरके साठ चाहट, उटसाह चाहट, माया चाहट । जिन्डगीमे सफलटा पैना बा कलसे औरे जहनके हिट खोजे पर्ना रहठ । अप्ने गिरके फेंन औरे जहन उठाई परठ ।
गीटा ओ विपिन बिचमे यह मन रठिन । कारण गीटा सारा जिन्डगी विपिनके साठ सेवाके लाग अप्ने आपहे सौंप डेले रठिन । राट डिन गीटा विपिनके अस्रामे रठिन । छोटिमोटि झोपरि रलेसे फेंन गीटा विपिनके मैयामै खुशी रठिन । विपिन गीटासे करल बाचा जसिक फेंन पुरा कर्ना मे लागल रठैं । सोच्ठै एक सुन्डर घर मै अपन डिलके रानी गीटाके लाग बनैम । लिपपोट करे नै पर्ना सिसा जसिन चम्कना ढर्टी मे नेगैम गीटाहे । गीटक आँखिम आँश नै आइडेम हमेसा खुशि करैले रहम कैक विपिन सोंच्टि रठैं ।
ढिरेढिरे विपिनके सोचल काम पूरा हुइटि जैठिन । अपन कमाहिके पैसा पठैंठा ओ अपन जीवन संघरिया गीटाके जिम्मा लगाडेठैं । गीटा एहोंर गाउँम एक ठाउँ जमिन किन्ठिन ओ घर बनैना शुरु कर्ठि । गीटा बहुट मेहनट कर्के घर बनैना ओर लग्ठि । डुपहरके जरेहस लग्ना घामेम ऊ टाटुल टाटुल इँटा ढुंगा बोक्के हाँठेम फोक्टा परजाइन । एक-एक इँटा ढुंगा जोरजोरके भुख्ले प्यासे काम कर्के एकठो सुग्घुर घर बनैठि । गीटा घर टे बनैठि टर अभिन जिन्डगिमे बहुट कुछके जरुरट परल महशुस हुइठिन ।
गीटा अपन बिटल डिनके जिन्डगी घुमके हेर्ठि, कहाँसे कहाँ पुुगाइल सम्झठिन । एक डिनमे यि संसारमे नै रहुँ । कसिके मै डाइक कोखमे सिर्जे पुग्नु महि पटा नै हो । डिन-डिने मै मैननके नजरसे अडृश्यमे सिर्जटि गैनु । मोर शरीर कसिके सिर्जल किहुइहे पटा नै रहिन । मै जल्मनु ओ संसार महि डेखल । डाइ बाबा महि स्याहार सुसार कर्लै । एक डिन मै डाइ बाबन घर हुर्कनु । आज मोर घर विपिनके घर हुइपुगल बा कटि
अपन डाइ बाबाके कहल उ बाट सम्झनम अइलिन । जौन डिन गिटा बिपिनसे हुइल बाट बटैलिन ते डाइ बाबा कलेरहिन । छाइ आप टै जवान हुगैले, आप टोर हम्रहिन छोर्के जैना उमेर होगैल । कसिके रोके सेकब छाइ तुहिन । भगुवा अस्टे नेम बनाडेले बा । चाहके फेन छाइ लर्कन डाइ बाबक घर ढारे नै सेकजाइट । जवान छाइ लर्कन घरेम डेख्के समसज फेन नै मजा सोचेलागट । रो ढो के छाइ जातिन आनक घर पथाइ परत । छाइ जाटके टिनथो घर रथिन । जलम घर, करम घर ओ स्वर्ग घर ।
छाइ हम्रे टुहिन जलम टे डेलि मने जिन्गि भर संगे रहे नै मिलट । नौ महिना डाइक पेटेम बहर्ले अठा बरस हमार संग । टै जलमल नै रहिस टे टुहिन हेर्नास लागे । जब जलम लेले टव टोर सुन्डर्टा डेख्के बरे खुशी हुइलि हम्रे । टोर डाइ से कहि आझ छाइ हमार संग बा । बिचारी छाइ आख डडुर कोनम खेल्टा हाँस्टा जवान हुइटे चलजाइ छोरके । हमार मन रोए टुहिन समझके ।
डाइ बाबा कलेरहिन ठरुवा कलक घरक खुँटा हुइटै । खुँट बलगर टे घर बलगर कठैं । खुटा मजा टे घर मजा कठैं । टै बिपिन हे मन परैले मजा बाट हो । जिन्गि कटैना टोर हो । बिपिन टोर जिन्गिक साहारा हुइट । छाइ टुहि जलम टे डेलि करम डेहुइया टोर ठरुवा हुइट छाइ कहिके सम्झाइन डाइबाबा ।
भोजकरोज पठाइ बेला डाइ बाबक आँस गिरट डेख्लक समझके आँखि रसाइ पुगिन । सम्झठिन अत्रा ढेर मैयाँ डाइ बाबा के । उक्वार भेंट मे घण्टौ सम डाइक उक्वारमे रोइलक । जौ रोज गिटक उ घरेमसे बिडाइ हुइटहिन उ जलम घरसे आप करम घर जाइ टहिन । गिटाहे सयौं मनै आशिर्वाद डेलिन । खुशि ओ सन्टि परिवार के लाग । डुनु जहनके जोरि अमर रहोस कहिके । तर जिन्गिक खेल कना हो कि भगवानके खेल बिपन गिटाहे जुनिभर साठ डेहे नै सेक्लै । भरखर टे बिपिन पिहिला सपना पुरा हुइल रहिन । उहे बेला बिपिनके जिन्गिक कहानी अन्त होगैलिन । जिन्गिक भावनाके गहिराइमे डुबल रहिन उ । जिन्डगि कहाँसे कहाँ पुगाडेरहिन ।
गीटा अपन लाखौंके खर्चमे बनल घर हेर्ठि ओ सोंच्ठि । एक डिन मै यि डुनियाँमे नै रहुँ । मै अडृश्य रुपमे टर परमेश्वरके नजरमे रहुँ । नौ महिना मोर घर डाइक कोख रहे । टब जाके डाइ बाबनके बनाइल घरेम हुुर्कनु । कुछ वर्ष पाछे महि डाइ बाबाके घरसे फेंन बिडाइ लेके विपिनके घर आइ परल । अाब मोर के बा इ डुनियामे इ घर फेंन मोर नै हो आखिर कबसम रहे मिलि इ घरेम । गीटा बहुट गहिरसे भावुक होजैठी । आखिर इ संसारमे सडा-सडा रना घर कौनो नै हो । शरीर अपन नै हो कलेसे आउर के कना हो ।
गीटा अकेली घरम ओत्रा भारी घरम अकेलि रठि ओ लौव घर सम्झठि संसार के नाहि स्वर्गके जहाँ हमा लाग टयार बा कना अस्राम । जट्टिसे एक डिन सब जहन यि डुनियाँ छोर्के सबजहन लौव घर स्वर्ग जाइ पर्ना बा । ओराइल ।
रगतके रंग
बिस्रल डग्गर
भोज
अन्तिम सफर
कोठा रगटके बुँडै बुँडा रहट । भित्ताफे रगट रगटै एक ओर बेहोशमे काजल ढर्टी म ढलल रठिन बेहोशमे रठि । हाँ काजल बेहोश अवस्ठामे लठरक्क ढर्टीम गिरल रठिन । हाठके नाडी ढरियार चक्कुले सटसट काट्के पूरा रगट बहल रठिन । आँखिर काहे काटल हुइहिन हाठ काजल ? काजल यि कर्ना के कारण एकठो चिठी लिख्ले रठि । चिठ्ठी रक्टे रकटमे लटपट रहठ ।
काजल चिठी असिक शुरु कर्ले रठिन ।
... निष्ठुरी अविनाश आझ मै इ पत्रमे मै रकटके एक एक बुँडा गिरैटि हेरटु । मोर रगटमे का फरक बा कहिके मै डोसर जाटके कहिके महि इन्कार कर्लो । ओहे मारे हेर्टु काहाँ लिखल बा जाटके नाउँ कसिक जन्ना हो । कौन भगवान कलेबा जाट हेर्के भोज कर्हो कहिके । आखिर महि ओ टुहिन बनैना वाला फेन उहे हो ना । टे कहाँ लिख्ले बा कि हमार भोज नै हुइना । टब फेन टु महि काहे इन्कार कर्लो । आज सम मै टुहार ओ मोर मे कुछ फरक नै भेटैनु टर टुँ मोर मे का फरक डेख्लो । डिल उहे बा कोइ कुछ कहट टे बरेजोर बठाइट आँखिम से आँस गिरट । हार मास उहे बा कट्से रकट फेन लाल निकरट । टु फेन उहे चिज खैठो मै फेन उहे । आखिर का फारक डेख्लो मोर मे ।
जल ओ अविनास एक डोसर हे हेर्तिक हेर्तिक रहगैलै । डुनु जाने एक डोसरसे मोहिट होजैठै ना चिन्हल ना जानल मैया बैठगैल रठिन । ना नाम पटा ना जाट पटा रठिन ।
अविनास ओ कायाड बा टुहिन उ डिन जब मै ओ टु बाइक यात्राके क्रम मे दुर्घट्ना हुइलक् ? उ बेला बरे गम्भीर घाइटे रहो । मै कत्रा रोइनु चिल्लैनु डाक्टरके सामु मोर अबिनास हे कुछ नैहुइ परल । बरू रकत जत्रा चाहि मोर शरिर म से निकारलेउ कटि बिन्टिकर्नु । भगवान संग प्रार्थाना कर्नु । मोर शरिर से टहिन चाहिना जटिके रकट डेनु । जब टुँ होसमे अइलो मोर मन बरे खुशी हुइल रहे । मोर लाग आकाश झिलिमिली हुइल रहे । उहर बेला काहे नै कलो कि महि रगट ओ जाटके बाट । अब्बा टुहार ओ मोर शरिरमे एक्के रकत चल्टा । टब फेन काहे रकट ओ जाट-भाटके बात कर्लो ? कुरा ओ महि पाँजर लगाके काहे अउरे जहन
हअंगल्लो । ? आज इ मोर अन्टिम शब्द हो । जब सम्म मोर इ हाँथक ओ शरिरके शक्ति चलि टब सम्म इ कलम से आपन मनके बात सक्कु लिख्ना प्रयास करम ।
रकतके एक एक बुडा गिरैति हटु्तु इटरगतके मूल्य ओ फरक । काटजात अन्सारके रकत फेन फरक रहथ ! सुन्लटुबतु फलाने मानैयक फलानेकटरकत हो ।शालटरकतके का डोस, असल ओ खराब कर्टे ते मानैनके हृदय सेटआइत । अबिनासशाल मै तुहार खराबी करल टे्टे ते नै टागत । टे ते केटु तुहिन मैयाँ कर्नु ओ मेरोटरकत टुँ तु नयाँ जीवन पैबतो । अउरु मै का करलटुबतुडियदि यहे मेरो गल्ती हो कलेसे मै इ सजाइ भोग्टा तयाटुबतु ।
रगटके लाग गल्लिक भिखारी हुकानकके फेंन जरुरट पर्ना ट भोजके लाग जाट छुटैना काजे ? याड करो बनैनावाला एकठो बा जे टुहिन बनाइल उहे महि ओ सारा डुनियक मनैन बनाइल । सारा डुनियामे रगटमे जीवन बा ओ एक डोसरके रगटसे बाचल बटैं । रगट हेर्के जाट भात धनि गरिब करिया गोरहर छुट्याई नै सेक जाइठ । ना टे ढर्म कौन मुसलमानके, कौन हिन्डु, ख्रिष्टियन, कौन बौद्धके ।
अविनास टुँ डोसरटजातके ओ मै डोसर टर टुहाँर ओ मोर शरिरमे रटे ते एक टा तब फेन काहे नाता तुर्लो । मोर हाँठमेसे रगट बहटा टर कौन टुहार ओ कोन मोर के छुट्याई सेकी । पत्र अढुरै कलम अत्रैमे रुकल रठिन । काजल ओ अविनास के भेट
एकठो डुर्घटनामे हुई पुग्ठिन । अविनासके मोटर साइकल काजलके साइकल मे लर्के अबिनास घाइते गुइल रहित । बहुट रगट बहे पुग्ठिन ओ अविनास ओ काजलहे अस्पतालमे पुगैठै । काजलहे कुछ असर नै पुगल रहिन मने अविनास हे रगटके जरुरत परल रहिन । काजल अबिनास हे अपन रगत डेके बचैना चहलिन । काजल भर्खर जवान रही ओ अविनास फे । काजल बहुट ख्याल कर्ठिन अबिनासके । सारा खर्च के ब्यवस्था काजल कर्थिन । जब होस अइठिन अपन संगे उहे लाैवन्डि हे डेख्थै जेजकर साइकल मे गारि लरल रहिन । काजल हे बचैना चक्करमे अविनासहे असिन हुइलिन । काजल डेख्नामे सुग्घुर रहिन ।
काजल अपन ओरसे बहुट सुन्डरी रहिट । भर्खरिक फुलल फूला जस्टे । काजल उह बेला से ढिरेढिरे एक डोसरके मैयामे रमाइ लग्ठां । डिन बिट्टि जैठिन काजल ओ अविनास एक डोसरसे बहुट लग्गे होजिठैं । एक डोसरके जीवनमे साठ डेना बाचाफे करलेठैं । ढिरेढिरे डुनुजहनके प्यारके चर्चा हुइ लग्ठिन । काजल अविनासहे सच्चा मैया कर्ले रठिन । अपन डिलसे सारा मनसे अपन सारा जिन्डगी सौपल रठिन काजल । टर डुनियक मनैके सामु नाहि कना करिन । कोइ संघरिया पुछ्लेसे नाइ मै अविनासहे केवल मजा संघरिया मन्ठु कना करिन । टर काजल मनक भित्तरसे रोइना करिट काजेकी काजल अविनास हे पुरा डिलसे मैया करिन ओ डुनुजे बाचा करसकेल रहिट ।
अविनास जब काजल जीवन साठीके लाग नाई मजा संघरियाके रुपम केल हेरठिन कना बाट सुनिट टे मन टुट जाइन, रोइना करिट अकेलि मे । ढिरेढिरे अविनासके जीवनमे औरेजे ठाउँ लेहे लग्लिन । अविनासहे कोइ औरे जे अपन बनाइ लागल रहिन । ओ बना सेकल रहिन टर यि बाट काजलहे पटा नै रहिन । काजलहे अविनासके उप्पर कौनो सक नैरहिन कि अविनास मही छोर्के कोइ औरे जहन अपनेही कना ।
कुछ डिनके पाछे काजल अविनाससे फोनमे बाट कर्ना चहलिन । फोन अविनास नै उठाके औरे जे उठैलिन फोनमे लौवन्डिक आवाज अइलिन् । काजल अविनासहे पुछ्लिन ओ बाट कर्ना चहलि टर लौवन्डि बाट कर्ना मनाही करडेलिन ओ फोन काट डेलिन । जोन लौवन्डिसे काजलके बाट हुइलिन । उ लवन्डि काजलके अपने बहुट मिल्ना संघरिया रठिन । काजल अपन संघरियाके आवाज जान जैग्ठिन । काजलके मुटुके ढक्ढिउरी जोर जोरसे चले लग्ठिन । काजल बेचैन होजिठिन आज काजे सेलिना अविनासके घर कारण का हो कैके जन्ना चहठिन टर फोन नै उठ्ठिन । काजलके बहुट प्रयासके पाछे फोन उठ्ठिन ओ अविनासके आवाज अइठिन । काजल सिढा सेलिनाके बारेम जन्ना चहठिन काजे सेलिना उहाँ कैक ।
अविनास कठै का टुहन पटा निहो सेलिना मोर जीवन साठी हुइटिन कैक । काजलहे यि बाट सुन्के सारा जिन्डगी उजरल जसिन हुईठिन । सारा सपना सारा योजना टुट्के बिगर जैठिन । काजल कठि टर मै ? टर मै के हुँ ? मै केकर जीवनसाठी हुँ हा ? का उ मन्डिरमे करल बाचा झूठा रहे, आज सम्म महिसे करल सब काम, मोर शरीरसे खेलल सब झूठ हो । टुहाँर स्वार्ठ हो कैके काजल रो रो के चिल्लाके कठिन । टर अविनास कठोर मन करके जवाफ घुमैठाँ । टुँ टे मही केवल संघरिया मन्ठु कैके अपन संघरियन कना करो आज कहाँसे जीवन साठी हुइना बाट कर्ठो । मै टुहिन मै अपन डिलसे चाहुँ टर जब टुहार बाट संघरियन सुनैना करिट टुँहार हाँस हाँसके करल बाट टु मही केवल संघरिया मन्ठो जीवन साठीके लाग नाई कना बाट सुन्नु टब मोर मन बडलगिल । कि टुँ महिसे मायाके नाटक कर्ठो, टुहार सब बाचा बनौटि हो झुठ हो कैक । मै बहुट फरक डेखे लग्नु टुहार बारेम फरक सोंचे लग्नु । मै टुहार नै हुँ टर टुहार और बा कना सोंचे लग्नु । टुहार पर्टी नकाराटमक सोंच आइ लागल टर इ सब बाट मै कह नै सेक्नु टर टुहार सँग मै फे रमाइलो केल कर्ना सोंच बना लेनु । ढिरेढिरे टुहार संघरिया सेलिना मोर जिन्डगीम अइना शुर करे लग्लिन । सेलिना जब टुहार बाट सुन्लिन कि टु मही केवल संघरियाके नाटासे हेर्ठो । टब सेलिना महीसे जीवन साठीके प्रस्टाव ढर्लिन । मे स्विकार कर्नु ओ हमार डुनु जहनके सम्बन्ढ नजिक हुइटी गैल ।
छुट्यइलो । सडाके लाग महिसे नाट टुर्लो ।
आखिर टुँ जाट डेखाके छोर्लो ना । टुहाँर रगट ओ मोर रगट मे फरक बा । आखिर मोर शरीर मे टुहाँर रगट ओ तुहाँर मे मोर । आज अत्रा भारी ढोखा काहे । अविनास कैक अपन मनक पिडा बटैटि रहिन । काजल अविनासके ढोखासे पागल हस होजैठी । अविनासके कहल एकएक शब्ड काजलके मुटुमे गस्कटि रठिन । काजल उ डिन हे समझठी । जोन डिन अविनासके मोटरसाइकलमे लरे पुग्ठिन ओ घैहल अबिनासहे अस्पटालमे लैगिलक । अपन शरीरसे रगट डेके बचैलक आज उहे मनैया से अत्रा भारि ढिखा । हस्पिटलमे अविनास हर काजल लावा जीवन डेले रहिन सोचले रहिन हमार नाता जुनि भर समके लाग हो । तर उहे अविनास के हो टर अविनास जाट छुटैल । आज मोर नाउके पाछे एकथो जातके नाउ लागल बा टबे फरक होगैनु ना मै । अगर मोर नामके पाछे चौढरी जोर जाइ कलसे का चौढरी नै बनम । जात से का मन हृदय फरक होजाई । केवल जाटके नाउँसे मनै भारी जाट ओ छोटि जाट छुट्यइना कर्ठै । जाटके नाउँसे मनैनके हेर्ना नजर फरक होजिठिन । छुवाछूट माने लग्ठै, कना अनेक बाट कजलके मनेम खेल्ठिन ।
काजल रगट बहाके अपन ज्यान डेके मैयक प्रमाण डेकैना चहथिन । आपन हाँट काट्के कोठा भर चुहाडेठिन ओ कौन अविनास के हो कोन काजल के हो ? काहे कि कागल फेन अबिनासके रगत से बाचल रहिन ।
काजल के चिठ्ठिसे पटा चल्ठिन हुकार डाइ बाबा हे काजल के मैयाँ । चिठ्ठि पहर्के सबकुछ पटा पाजैठिन काजल के डाइ । काजल उ घट्ना से एकठो सत्य बाट खुल्लिन काजल के असलि जिन्गिक कहानि । काजल जब होस मे अइलिन टे काजल के पागल पनसे डाइ रोइटि काजल हे हुँकार सत्य जिन्गिक कहानि बटा डेलिन । काजल के हुइ ओ केकर लर्का हुइ । जोन डाइ रहिन उ पलुइया डाइ रहन । डाइ काजलके कहानि सुरु कर्ठिन । काजल से माफि मङ्गटि कठिन काजल महि माफ कर आज सम मै टोर सामु टोर जिन्गिक सत्य बाट छुपैले रहु । हम्रे इ बाट आज सम सब जहनसे छुपैले रहि । जेकर कारन आज टोर असिन हाल डेखे परटा । टोर चिठ्ठि पहरके सब पटा होगैल बा । टोर जिन्गि हमार करन बिग्रल बा । अबिनास टुहिन घिन करलै जाट नै मिलल् कलै । जेकर करन टुहि इन्कार करलै । छाइ काजल अबिनस टुहिन चिन्हे नै सेक्लै इ सब हमार कमजोरि हो ।
हम्रहिन पटा नै हो टै केकर लर्का हुइस । हाँ छाइ टै मोर कोखके लर्का नै हुइस । जब मोर लर्का नै हुइ लग्लै उहे बेला एक रोज बनुवा गैल मे भरखर रोइटि रहल अवस्ठामे तुहिन छोरल भेटैनु । महि टोर रुवाइ से सोग लागल ओ कौन कठोरजन्नि हो असिके छोर्ले बा कैके टुहि उहाँ से उठाके लैअन्नु । अपने कोखके लर्का हस टुहि सहेरे लग्नु । कोइ पटा नै पाइल टोर बारेम सब छुपैटि गैनु ।
काजलके आँखिमसे आँस छहल बहल आजैठिन । काजल रोइटि कठिन नाइ डाइ टोर कौनो डोस नै हो । टैं टे महि लावा जिम्गि डेले, टैं रटे कलेसे आज मै इ डुनियम नै रटु । डोसि टे उ हो जे अपन कोज मस्टि कर्के ओ महि जल्माके बनुवा मे फेकाइल उ हो डोसि । जिहि अपन कोखके एकठो फेन मैयाँ नै लग्लिस उ हो डोसि । महि गिडारिनके अहराकेलाग जिट्टि बनुवामे फेंका डेहल उहो पापि ओ डोसि । मोर रुवाइके चित्कारसे ठोरचे फेन मन नै पिघल्लिस एक बुडा आँस नैर्लिस उ हो डोसि । हाँ डाइ हाँ । काजल डाइ छाटिम चपटके रो रोके कठिन । अबिनास हे कसिक सम्झाउँ मै केकर लर्का हुँ जब कि मोर जलम डेहुइया डाइ बाबा टक पटा नै हो । कसिक सुइकार करहि मोर मैयाँ ओ महि हे । का माया मे फन जाट रहट ? कैके खोब रोइठिन । काजल हे डाइ सम्झैति कठिन चिन्टा ना कर छाइ अभिन समय बा । जीवन बाकि बा मै सम्झैम अबिनासहे ।
काजल ओ अविनासके रगटके ग्रुप मिलल रठिन । ओहे मारे डुनुजे एक डोसरके रगतसे बाँचल रहित तर रगतके सम्बन्ढ जसिन मायाके सम्बन्ढ नै हुइलक कारन काजल अकेलि हुइ पुग्लिन ।
सब जहन बनैनावाला एक्कठो बा । बनैना वाला हमन नर ओ नारि किल बनाइल जात भात नाही । हमार यहाँ खान पिन जात अनसार चलत । हर मनै यहाँ मनक इत्रा ओ कर बाध्य से जिअल बतै । टर हम्रे मनै काहे जाटभाट छुटैना । काहे छुवाछूट मन्ना ? रगटके रंग सबके लाल बा । हाड मास एक्क बा । डुनियाँमे मनै जोन भाषा, पहिरन, संस्कृटि बा सब अपन थाउ मे सहि बा । संसार सबके साझा घर हो । सबजे एक परिवार हुइ । डुइ डिनिक जिन्गिहो मिलके रना बा ।
ओराइल ।
अचकच्रे सपना
ठारु बस्टी पघरी लागल घर रहट । उह फेन हर घरक अंगना जोरल । सोनिया ओ सुरज के जोरी झनै सुहावन । बचपनसे सँगे स्कूल जैना । एक जे नैगिले से औरे फेंन नैजिना । अचम्म मानिन सबजे सुरज ओ सोनियाके सम्बन्ढ डेख्के । सँगे स्कूल जैना सँगे खेल्ना, सँगे छेग्री चह्राई जैना करिट सोनिया ओ सुरज । जहाँ फेंन एक डोसर बिना नैजिना, गैलेसे सँगे जैना करिट । एक डोसरके साठ चाहिन ओइनहे ।
सोनिया ओ सुरज भारी हुइटी गैल ओस्टक ओइनके जिन्डगीक् योजना फेन फरक हुइटी गैलिन । ओइनके हस्ना बोल्ना, खेल्ना, नेङ्गना सब फरक हुइटिगैलिन । सोनिया ओ सुरज के जिन्डगी फेन एक प्रेमजोडीके नाटकमे बिटल रहिन । बुक्री भाडाँ खेले बेर सुरज डुल्हा बन्ना ओ सोनिया डुलही । एक प्रेम जोडी, एक असल पटनी बन्ना करिट । एक डोसरके साठ डेलक सँग सँगे काम करलक । बोली बचनमे आडर सम्मान । ओ सुन्डर परिवार म एकठो सन्टान जन्मलक । ओ असल रेखडेख करलक । सोनिया लर्काहन बोकु लेक काम करलक ओ डुढ पिओइलक । एकठो छोटीमोटी सुन्डर झोपरी बनाके बुकरी भारा खेल्ना करिट सोनिया ओ सुरज ।
सोनिया जस्टक भारी हुइटी गैली ओस्टक हुँकार सुन्डरटा बहर्टी गैलिन । सोनिया डेख्नामे बरा सुग्घर रही । सोनिया जस्टक बैसन हुइटी गैली हुँकार रुप रंग डेख्के छक्क परिट सबजे । टर सुरज ओ सोनियाके प्रेमके बन्धन कोइ टुरे नै सेक्ले रहित । सोनिया ओ सुरजके ओहे जोडी रहिन जोन बचपनमे रहिन । सोनिया ओ सुरजके बचपनके जोडीमे सबजे खुशी रहिट तर जब जवान हुइलैं टे उइनेके जोडीमे सबजे जरे लग्लैं । अभिन विभिन्न बदनाम करे लग्लैं । अनेक बहाना कर्के सोनिया ओ सुरजके मैयामे बाधा पुगाइ लग्लाँ ।
सुरज ओ सोनिया के बचपनके जोरी (सम्बन्ढ) भारी हुइलकमे टुर्ना कोसिस करटहिन सबजे । हँस्टि रमैटि रहल डुई बीचमे आँशके लडिया बहाडेला । सुरज ओ सोनिया हे छुटैना अनेक बहाना लगाई लग्ला । सोनिया ओ सुरज शरीरके सास नै छुटट सम सँगे रना, एक डोसर हे साठ डेना कसम खासेकल रहिट । एक डोसरसे कोई अलग कराई नै सेकी कैक, यडी कराई कलेसे केवल मृटयु कैक कसम लेसेकल रहिट ।
डिन समय बिट्टि गैल सोनिया ओ सुरजके पलपलके जिन्डगी टरप टरपके गुजर टहिन । एकपल रहे नै सेक्ना होगैल रहिट । टर मजबुरीसे अलग हुइपरल रहिन । सुरज से सपना हे डुर करैना एकमात्र कारण रहिन सुरज गरिबीके कारण पह्रे नैसेकल रहिट । सोनियाके आफन्ट सोनिया हे कना करिन, “सोनिया सुरज गरिब बा कसिक पाले सेकी टुहिहे, कसिक टोर चाहना हे पूरा करे सेकी । कसिके टुहिहे खुशी डेहे सेकी । खुड ओकर खाइ नै पुग्ठिस । अपन जीउ पल्ना कर्रा बटिस टे टुहिहे कसिक पाली । ना पह्रल हो ना कौनो कमैना डगर काकरे सेकी सुरज कैक सोनिया हे सुरज से अलग करैना बहुट प्रयास कर्लिन ।
“यी समाज फेन कसिन कुछ कर्ना हौसला डेहक छोर्के उप्परसे ठिचठ । डगर डेखाईक छोर्के आउर मस्ना काम करट । साठ डेहक छोर्के आउर सम्बन्ढ टुर्ना काम करट ।”
सोनिया ओ सुरज हे जत्रा रोके खोज्लै टर कोई नैसेकल । सुरज ओ सोनिया उ गाउँ छोर्के निकर पर्ला अपन प्यारके संसारमे । एक परेवाके जोरियाहस् । सँगे घुम टहिट हाँस टहिट, खाई टहिट । टर ओइनके पाछे-पाछे चिल, कौवा, गिडार, बाघ, भाल जसिन सोनियाके आफन्ट छुट पर्ला खोजे । आखिर छिनके छोर्ला सोनिया ओ सुरजके खुशी । ओइनके जिन्डगी टहसनहस पार्के छोर्ला । सारा कुछ लुटके छोर्ला सोनिया ओ सुरजके । सोनिया हे लैजाके एक कोठा मे बन्ड कर डेलै । सुरज एकओर टरप टरपके जि टहिट कलसे सोनिया एकओर । सोनिया पिंजरक भित्तर ठुनल मच्छी जसिन छटपटा छटपटाके आँशके घुट्का पिके जीअ टहिट ।
भेट कर्ना माढ्यम ना टे बाट कर्ना । एक ओर सुरजके बेहाल रहिन कारण सोनियाके भोज औरे जहन सँग कर्ना सारा योजना मिला सेकल रहिन । एकओर सुरज सोनियाके कहल बाटसे पालहस रहिट । सोनिया कले रहि सुरज यदि टोहार हुइ नैपैम कलेसे मोर डोली नाहि लास उठी । मोर अंगनामेसे सोनिया कैके कले रहि । सुरज यहे बातसे टर्पिट कारण सोनियाहे कैसिक बचाउँ कहिके । सुरजके दिल टुक्रा टुक्रा होसेकल रहिन । काहके कि सोनिया सुरजहे सच्चा मैया करिन् । अचानकके भोज अंगनामे ना पंटङ ना बाजा पूरा सुनसान । सबेजे हडबड हडबड करिट । सुन मिलठ बरात लेके सोनियाहे लेहे दुल्हा आइटै कहिके । एकघचिक पाछे सुनमिलठ सोनिया आत्महत्या कैडेलि । एकओर बरात एकओर सोनियाके लहास । यि घटनासे सारा टोल खहलबहल होगिल । आखिर का हे इ सब करटहिट सोनियक घरक मनैं । बस उहे ना अप्ने ढनी ओ भारी मान ईज्जट रहल परिवार रहिट । टर अपन सन्टान सोनिया के खुशी छिन्ना कारण । सुरजके गरिबी ओ अशिक्षिट के कारण ।
संसारमे कोइफे ढन सम्पत्ति लेके नै आइल, ना टे यहाँसे लैजाइ सेकी । मनैनके किस्मटके खेल हो । यहाँ गरिब करोडपटि बने सेकट कलेसे करोडपटि रोडम गिरे सेकट । मान ईज्जट, सम्मान भलाईसे आइट, बुराईसे नाहीं ।
आखिर सोनियाहे नास कराके छोर्ला ओइने । सोनिया अपन भोज जबर्जस्टी औरे जहनसे कर्ना बाट सुन सेकल रहि । एक ओर सुरज सोनियाके प्यारमे पागल हस होगिल रहिट । सोनिया सुरजहे कले रही “सुरज मै केवल टुहाँर हुँ, केवल टुहाँर, टुुहाँर सिवा केक्रो फे नाइ ।” सुरजके कानमे केवल यह शब्ड गुन्जटि रठिन ओ छाटी चिरेहस कर्ठिन, कारण सोनिया हे कसिक बचाउँ । सोनियक् बिना ठेगानके भोजसे सबजे अचम्म मानल रहिट । हर कोइके मनमे प्रश्न अइना स्वाभाविक बाट हो । आखिर काहे सोनियाके भोज अचानक ? टर सोनिया यी डिन डेख्ना नै चहली । सोनिया हार खासेकल रही यी स्वार्ठी समाजसे । एक पशुके व्यवहार कर्वा पाके सोनिया खिन्न होसेकल रही । सोनिया स्वटन्त्र जिना चाही जिन्डगीक लक्ष्य बनाके टर सारा खुशी छिन सेकल रहिन सोनियाके अपने घरक परिवारसे । अन्टिममे सोनिया अपन जीवनके अन्ट अपनहे करे पुग्ली । आत्महत्या करे पुग्ली स्वार्ठी समाजके सोंचसे डिक्क होके ।
यी कैसिन समाज ना हाँसे डेहट ना खाई डेहट, ना सुखसे जिए डेहट । आखिर यी सब काहे केवल यहे कारण ढन सम्पत्ति ओ शिक्षाके कारण । यडि कोइ उटसाह, हौसला पाइट कलसे अवश्य एक डिन सफलटाके शिखर चुमठ जिन्डगीक सफरमे ।
सुरज सोनियाके बिना अकेली उहे ठाउँमे बैठल सारा कुछ सम्झटी रठैं । घायल डिलके पीडासे आँखी आँशले भरल रठिन । उहे सोनियासे बिटाईल डिनके याड करटी रठैं । जोन सोनियाके सँग खेल्लक, हँस्लक, रमैलक ओ माया प्रीटिके ऊ पल । सोनिया सुरजके कोनामे सुटके, सुरज आई लव यू कलक ओ माया करके चुम्बन करलक उ पल । सुरज हे झलझली याड आइ टहिन । सोनिया डुलही बन्के सुरजके सँग सुटके बाट करलक । चुन्नी ओहोरके घुरघुटके भित्तरसे मुस्कुरैटी रहल सोनिया के ऊ मुस्कान सुरज हे झस्कैटी रठिन । सुरज उहे ठाउँमे बैठल रठै जहाँ बचपनमे बुक्री भारा खेल्ना करिट । कत्रा रमाइलो रहिन बचपनके उ पल । सँगे स्कुल गैलक, सँगे छेग्री चहै्रलक, हँस्लक, रमैलक याड अइठिन । अचानक झस्के पुग्ठै सुरज । टर सब कुछ बडलगिल रहिन उ डिन, उ समय केवल याड रहगैन रहिन ।
साँझ होगिल रहट । डिन बुरक लाग बरे भारी लाल-लाल हुइटी जाइट । चिरैचुरुङ्ग बसेरा लेहक लग अपन अपन ठाउँ ओर लागे लग्ठाँ । सबकुछ अपन ओरसे बिडा लेटी रठैं । डिन फेन बुरे लागल हल्का बड्री मे ढिरे ढिरे नुक्ना शुरु करे लागट । झुसमुस अन्ढार हुइटी जाइ टहे । सारा ओर सुनसान हुइटी जाइ टहे । उहे फँटवामे लडिक किनारे बैठल सुरज अकेली टहिट ।
सोनिया सदाके लाग बिडा लेके गैसेकल रही । सबकुछ बडलगिल रहे । साँझ होगिल रहट सटर सटर सोनियक घरेमसे मनै निक्रे लग्ठै । सँगे सोनियक मृट शरीर निकरठै । सोनियाके जिन्डगिक् अन्त डाह संस्कारके सँगे सूर्य फेन बिडाई लेटी रहे । सोनियाके चिटा टयार होगिल रहिन । चिटामे सुटल सोनियाके मासुम चेहरा, असिन लागेकी सोनिया निडाईल टी । हँसिलो अनुहार जैसेकी सोनिया सपनामे डुबल टी । उहे सुरजके । टर ओसिन नै रहे सोनियाके सब कुछ बन्ड होगिल रठिन । ऊ डिलके ढडकन, जो कना करी सुरज टुँ मोर डिलके ढडकन हुइटो । ऊ आँखी बन्ड रहिन, जो कना करी सुरज टुँ हरपल मोर नजरमे रना कर्ठो । सोनिया कना करी सपना मे टुँ मोर सँगे रठो ओ विपनामे मोर मनमे ।
समय ओरागैल रहे ओ ढिरे से सोनियक अनुहार उज्जर घुरघुटसे छोपडेठिन । एक घचिक पाछे सोनियक चिटामे आगी लगाडेठैं । आगी अपन टेजसे बरे लागट । ऊ करिया ढुवाँ घुम्टी आकाश ओर जाइट । सुरजहे सोनियके कहल बाट याड अइठिन । सोनिया कना करी “सुरज मही आगीसे बहुट डर लागट । यडि मै मुजिम कलेसे आगीसे नाजरैहो ना । सुरज यी बाट से सोनियक चिटकार सुनेहस कर्ठैं । आगीमे जरटी रहल सोनिया चिल्लाई टी “सुरज–सुरज पिलिज मही निकारो पिलिज सुरज कैक । सोनिया चिल्लैटी जसिन । सुरज अप्ने आपहे बहुट कमजोर महशुस करटी रहिट ।
सोनियासे करल बाचा पूरा करे नैसेकल ओ सोनियासे बनाइल जिन्डगीक् सपना सब अच्कचरे होगैल रहिन । सब कुछ अढुरा होगिल रहिन सोनियाके । भुवा बनगैल रहिन सोयिनक शरीर । सोनिया ओ सुरजके सारा सपना अच्कचरे रहगिल रहिन । सारा बाचा कसम अच्कचरे रहि गैलिन ।
सोनिया सडाके लाग बिडा लेके गैसेकल रही । हुँकार शरीरके अन्टिम यात्रा उहे चिटा सम्म किल रहिन । सुरजके आँखीम सोनियाके बर्टी रहल चिटा औ सोनियक कहल एक–एक बाट याड आइटहिन । सोनियक यी संसारसे बिडाके पाछे सुरज पागल हस होगैल रहिन । जब सुरज अपन पैला सर्ना चहलै टे पैला फेन नै उठटहिन । सोनियाके भुवा बनल दृश्य और सुरज बार–बार घुमके हेर्ना करिट । सुरजके डिल सब टुटगैल रहिन । सुरज अपन पैला आघे सर्ना प्रयास करटहिट । सुरज अपन मनहे ठामके घरेओर लग्लै । घरे आके फेन केवल सोनियाके याड राट डिन अइना करठीन ।
कुछ डिन पाछे सुरज फेन ओहोर जा पुग्लै, जहाँ सोनियाके सँगे बैठके बाट कर्ना करिट । उहे ठाउँमे सोनिया के लुग्गा, कपरा ओ सारा सामान फेकाइल रहिन । उहे सामानमे सुरजके पठाई (डेहल) पहुरा फेंन रहिन । सोनियाके पह्रल किटाबसे लेके सारा कुछ उहे फेंकाइल रहिन । जब यी सब सुरज डेख्लै टे फेंनसे बिटल पलके याड झलझली आगैलिन । आँखिमसे आँशु गिरे लग्ठिन । सुरज ऊ ठाउँ ओर ढिरेसे पैला सरठै । ओ एकठो सुन्डर, डायरी उठैठाँ । जो डायरी सोनिया अपन हाँठले सजैले रही । अपन जिन्डगीक् भावसे सजैले रही ।
सुरज डायरी हेर्टी गिला, जोन डायरीमे सोनिया सारा मनक बाट लिखल रही । सोनियाके पीडाके चिटकार । पीडिट जिन्डगीक मनक सारा बाट डायरीमे लिख्ले रही । सुरज डायरी हेर्टी जैठाँ जहाँ पूरा आँशुके बुँडाले भिजल रह जोन जिन्डगीक अन्टिम डिन लिखल रहिन ।
सोनिया लिख्ले रही
“सुरज मै टुँहार सोनिया"
सुरज याड आइट मही उ पल जब हम्रे बुक्री भारा खेले बेला टुहाँर डुलही बनलक ओ टुहाँर जीवन साठी बनलक् । टुहाँरसँग बिटाईल हरपलके याड मही सटाईल । सुरज डुनियाँ हमार प्यारके डुश्मन बनल । आखिर हमार गल्टी का रहे हम्रे प्रेम कर्ले रही केक्रो नोक्सान टे नाइना । आखिर काहे हम्रहिन असिन सजाई हुँ सुरज ? काहे ? केवल उहे ना टुँ गरिब बटो, टुहाँर महल घर नै हो टबे ना ? आखिर कहाँ लिखल बा कि गरिब ओ ढनी मे माया नै कर्ना ओ भोज नै कर्ना । कहाँ लिखल बा गरिब ओ ढनी मे माया फरक फरक रहट कैक । कहाँ लिखल बा कि गरिब मे माया के कमी रहट कैक । आखिर मही यह कारण कोठामे बन्ड करले बटैं । टुँ गरिब ओ अनपढ बटो कैक । सुरज मायासे भारी सर्वोत्तम और का चिज बा झे ?
सुरज मै महिनौ डिनसे कोठामे बन्ड कर्वा पाइल बाटुँ । एक पिंजडामे ठुनल पंछी जसिन छटपटा छटपटाके टुँहार मायामे, टुँहार आशामे आज सम्म जिअल बटुँ । सुरज हमार भेंट हुइट कि नाई पटा नै हो । मोर लाग औरे लवन्डा खोज्के पठैना सुन्ठु । सुरज मै केवल टुहाँर हुँ टुहाँर सिवा केक्रो नै । सुरज यडी असिन हुई कलसे सायड मै बहुट डुर जारहम यी डुनियाँ से बहुट डुर । सुरज बाचा करो यी ढनी गरिब, जाटीय भेडभाव डेखाके हमार जसिन जीवन साठीहे अलग करैना हुकने मनमे इ सोंचाईके अन्ट कर्ना । यी प्यारके डुश्मन हुँकन अन्ट कर्ना । बाचा करो सुरज बाचा करो । मै टुहाँर मनके रानी सोनिया ।
सुरज अत्रै का पह्रे पाईल रही । अचानक सुरज कना आवाज आइल । सुरज झस्के पुग्ठै ओ हाँठेमसे ऊ डायरी गिरे पुग्ठिन । सुरज आवाज अइलक ओर घुमके हेरेबेर ठारु पहिरनमे सजल सोनियाके बाबु सिला रही । सिला सुरजके लग्गे आके हुँकार छाटिम चपटके कठी सुरज आई लव यु मै डेम टुहिन साठ । डिडी हे टे टुहाँर हुई नै डेला मै बनम टुहाँर जिन्गीक् जोरिया । कोई नै सेकी रोके हम्रहिन हे आप । चलो जाई घरे आप हम्रे लावा घर परिवार शुरु करप । डुनुजे उहाँसे घरेओर लग्ठैं । ओराइल ।
पटुहिया
जुगुर जुगुर चुल्हामे आगि बर्टि रहठ । सन्ढया घरि घरि चुल्हम लकेरल काठिहे ठिट्कोर्ठि । कोनम लर्काहे लेके छाटिक डुढमे लगाके पसग्गा अगोर्ले आगि हेर्टि रठि । आँखिमसे आँस बहके गाल पुगल रठिन । घर सुनसान भवाइल भवाइल लग्ना । कारण अविनास उ घरेमसे सडाके लाग बिडा लेके गैसेकल रहिट ।
सन्ढया जिन्डगिक एक एक पलहे सम्झठि । उ डिनके जोन डिन अविनासके बाबा सन्ढयाहे अपन पटुहिया बनाइक लग मागे आइल रहिन । सन्ढयाके बाबा ओ अविनासके बाबा जाँरक खोरिया अगोरले खोपसे माँगर गैलक ओ उहे बेला सन्ढयाहे अविनासके उप्पर डेलक । यि बाट अविनासहे फेन पटा चल्ठिन ओ डुनु ओर भोजक् सामा हुइलग्ठन । बराटके उ डिन अविनास डोलामे बैठल मुस्कि मर्ठैं । पुर्खा ओइने अपन अपन ओरसे माँगर गैनामे लागल रठैं ।
अविनासहे संप्राइ बेर असिके माँगर गाइट सुन मिलठ ः
हाँसि हाँसि डुलहु भैया पगिया ना पहिरे रे सुगनामे म डिल चह्रिरे रे
डेउ डुलहु भैया माठ सिर पगिया हमहु चलबि बरियाटे ।
हाँसि हाँसि डुलहु भैया जमिया ना पहिरे रे सुगना मे डिल चह्रिरे रे
डेउ डुलहु भैया हमहुके अंगियाके जमिया हमहु चलबि बरियाटे ।
हाँसि हाँसि डुलहु भैया सटकि ना पहिरे रे सुगना मे डिल चह्रिरे रे
डेउ डुलहु भैया हमहुके सटकि हमहु चलबि बरियाटे ।
हाँसि हाँसि डुलहु भैया जुटिया ना पहिरे रे सुगना मे डिल चह्रिरे रे
डेउ डुलहु भैया हमहुके जुटिया हमहु चलबि बरियाटे ।
असिके पुर्खा ओइने माँगर गैटि सुन मिलठ । बराट जैना सारा जहनके अनुहारमे खुसि भरल रठिन । लौवन्डि लहंगा चोलियामे संपरल बरे सुहावन बिल्गैठाँ । ओहोर डुलहि सन्ढयाके घर अंगना चैनार रठिन । बराटि डुल्हिक गाउँ पैंठटि रठैं ओ माँगर फेंन गैटि रठैं । माँगर ऐसिक गठैं
अगुवक घोरुवा रे आगु पाछु करैरे भोजुवक घोरुवा रे बिच डाल ठाम्हे
डुलहके घोरुवा रे चले अगुवाइ साजी चलबी बरियाटे ।
बरटिया डुल्हिक गाउँ पुग्जैठै ढो ढो पो पो बाजा बोलल रहठ एक ओर माँगर फेन चलल रहठ । जब डुल्हा उ अंगनामे प्रवेश कर्ठै उहाँ मनैनके मेला लाग जाइठ । डुलहा राजा अविनासहे हेरक लाग । बराटिनके स्वागट कार्यक्रम सुरु होजाइठ । हजारौंके बगाल लेके सन्ढयाहे लेहे आइल रहिट अविनास । उहे हजारौंके नजरमे सन्ढया केक्रो पटुहिया बने जाइटहि । जब बराटि अंगनम पुग्ठै टब ऐसिक माँगर गाइट सुन मिलठ । एक ओर सम्ढि सम्ढा लग्ना कार्यक्रम चल्टि रहठ एकओर माँगर चलट ।
छेगराटे छोटे भैला, रुपियाटे खोटे भैला, डेल्वक चुनरी मलिन भैला, डुल्हक बाबै बाँढडेउ ।
छेगरा सटाइ डेबु रुपिया भँजाइ डेबु, डेल्वक चुनरी ढुवाइ डेबु, डुल्हक बाबै छोर डेउ ।
असिके सन्ढया ओ अविनासके भोजक कार्यक्रम चल्टि रठिन ।
सन्ढया अपन घर डुवार छोर्के अपन जन्म घर छोर्के । अपन डाइ बाब सारा परिवार छोर्के । सन्ढया अपन भोजक सब डृश्य हेर्टि रही । कोइ मटवार होके कोन्वम घोल्ट्याइल रहट टे कोइ गीट गाइठ टे कोइ नाचट । एक ओर अविनास ओ सारा डुलहा बगाल खानपिनमे रठैं । सन्ढया खुसि रठि अविनास जाँर डारु कुछ नै पिठैं कैक । अपन रोजल ओ खोजल जसिन डुलहा सन्ढया भेटैले रठि ।
राट बिटठ बिहान हुइठ, डुलही लेके बराट फिर्टा हुइना रहठ । डुःखके बाट डुल्हीके परिवारमे सारा जहनके अनुहार डुःखी, रुनछुन डेखा पर्ठिन । ओहोर कोभो कोभो कोन्टिम एक डोसरहे उँक्वार ले लेके रोइटि रठै । बिडाइके समय रहट । यि बेला फेनसे माँगर गाइट सुनमिलठ ।
कहाँ लग मिल्बेरी ढनियाँ कहाँ सम भेंटबे, टोरे घर परला उटेहली । चह्रो डोली डाँरा चालो अपने घरे ।
एकओर महिलनके आवाजमे असिक सुन मिलठ– ठाह्री रहो प्रभु ठाकुर, ठाह्री रहो प्रभु ठाकुर मिलिलिक सग्गे मैरी ससुरिया टुहाँर लगही ।
कहाँ लाग मिल्बेरी ढनिया कहाँसम भेंटबे, टोरे घर परला उटेहली । चह्रो डोली डाँरा चलो अपन घरे ।
ठाह्री रहो प्रभु ठाकुर मिलिलिउ सग्गे बाबै ससुरुवा टुँहार लगहि ।
कहाँ लाग मिल्बेरी ढनिया कहाँ सम भेंटबे टोर घर परला उटेहली, चह्रो डोली डाँरा चलो अपने घरे ।
ठाह्री रहो प्रभु ठाकुर मिललिउ अपन डाडुहे जेठन्वा टुहाँर लगही ।
कहाँ लाग मिल्बेरी ढनिया कहाँ सम भेंटबे टोर घर परला उटेहली, चह्रो डोली डाँरा चलो अपने घरे ।
ठाह्री रहो प्रभु ठाकुर मिललिउ अपन भौजीहे जेठिन्या टुहाँर लगही ।
कहाँ लाग मिल्बेरी ढनिया कहाँ सम भेंटबे टोर घर परला उटेहली, चह्रो डोली डाँरा चलो अपने घरे ।
ठाह्री रहो प्रभु ठाकुर मिललिउ अपन बाबुहे साली टुहाँर लगही ।
कहाँ लाग मिल्बेरी ढनिया कहाँ सम भेंटबे टोर घर परला उटेहली, चह्रो डोली डाँरा चलो अपने घरे ।
ठाह्री रहो प्रभु ठाकुर मिललिउ अपन भैयाहे साला टुहाँर लगही ।
कहाँ लाग मिल्बेरी ढनिया कहाँ सम भेंटबे टोर घर परला उटेहली, चह्रो डोली डाँरा चलो अपने घरे ।
अस्टके माँगर पैढारके पैढार लगाके गैटि रहिट । उहाँसे बिडाइ हुइठ । अविनास सन्ढया अपन डुलहीहे हजारौंके माझसे अपन घर नन्ठैं अपन जिन्डगीक जोरिया बनैठैं । सन्ढया फन अपन सारा जिन्डगी अविनासहे सौप डेठिन । अविनासके उक्वारमे सुटके अपन मनक बाट कर्ना कर्ठि । अविनास यि जिन्डगीक खेल जाने नै सेक्जाइठ । कब कहाँ कहाँ पुगा डेहठ कोइ जाने नै सेकठ । मै सोच्ले फेन नै रहुँ मै टुँहार जीवन जोर्या बनम ओ असिके हम्रे एक होप । मै इ घरक पटुहिया बनम सोच्ले फेन नै रहुँ ।
अविनास टुँ टे महि केवल संघरियाके नाटासे हेर्ना करो ना । अचानक कसिके हम्रे एक परिवार बने पुग्लि । टर अविनास स्कुलमे कार्यक्रमके बेला टुहाँर प्रटिभा मोर मनहे छुलेहे । टुँ अपन कलासे साहिटय रचनासे ढेर जहनके मन जिट सेक्लो । हजारौं जहनहे टुँ खुसि पारे सेक्ठो । अविनास मै भगवानसे मागु कि मोर पटि टुहाँर जस्टे होए । टर मोर भाग्य टुहिन पैना रहे । अविनास मै मनमे सोंचु मै अपन पटिके जिन्डगि भर सेवा करम सु:खमे डु:खमे फेन हरडम साठ डेम । मै अपन ज्यानसे लरम सोंचु । आज मै अपन चाहल जसिन पटि भेंटैले बटु कैक सन्ढया अविनासके उक्वारमे सुटल सुनाइन ।
अविनासके डाइ बाबा घरक मनै फेंन सन्ढया जसिन पटुहिया भेंटाके खुसि रठैं । सन्ढया काम कर्नाहा सारा घरक काम उसर्ले रना रहन । रात्ति उठ्ना खैना पिना टयार कर्ना, मुर्गी चिङ्गना, गोरु डांगर हेर्ना, गोबर कहर्ना, अंगना घर बहर्ना सारा काम उसर्ना कर्ठि सन्ढया । बहुट सुःख शान्टि परिवार रठिन ।
डिन अस्टे बिट्टि जैठिन जब सन्ढया डुइ जीउक होजैठि । टब शरिर लुज हुइ लग्ठिन । आराम कर्नास लग्ठिन टर सन्ढया पाइ पर्ना सेवा आराम पाइ नै सेक्ठि । कारण परिवारम काम कर्ना मनै नैरलक ओरसे । टर सन्ढयाके ससुइया बरे मजा रठिन । डाइ बाबाके एक्कठो छावा अविनास केल रठैं । सन्ढयाके सास कठिन पटुहिया टैं मोर छाइ जस्टे हुइटे । मै छाइ ट पाइ नै सेक्नु टबे आज महि टुहिन अपन छाइ जस्टे लागठ । मै फेन एक डिन टोर जस्टे अपन घर, अपन डाइ बाबा, अपन जल्मलक गाउँ छोर्के इ घर अइनु । मै फेंन इ घरक पटुहिया हुँ । ओ मोर पटुहिया टैं बन्ले । मै फेन एक डिन टोर जस्टे इ घरेम लौव अइनु टे काम नै जानु पुछे परे । नै जानु टे कहुवा मिले । आनक घर ठरुवा लेके हजार बाट सुने परट, ओ सहे परठ । मनेम चोट लागट डुःख लागट । घरक याड आइट डाइ बाबनके याड आइट । घरे अपन मनपर्डि घुम्लक खेल्लक जीउ भोज कर्लेसे कहाँ करे मिली । सस्सार अइलेसे यहाँक बाट माने पर्ना रहठ ।
सास ससुरुवक अपन श्रीमान्के (ठरुवक) अढिनमे रहे पर्ना रहट । सब जहनके सेवा करे पर्ना रहट । पटुहियक भूमिका यहे रहट । कैक सन्ढयाके ससुइया सम्झैटि रठिन । ओ कठिन मै फेन टोर जस्टे डुइ जीउक हुइनु । अविनास पेटेम रहे उहिसे पहिले बहुट लर्का बचाइ नै सेक्नु कामक कारण नोडुर–नोडुर भर्वा उठैना खानपिन मजासे खाइ नै पैना के ओरसे बहुट लर्का ओरैलै । पटुहिया टै चिन्टा नाकरिस । अपन सेक्ना काम करिस । जिउसे उप्पर काम ना किरस । खैना चिज खैटि रहिस । बिसैना समय बिसाइस अपन ज्यूक ख्याल ओ बच्चक ख्याल करिस कैक सन्ढया हे सम्झैटि रठिन ससुइया । सन्ढया हन बहुट मैया कर्ठिन ओ बहुट ख्याल कर्ठिन । अपन छाइ जस्टे मन्ठिन सन्ढया हे । सास, पटोरके सम्बन्ढ बरे मजा रठिन । असिन सम्बन्ध कि जोन सग्गे छान संग रहट ।
ओस्टे मैयाँ जोन सग्गे छाइन संग रहट । सन्ढया के ससुइया हे पटा होसेकल रठिन छाइनके जिन्गि कसिन हो । एक रोज अने छाइ हे पटुहिया बने जाइ पर्ठिन । सब कुछ भोगल ओ बुझल रठन ससुइया । ओहे मारे अपन पटुहिया हे बहुट मैयाँ करिन । अपन छाइ जस्टे मानके संगे कामेम लाग्डेना ओ मिठ मिठ बाट करके हँसैले रना । टिह्वार अइलेसे ससुइया पटुहिया नछुनिया बनजाँइट ओ ससुरवा जुन मन्डरिया । सबजे छक्क परजाइन इ सम्बन्ध डेख्के । गाउँमे सब्से खुशि, मिलनसार, शान्टि परिवारके नमुना रठिन ।
सन्ढयक ससुइया फेन एक रोज अपन घर डुवार छोर्के डाइ बाबा ओ जलमल गाउँ छोर्के रोइटि आनक गाउँ पटुहिया बन्के आइल रहिन । पराइ घर लौलि मनै काम नै जन्ठैं । कवाइल अनखोर लग्ना, पुछपुछ के करे पर्ना । कौनो काम नै जन्लेसे बिग्रक डरैना ओ डराडरा कर्ना । अचानक कौनो काम बिगर गैलेसे कहुवा पैना । कहु फेन जैना हुइलेस डराडरा पुछ्ना । लैहर रमैलक् , घुम्लक् जिउ ससरार अाके बाँढल हस लग्ना, मजासे घुमे रमाइ फेन नै पेैना । अपन लैहर से लेके पतुहिया नानट समके अनुभव करसेकल रहिन सन्ढ्यक ससुइया । यहे मारे अपन पटुहिया सन्ढ्या हे बहुत मैयाँ ओ रेखडेख पिरमार्का बुझ्के अपन कोखके लर्का हस व्यवहार करिन । सन्ढ्यक ससुइया हे पतारहिन पतुहिया कना घरक मुख्य अंग हुँइतै । पतुहिया नै रहिते परिवार कसिक बनी । घर डुवार के सहेरि । ससुइया पतुहियाके जिम्मा बराबर हो ।
ससुइयक फेन उहे डग्गर जिन्गिक यात्रा सुरु हुइल रहिन ओ पतुहिया फेन ओहे घर । सब कुछ बुझके ससुइया सन्ढ्याहे हरपल खुशि करैले रना चाहिन । ओहे मारे ससुइया पतुहिया नचुनिया बन्जिना कलेसे ससरुवा मन्डरिया । घर घरके नाच सुरुकरे भिरजाँइत । अस्तके उ परिवारमे खुशि अाइल रहिन । सन्ढ्या डुइ जिउक् होसेकल रहिन । हँस्ठा रमैठा सास पटुहिया । हँस्टि रमैटि समैमे अचानक अविनासके मोटर साइकल डुर्घटनामे पर्के अस्पटालमे बटाँ कना खबर सुनके डुनु जहनके खुशी पल भरमे हेरा जैठिन । जबे लग्गन टबे हग्गन कहेहस । एकओर सन्ढयाहे व्यठा लग्ना बेला ओहोर अविनास अस्पटालमे मृटयुके सँग लरटहिन । एक ओर सन्ढया छावा जन्मैठि एकओर अपन श्रीमान्हे गुमैठि । अविनासके मृटयुके खबर पाके सन्ढया चिल्लाइ पुग्ठि ओ जोरजोरसे रोइ लग्ठि ।
सन्ढया अपन जिन्डगी उज्रल महशुस कर्ठि । टर फेन अपन ससुइयाके मैया पाके ओ छुटिमुटि बच्चा अविनासके मैयाके पहिलो पहुराके ख्याल कर्ना बहै्रना ओकर भविष्य बनैना ओ डाइक जिम्मेवारी पूरा कर्ना सोंच्ठि । अविनासके एक-एक बचनहे समझके सन्ढया उहे घरेम जिना उहे घरेम मुना अपन सास ससुइयाके हेरचाह कर्ना कैक बचन डारडेठिन ।
सन्ढया सुख–डुःखमे अपन ससुइयक माया साठ पैठि रठि । एकठो डाइके मैयाँ जस्टे ससुइयाके मैयाँ पाके घरसे कहु नै जिना निर्णय करलेठि । इ बाट सुनके सन्ढयाके सास ससुर्वा खुशी हुइठैं । ओ खुशीके आँसु गिरजैठिन ओ सन्ढयाहे अपन छाटिम लगाके रोइलै काहेकि छावा कलक छाइ कलक उहे सन्ढया रहिन ।
सन्ढयाहे अविनासके कहल बाट याड अइठिन । सन्ढया मोर कुछ होजाइ कलसे डाइ बाबाके मजासे ख्याल कर्हो । मै ओ टुँ बाहेक इनके साहारा औरे कोइ नै हुइट । टुहाँर ओ मोर आशामे जियल बाटै । घर छोर्के कहुँ ना जैहो बिन्टि बा सन्ढया कैक अविनास कले रहिट । सन्ढया अविनासके सामु करल बाचा पूरा कर्ठि । उह घर अपन ससुइया ससुरुवाके रेखडेख कना ओ छावा विवशहे हुर्कैनामे लागजैठि ।
सन्ढया जवान रठि बीस बाइस वर्षके । सन्ढया अपन जवानीहे चोखो ढर्ले रठि । अविनासके बचन ओ मायामे जीवन बिटैटि रठि सन्ढया । टर सन्ढयाके ससुइया ससुरुवाहे सन्ढयाके अकेली रना ओ जिन्डगी कटैना कर्रा डेख्के मजा नै लग्ठिन । ओ डुनुजे सल्लाह करलेठैं । पटुहियक लग जोरिया ओ अपन लाग छावा खोज्के लन्ना कैक । सन्ढयाके ससुइया ओ ससुरुवा सल्लाह कर्के सन्ढयाहे सुनैठा । यि बाटसे सन्ढया फेन राजी हुइठि । सन्ढया अपन जिन्डगिक लम्मा सफर सम्झठि ओ अविनासके कहल बाट याड अइठिन । डाइ बाबाके ख्याल करहो जब सम रहहि टब सम ।
सन्ढया औरे जीवन जोरियाके सँग रलेसे फेन अविनासके मैया भरल शब्ड ओ अविनासके बचनके पालन कर्ठि । अविनास अपन जलमडेना डाइ बाबाहे बहुट माया करिट ओ आडर सम्मान करिट । ओ बनैनावालाहे हरडम ढन्यवाड डेना करिट । ओ कना करिट यि डुनिया हमार डुइ डिनके घर हो । हम्रे यहाँ पहुनी खाइ आइल जस्टे बटि । आज बटि काल नै रहे सेकब । आघे पाछे एकडिन जरुर स्वर्गमे सबजे भेंट होब कैक अविनास अपन परिवारहे सम्झैना करिट ।
सन्ढयाके सास ससुरुवा एकठो छावा बनाके जीवन जोरिया बना डेले रठिन । सन्ढया ओ सुसिल एक डोसरहे अपन श्रीमान् ओ श्रीमतिके अधिकार डेना कर्ठै । ओ डुनुजे अविनासके डाइ बाबाहे अपन डाइ बाबा मानके सेवा सुसार कर्ना बाचा कर्ठै । सन्ढया ओ सुसिल छावा विवसके भविष्यके बहुट ख्याल कर्ठै । सुसिल विवसहे अपने छाव मानके पूरा मैया डेठैं । सन्ढया अपन उ घरक पटुहियाके जिम्मेवारी पूरा कर्ठि । असिके उ घरेम फेनसे खुशी घुमके आजैठिन ओ सारा परिवार एक डोसरमे रमाइ लग्ठैं । ओराइल ।
छाइ
एकठो सुन्डर जोरीया, एक परिवारके शुरु हुइठ । डुनु जहनके सोंचाइ रठिन हमार एकठो छावा जल्मे । टर पहिले सन्टान छाइ हुइठिन । डुनजहनके अनुहार अंढार होजैठिन । आइल घरक सम्पत्ति लैजिना जाट कैहिके । विचारी अन्जान बच्चाके कुछु पटा टकके नै रठिस कि मै के हुुँ । जल्मटिकि हेल्हा करुवा पाइ लागट । बिना मनक करलाग्के डाइ बाबाके माया सेवा पाके बाह्रट लवण्डी । अपन डाइक कोखके माया, डुढ चुसके बचपन बिट्लक ओ सडा अपन डाइक बाबाकेसँग रना सोंचाइ रठिन लवण्डीन के टर बनैनावालाके इच्छा हो । अपन जलम डेना डाइ बाबा जल्मल घर छोर्के पराइ घर जुनी काटे जाइ पर्ना कसिन डुःख लग्टिक जिन्गिक कठा ।
रिटु जब बुझ्नाहा हुइली ओ जन्ली कि लवण्डि जाट अपन जलम घर अपन डाइ बाबा सारा परिवार छोर्के पराइ घर जाइ परना । रिटु हे अनौठो लागे लग्लिन लवण्डिक जलम पाके ओ लवण्डिनके जिन्डगीसे । छावा जलम लेलेसे खुसियाली मनैना टर छाइ जल्मलेसे आँस बहैना ओ डुखि हुइना । ओ पराइ समझके मटलब नै कर्ना । रिटुक् जिन्गि फेंन अस्टे बिट्टि रठिन । जलम लेटि कि टे कहुवा पाइल रहिन ।
जब रिटु जल्मलीन हुँकार रुवाइके आवाजसे छावा हुइल कि कना रिटुके बाबा सोंच्ठिन । एक घचिक पाछे सोह्रिन्या हँस्टि कठिन । भैया डमाड पैलो हो । यि बाट सुन्के रिटुके बाबक अनुहार अन्ढार होगिल मन मार लेलिन । छाइ कटि कि रिटुक बाबा प्रेमलाल अनेक बाट सोचे लग्ठैं । छाइ जल्मल हुर्केना बर्हैना एक डिन भारी होके इ घर हम्रहिन छोर्के चलजाइ । जाने कहाँ बटिस भाग्य जैना । नै चाहके फेन पठैहि पर्ना रहठ छाइन । अनारि रिटु हे का पटा मोर डाइ बाबा महि कौन लजरले हेर्ठै ।
मोर बारेम का सोंच्ठैं । रिटुके जिन्डगी छोटमे रमाइलो रठिन हँस्ठि खेल्ठि । मने जब रिटु के भैया जलम लेलिन उहे बेलासे भैयक ओ अपन जिन्डगी फरक पाइ लग्लिन । मायामे फरक, खैना, लगैना व्यवहारमे फरक पाइ लग्लिन । भैयक लाग मजा मजा खेलौना, मजा मजा लुगा लान डेना करिन मने रिटुके लग नाहि । रिटु रोइना करि ट डाइ बाबा घघोटिन टुहिका चाहल पलि टे बा टोर । ऐसिन बोलि कि रिटु सुनके डरैना करिन । कुछ मागे नै सेक्ना डराके । रिटुक् भैया बोर्डिङ्ग स्कूलमे पह्रे जाइन मने रिटु सरकारी स्कूलमे । रिटु भैयाहे बहुट मैया करिन ओ भैया फेंन बहुट मैया करिन । स्कूल जैना बेला रिटुके भैयाहे मिठाइ खैना रुप्या डिन मने रिटुहे नाहि । अत्रे किल नाहि खाना खाइ वर पहिल परसा भैया हे खवाके तब खाइ पाइन रिटु । भैया से कुछ डुर सँगे जैना करिन । रिटुके भैया डिडीहे करैलक व्यवहार डेखिन टे मजा नै लागिन । डिडीक माया लाग्के अपनहे डेहल रुप्या डिडी हे डैडिन भैया । यडि खैना बा कलसे बाँट बाँट खैना करिन । रिटुहे भैया कना करिन डिडी टुहि रुप्या काजे नै डेहट बाबा ? मने रिटु यि प्रश्नके जवाफ डेह नै सेकिन् । बिचारि रिटुहे का पटा हुकहिन काजे असिक करैठिन । रिटु चप्पलके स्कूल जैना मने भैया जुत्ता लगाके बोडिङ्ग स्कुल ।
डिन अस्टे बिट्टि गैलिन रिटुके । जस्टक भारि हुइटि गैलि ओस्टक घरक काम धेर करेपरे लग्लिन । रिटु कामके कारण मजासे पह्रेफे नै पैना, समयमे स्कुल जाइ नै पैना होजिठिन । गृहकार्य मजासे नै करेपैलक कारण स्कूलमे सर ओइनसे पिट्वा पैना करिन । घरेक काम नै कर्लेसे घरेक मनैनसे गारि पैना ।
रिटु घरक ओ स्कुलके टनाबसे पह्रे नै भेटैलिन । स्कुल सडाके लाग छोर्हि पर्लिन । स्कुल छोर्लक पाछे फेन उ मजासे घरे बैठे नै पैलिन । स्कुल छोर्लक करन आउर ज्याडा कहुवा पाई लग्लिन । पहरके सेक डारल आप भोज खैडेना हो नै टे काम लगाडेना हो । काम ना काज यहोर घुमि ओहोर घुमि पेट भर भात किल खाइ । यहे मारे रिटुहे एकठो घर काम लगाडेलिन । बिचारी रिटु घरक काम करम कहिके स्कुल छिर्लिन तस्टे ओरे घर काम लगाडेलिन । अन्गुट्टि उठके किटाब पहर्ना जुन भारा मिस्ना गोबर मल फँकाइ पर्ना ।
पहर्के भारि मनै बन्ना रहर ओ सोच सब खटम होगैल रहिन । छोटमे भैयासे संगे स्कुल गैलक हँस्लक खेल्लक उ जीवन समझके आखिँमसे आँस चुहना करिन । बरे गहिंर मैयाँ मैयाँ रहिन डिडि भैयाके टर रिटु हे बाध्य हुइ परल रहिन भेया से । बहुट डुखके बाट पल रहिन, रिटुक का डोस रहिन ना मजासे पह्रे पैना ना अपन जलम डेहल डाइ बाबक संग रहे पैना । आकिर रिटु फेन टे उहे कोखके लर्का रहिन । जोन कोख से भेया जलमल रहिन । ओक्रे रकट से जलमल रहिन जेकर रकट से भैया जलमल रहिन । टहु पर छावा हे अपन, छाइ हे जुन पराइ मन्ना का हे ? रिटुक जलमलक् रोज से जो हेल्हा रहिन हेल्है रहगिलिन ।
स्कुल छोर्टिकिल कम्लह्रि जीवन जहाँ डाइ ना बाबा । स्कुल पहर्ना बैसमे आनक घर कर्टि ठिक्के । डिन अस्टे चल्टि गैलिन । रिटु उहै बैसन हुइलिन ओ काम कर्टि रहल मे ओहेरे से भोज कर्वा डेलिन । कहकुटे बा छाइक जरम फुटल करम । गोरु भैंस बड्ले हस कबु कहाँ कबु कहाँ खडेर्टि रना । अनौबा छाइक जलम ले ना । जौन छाइन से छावा जलमट उहे छाइनके कौनो मोल नै ।
भोजके पाछे रिटुके जिन्डगी आउर डुःखमे बिटे लग्लिन । अनारि जिउ एकटे भारि कर्रा काम करे पर्ना । रिटुके शरीर टुटगिल रठिन । ना मजासे खाइ पैना, ना मजासे सुटे पैना । पर्हल रलेसे नोकरी जागिर मिल्जिटिन बिचारि रिटुहे । घरे मजासे पर्हे नै डेलिन । छोटिमे भोज करडेलिन ओ छोटि उमेरमे डाइ बने पुग्ठिन । गोस्या विडेश,यहोर अनारि मे लर्का जल्माके भारि डुःख पैठि रिटु । करहि का बिचारि डाइ बाबा पालक डरे, पर्हाइक डरे हलि भोज कैडेलिन । एकओर घरक मनै कामक लाग कचकच कर्ना । रिटुहे काम करु कि लर्का सहेरु हुइन ।
रिटु अपन जिन्डगीहे समझके बैठल आँस गिराइ पुगी । अपन उमेरके लवण्डिन स्कूल जाइट डेख्के रमाइल डेख्के । टर अपन जिन्डगी हेरिन एकठो डाइ बनल ।
रिटु बाबा डाइके व्यवहारहे सम्झठिन । अपन पर करल भेडभाव । काकरे छाइ जाट अत्रा हेलहा । आखिर छाइ फेंन टे सन्टान हो । छाइ पर्हि कलेसे छावाके बराबर काम करे नै सेकि का ? जरुर करे सेकि । छाइक फेन टे हाँठ गोर रठिन बोले सक्ठै, आवाज उठाइ सेक्ठै । आखिर छावाहे ओ छाइहे जलम डेना एकठो डाइ टे हो ना । उहे छाइ सारा घरके परिवारके हेरचाह कर्ले रहठ । बाल बच्चासे लेके अपन श्रीमानके हेरचाह सम। टबु फेंन काहे छाइन हे हेलहा करैना । छाइके अत्रा ज्याडा जिम्मेवारी रठिन कलसे छाइनहे छावासे ज्याडा शिक्षा डेह पर्ना हो । मने उहे छाइ हे टरे गिरैना कर्ठै । छावा हे ढेर पर्हैना ओ पह्रल पटोहिया लानि कैके । मने छाइ हे पह्राइक डरैना । का छाइ पह्री कलसे पह्रल डमड्वा नै पाइ का । अगर छाइ पह्रि शिक्षिट हुइ कलसे डाइ बाबाहे पाले नै सेकि का । अपन सास ससुरवाके रेखडेख करे सेकट कलेसे अपन जन्म डेना डाइ बाबाहे पाले सेकट कैक । अस्टे बाट रिटु अपन मनेम खेलैठिन । रिटुके जिन्डगी अस्टे बिट्टि रठिन ।
ओहोर रिटुके डाइ घरक काम करे पर्ठिन टे रिटु हे सम्झठिन । टर रिटु घुमके उहे घरमे अइना असम्भव रहिट । कुछ बरस पाछे रिटु के भैयाक् भोज कर्ठिन ओ पटोहिया लन्ठै । कुछ महिना मजै चल्ठिन बोलिचालि मजा खानपिनमे मजा । मने जस्टक डिन बिट्टि गैल ओस्टक रिटुक् डाइ बाबाके डशा खराब हुइटि गैलिन । रिटुके भौजि पर्हल टे रहिन मने सास ससुरुवक प्रटि चासो नै रहिन । अपन गोस्या के ज्याडा ख्याल करिन मने सास ससुरवक नाइ । पटुहियक् असिन व्यवहार डेख्के डाइ बाबा अपन छाइ रिटुहे सम्झना करिट । याड आइन रिटुके करल काम ओ सेवाके । रिटु रिटु अनगुट्टि उठ्के खाना बनैना करि । घरक सारा काम उसर्ना करी । डाइ बाबा रिसैलेसे फेंन जलम डेना डाइ बाबा हुइटै कैके आडर सम्मान करिन । सेवा सुसार करिन । रिटु पर्हे नै पैलसे फेन काम कर्नाहा रहिन । रिटुके डाइ बाबा सोच्ले रठिन कि पटोहियाफे छाइक जस्टे मैया करि ओस्टे व्यवहार करि, सेवा सुसार करि मने ओसिन नै पैठैं । पटोहियाके मैया छावासे किल रठिन । रिटुक् डाइ बाबा अपन छाइ रिटुहे करल व्यवहार समझके पस्टैठैं ।
जब रिटुके डाइ बाबा टेक्निमे आजैठा टब चेट खुल्ठिन । छाइ कलक का हो । छावाके बहुट आशा रहिन कि छावा हम्रहिन पालि, हेरचाह करि कैक मने छावा पटोहियाहे किल हेरे पुग्ठिन । छावा अपन जन्नि लेके अल्गे रहे लागठ, डाइ बाबाहे छोर्के डुनुजे एक होजिठैं । एक डोसरके ख्याल करे लग्ठै । टब डुनु बुर्हिया बुर्हुवाहे चेट अइठिन । रिटुहे हम्रे बहुट नै मजा व्यवहार कर्लि । पर घर जैना जाट हो कैक पर्हे फेन नैडेलि । पल्लक सोरठ कैक छोटिमे भोज करडेलि हमारठन रहे टे हमार सेवा सुसार करे । बिचारि रिटुहे ना मजासे खाइ डेलि ना लगाइ । नङ्गे गोरा स्कुल जाए बिचारि रिटु । छावा हम्रहिन पालि, हेरि कैके बोर्डिङ्ग पर्हैलि टस्टे हम्रहिन एकठो बुक्रम करा डेहल । बिचारि रिटु बहुट डुःख पाइल । अनारिमे लर्का पाके आङ्ग टुटगिलिस । डोंगिल होगिल । मजासे पर्हैटिटे भारि मनै बन्ने रहे । गाउँ समाजमे नाउँ उठैनै रहे । डाइ बाबनके नाउँ चलैने रहे । डाइ बाबनके इज्जट बचैने रहे । कटि डुनुजे पालिक पाला हुक्का सुर्कटि गुनमुनैठैं ।
कहाइ बा हरचिज कर्ना समय रहठ । मौका आइट ओ जाइट मने घुमके नै आइट । समय हरचिज कर्ना मौका डेहठ मने हम्रे ढिलढाल कर्लि ओ अल्छैलि कलसे पाछे पस्टैना ढन्ढा होजाइठ । ओराइल ।
बिस्रल डग्गर
साँझ परट ढिरे ढिरे अंढारफेन हुइटि जाइट । राट छिप्टि जाइट । गाउँ सुनसान हुइटी रहट । डगरमे नेङ्गना मनैनके कमि हुइटी रहट । जहोर टहोर कुक्कुरके भुकाई ओ रुवाई सुन परट । बनुवा ओर गिडारिनके बगाल बोल्ठै । सब मनै अपन-अपन कोन्टि ओर लागजैठैं ।
सपना फेन अपन सक्कु काम उसारके सुटना कोठा ओर लग्ठिन । पठ्री बिछाके नम्मा सास लेटी पठ्रिम सुटलि । एक ओर जुगुर-जुगुर बर्टी रहल डिया हे हेर्टी रही सपना । आँखी भर आँस भरगैल रहिन । डुनु आँखिक कोन्वा ओरसे आँस बहटिहिन । बरे गहिर सोचमे डुबल रही सपना । सायड बिटल डिनके याड आइटहिन सपना हे । सुनसान कोठम् पठ्रिम अकेली एहोर ओहोर करोट लेहटही । अपन सुटल कोठामे चारुओर नजर घुमाईटही । घरी अपन सुरमे घुम्टी रहे । आढा राट होजाइट सपनाहे निड नै परठिन । सपनाके नजर किरणके फोटो मे परठिन । सपना झलझली सम्झठी किरणके सँग बिटाईल डिन ओ अपन बचपनके याड ओ जवानीसे लेके किरणके सँग रहल ओ विछोड हुइल सम्म डिनके ।
सपना सुखी परिवारमे जन्मल लौन्डी रठि । डाई बाबा डाडु भैयनके मायामे हुर्कल । परिवारमे अकेली बहिन्या रही । कुछ कमि नै रहिन सपनाके । ज्या चहलेसे सब चिज पुरा कैडिन सपनाके । डाई बाबा डाडु भैया सबजे यह सोचिन कि एक डिन टे पराई घर चल जाई सपना । जब सम बा टब समकिल टेहो, इही हे डेना ओ खुशी करैना । पाछे कब मिलि कैक सपनाके हर माग पुरा करिन । जहाँ घुमे जैना मन लागिन उहै जाई पैना । बहुट रमाइलो रहिन जिन्डगी सपनक् ।
सपना डेख्नौस बरे सुग्घुर रहिन । सब चिज मिलल ठिक्के परल जीउ, साँवरमे सवारल रही सपना । कजरार आँखी हेर्टी सुहावन । सुन्टि मजा लग्ना बोली नरम मिठास । हाँस हाँसके बटवइना हुँकार चाल टे झनै मजा रहिन । सपना हे डेख्के हुँकार रुपके प्रशंसा करुइया के कमी नैरहे । सबजे सपना हे डेख्के खेल्वार करिन । सपनाके रुप रंग चालसे सब डिवाना होगिल रहिट । सपनासे सँगे बैठके बाट कर्ना खैना घुम्ना चाहिट हर कोई । बैस भरल जवान सपना सारा जहन अपन उप्पर मोहिट कैले रही । सपना विपरिट लिङ्गिनसे आकर्षिट होके ज्याडा समय ओइनसे बिटाई लग्ली । यी सब क्रियाकलापसे सपनाके घर परिवार सपना बिगरटा कैके हुँकार भोज किरणकेसँग करडेलिन । टर सपनाके बानी नै छुट्लिन । किरण सपनाके चाली बानी जानके फेन माया करके श्रीमानके असल भूमिका पूरा कर्ना सोंचिट । कबु काल टे यी सब डेख्के किरणहे मजा नै लागिन ओ सपना हे सम्झैना करिट टर सपना रिसाके जवाफ घुमैना करिट मै का करटु मही पटा बा, मही अपन जिन्डगी खुड बनैना बा । मही स्वटन्त्र जिना अढिकार बा कैक रिसाके जवाफ डेना करिट ।
किरण सपनाके बाट क्रियाकलाप हुँकार चाली बानी से कपार झुक जाइन, लाज करैले रहिन । घरे आके सपना हे सम्झैना प्रयास करिट, उल्टै सपनासे डुईचार बाट कहुवा मिलिन । किरण कुछ करे नै सेक्के चुपचाप कोन्वामे जाके रोइना करिट ।
डिन अस्टे बिट्टि रहिन किरणके । सपना अपन डुनियाँमे मोजमस्टी कर्टि नेगटहिन । बिहानिक निकरल साँझके घरे अइना । घरक सारा काम किरण कर्ना करिट । खानपिनसे लेके भन्सा कर्ना ओ सपनक् ओ अपन लुग्गा ढोइनासे लेके घरक सारा काम किरणके हाँठेम रहिन । सपनाहे केवल अपन ख्याल रहिन । अपन सुटना कोठा हे सजैले रही । कोठक चारुओर अड्रिक अड्रिक फुला, टेबुलमे अड्रिक अड्रिक ब्राण्डके क्रिम ओ श्रृंगारके सामानले भरल रठिन । डैजाहा अपन सुट्ना पलङ्ग ओहरना बिछौना अलग रहिन । एकओर किरण उहै बिछौना उहे ओहरना, टुटल खटियाके बिस्टारा रठिन ।
सपना किरणके सँग रहे नै सेक्के एक राट अपन सुन्डर घर अंगना डेउटा जसिन गोसिया किरणहे छोरके निकर गैलिन ओ डुर शहर बजारमे डेरा लेके बैठे लग्लीन । ओ होटल खोल्के बैठगिलीन । होटल मजा चल्ठिन, खैना पिनासे लेके सबचिजके मजा व्यवस्ठा रलेक कारण ग्राहकनके भिराभिर रठिन होटल । सपना खैना पिनासे लेके अपन रुपरंग अपन जवानीके फेंन व्यापार कर्टि गैलिन । सपना केवल मोजमज्जा, रुपैया पैंसामे रमैना चहली ।
डिन, महिना, साल, डुई साल कर्टि बहुट वर्ष बिट गैल । समयसँगे सपनाके उमेर फेंन छिप्टी गैलिन ओ जवानी ढल्टि गैलिन । रुपरंग सुन्डरटाके कमी हुइटि गैलिन । सायड यहे कारणसे सपनाके व्यापार फेंन कम हुइटी गैलिन ओ सपनाके सुन्डरटाके प्रशंसा फेंन कम हुइटी जाइटहिन ।
असिन समयमे सपनाके मनेम निराशा नै अइना टे बाट नै हो । जवानीमे ग्राहकनसे भरल रना होटल आज काहे सुनसान ? खैना पिना सब उहे बा केवल मोर छाला पुरान होगैल । ऊ डिन मोर होटलके खैना पिनासे फेंन मोर रुप रंगके कारण मिठ लागिन । आप सब टीट होगिलिन कि । कटना स्वार्ठी मनै बटैं यी डुनियाँमे कैक अनेक बाट सपनाके मनेम खेल्ठिन । अस्टे बाट मनेम खेलैटि सपना के हर राट बिटि्ठन ।
सपना बिटल पलहे सम्झठी ओ एहोर ओहोर नेंगठि । सिसाके आघे बैठके अपन सारा रुपरंग हेर्टि । जवानीके रुप ओ आजके रुप बहुट फरक भेटैठि । सपना अपन हरेक अंगहे छम्टि जवानीके रुप हे सम्झठी । ऊ डिन स्याउ जसिन गाल कहिन उहे आज नै रहिन । जोन हेर्टि सुहावन आँखी रहिन आज नै रहिन । रेश्मी भुटलाके चमक आज नै रहिन । हेर्टि सुहावन लगना जीउ आज सारा हेरागैल रहिन । अनेक सोंचाइ अइना करिन जिन्डगी कसिके कटैना कैके ।
सपना जब अपन जीवनहे घुमके हेरि टे अप्ने आप हे जिन्डगिक डगर बिस्रा के बरे डुर पुगल महशुस कर्ठिन । जिन्गीमे सब चिजके अभाव हुइल महशुस पैठिन । ना श्रीमान् ना टे बाल बच्चा । जिन्डगी सुनसान लागिन । अप्ने आप हे पूरा खाली लागे लग्लिन सपना हे ।
बहुट अइलिन सपना हे अपन डिलके रानी बनैनावाला । बहुट अइलिन जिन्डगी भर साठ डेहम कनावाला टर ऊ बाचा टे का उ मनै समेटके पटा नै हुइहिन ।
सपना उहे किरणहे सत्य मैया ओ गोसिन्याहे करे पर्ना भूमिकाके याड अइठिन । झलझली किरणहे सम्झठीम उ डुनु गालेम आँस बहगैल रठिन । किरण प्रटि करल नै मजा व्यवहार समझके सपना मुह फोरके रोइ पुग्ठिन । सपना एकहोरो कवाके अपन किरणके याड करे लग्ठिन । सपना सारा जवानी व्यापारमे बिटैले रहिन । सपना बरबरैठिन, सारा डुनियाँ स्वार्थी बा सब कुछ बेच्नु टर उ मनै कहाँ हेरा गौलै । कोई पटा जटा नै हो । मही माया करुया मही डुलही बनैना बाचा करल मनै कहाँ गिलैं ? सपना यी सब बाट समझके रोइना कर्ठिन ।
सपना अपन डेउटा जसिन गोस्याहे ढोखा डेके, छल करके राटके सुटुक्क छोरके घरेमसे निकरके गैलक राट समझलिन । निर्डोष किरणहे करल व्यवहार समझके टपटप आँश गिराई पुग्लिन । कहाँ हुँइही किरण बिचारा किरणहे बिना कारण डोष लगैना करु । गल्टि सारा मोर रहे अपन श्रीमान् हे चिन्हे नै सेकल रहुँ । जे घरक मुल खुँटा रहे जे मोर जिवनके अर्चन रहे, उहि हे मै कौनो मोलके नै ठन्नु । आज मै जीवन के सिमा नहाङ्गके अत्रा डुर पुग्गैनु । अपन इज्जट बेचढर्नु । अपन सारा जवानी बेचढर्नु । मही जीवन भर साठ डेहम कहुया, मोर सँग राट बिटैना, सु:ख डुःखमे साठ डेहम कहुइयन सब हेरा गैलाँ । अपन मनै फे महीसे डुर होसेक्लाँ । मै अपन ईच्छा, अपन मोजमज्जा के लाग आघे पाछे नै हेर्नु । आज मै यी अवस्ठामे पुगल बटुँ । यडि मे अपन डाई बाबाके कहल मन्टु अपन गोस्यक कहल मन्टु टे आज मही यी डिन डेखे नै परट । कसिके डेखाउ अपन मनैन हे अनुहार कसिक बोलु कटि सपना अपन सारा गल्टिसे पस्टैठिन । असिन शहरमे कहाँसम बैठेसेकम, ना कौनो नाट ना कौनो अपन मनै ।
सपना जिन्गीमे अकेली महशुस कर्ठिन । यह क्रममे हुकिन हे अपन सँगे पह्रलक बहुट मिल्ना संघरियाके याड अईलिन । ऊ संघरिया बरे मजा, मिल्सार, नम्र स्वभावके संघरिया रहिन । सँगे रना, मनक सु:ख डुःखके बाट साटासाट कर्ना, खेल्ना, घुम्ना खैना, सुटना करिट । उ हे संघरियक कहल बाट सपनक् मनेम घुमे लग्लिन “सपना जब जिन्डगीमे हार खैबो या जिन्गी टीट लागी, डुनियाँ टुहिन घृणा करी या ईन्कार करी कलेसे जिन्डगीमे अकेली महशुस कर्बो कलेसे हम्रहिन प्रेम करुइया संसारके ज्योटि ख्रीष्टहे अपन जिन्डगीक साहारा बनालेहो । जे हमार जिन्डगीक ख्याल करट । उहाँके प्रटिज्ञा करल बचनमे विश्वास करहो । जहाँ जीवन बा, पाप क्षमा बा, माया नै माया बा, शान्टि बा, अनन्ट जीवन बा ।” इ कलक बाट सपनाहे झलझली याड अइलिन ओ आंखिक पल्कामेसे टप टप आँशक बुँडा गिराई पुग्ली ।
सपना अपन मनहे घुमैली ओ अपन जीवनहे लावा बनैना सोंच बनैली । फेन से लावा जुनिक यात्रा शुरु कर्ना अपन घर, मनके मन्डिर हे फेंन से सजैना सोंच बनैठिन सपना । मै उहै जैम जहाँसे मोर जिन्डगीक शुरुवाट हुइल रहे । मै घुमके उहै जैम ओ फेन से अपन लावा जुनिक् शुरुवाट करम । मै अपन श्रीमानके डासी बन्के रहम । जिन्डगी भर उहाँके सेवा करम, अपन डिलसे सारा मनसे गोस्याहे पूरा माया डेम कहिके सपना अस्टे अस्टे बाट सोच्टी राटके निडा जैठिन ।
उ झसक्ठिन । उहे किरणकेसँग रलक, फेनसे किरणकेसँग भेट हुइलक ओ अपन मनक बाट सुनैलक सपना झसक्के जग्ठी टर अप्ने आपहे अकेली पैठी । सपना गालेम बहल आँश पोछ्टी किरणके माया करल कल्पना कर्ठी । आज किरण मोरसँग रटै टे कलसे मोर अँगालोम रटैं । मही माया कर्टै टर आज बिस्टारा सुनसान बा । डेउटा जसिन श्रीमान् नम्र स्वभावके अपन काममे लागल रना । टर मै हुकहिन कौनो मूल्यके नै सम्झनु । कत्रा माया करिट उ किरण मही टर मै हरडम इनकार करटि गैनु । हुँकार बोली मही मन नै परे, हुँकार चाल मन नै परे टर किरण मही डिलसे माया करिट । मोर चाहना फरक, सोंचाई फरक रहे । टर मै किरणके ठन जैम ओ अपन सारा भुलके माफी माँगम । हुँकार पाउ छुके हुँकार श्रीमटी के हकडेना मौका मागम । अपन दिलमे हुकिन सजैम कैक सपना राट भर करोट लेलेके राट बिटैठी ।
सपना किरणके रना ओ हुकारे सँगे सारा जिन्डगी बिटैना कल्पना कर्ठी । फेन से लावा घर सुखी परिवार एक शान्टि परिवार बनैना डुई सन्टान ईश्वरके बरडान कहे हस छाई ओ छावाके जलम डेना सोंचे पुग्ठी । एक नमूनाके परिवार शुरुवाट कर्ना । एक असल पटनीके जिम्मेवारी पूरा कर्ना ओ एकठो असल डाईके भूमिका पुरा कर्ना सोंचठी । सपना झस्कठी ओ हडरबडर उठ्ठी जैसे कि ऊ घरेम कुछ हुइक लाग बा जसिन । सपना अपन शरीरके सरसफाई कर्ठी । अपन लुग्गा ओ सारा सामान झोलामे भर्ठी ओ टयार होजैठी । अपन जलम स्ठान ओर । लावा खुसी, लावा उमंग छाईल जसिन रठिन सपनाके । अपन गोस्या किरणसे भेंट कर्ना ओ अपन जन्मभुमि ठाउँ, अपन हुर्कलक ठाउँ जाइटही सपना । ऊ ठाउँ जहाँ अपन हुर्कलक खेल्लक ठाउँ जाईटही सपना । उहे ठाउँ जहाँ जवानीके प्रेमके शुरु हुइल रहिन । जहाँ खुशीके बहार रहिन सपनाके । उहे ठाउँ जहाँ सखिया, मघौटा, छोक्रा नाच होए । उहे ठाउँ जाईटही सपना जहाँ पहिला प्रेमके शुरुवाट हुइल रहिन । उहे ठाउँ जाइटही सपना जहाँ अपन सारा संर्घयन छोरके निक्रल रही । सपना उहै घुमके जाईटही जोन ठाउँ हुँकार किरणके सँग डुलही बनके सजल रही, उहे घर, उहे अंगना, उहे डवारमे फेनसे पैला टेके जाइटही ।
कबु बिस्रैहि नैसेक्ना रहिन सपना के ऊ भोज । कत्रा रमाइलो क्षण ऊ बेलाके, झलझली आँखीमे आइटहिन ऊ याड सपनाहे । उहे किरणके लौलि डुलही बन्के बैठना कल्पना बोक्ले रही सपना । ऊ वर्षौसे बैठल ठाउँसे बिडाई लेके अपन सारा सामान उठाके अपन लावा जिन्डगीक यात्रा शुरु कर्ली ।
सपनक् मनेम् उहे डिनके याड आइटहिन जोन डिन अपन गाउँ घर छोरके गैल रही । सोंचटही कसिन हुई मोर जन्मल गाउँ, कसिन हुई मोर रमैलक, खेल्लक ठाउँ । सपनाके डिलमे छटपटि परल रहिन ।
जब सपना अपन जन्मल ठाउँ, अपन खेल्लक ठाउँमे पैला टेक्ली ओ साराओर नजर लगैली, सब कुछ बडलगिल रहे, आप पहिल जसिन गाउँ नै रहे । फरक मनै फरक वाटावरण फरक होगिल रहे । सपनाके रमैलक खेल्लक ठाउँ फे फरक होरठिन । सपना हुकिन अपन हुर्कलक् रमैलक मैया प्रीटिक बाट करलक् ठाउँ डेख्के झलझली बिगटके याड आइटहिन । पहिले चैनार लग्ना गाउँ आप सब सुनसान होगैल रहिन । पहिले ठारु पहिरन मे सँपरल बगाले बगाल लौन्डिन नेगिट आप ऊ ठारु पहिरन हेरागैल रहिन । सब फरक होगिल रहट गाउँ ओ मनै फेंन ।
सपना जब अपन श्रीमान्के घर पुग्ठी टे हुँकार सारा सोंचल बाट पल भरमे टहसनहस होगिलिन । जोन सोंचके आइल रही सपना ठीक उल्टा होजिठिन । जोन घरहे अपन बसेरा बनैना सोच्ले रहि ऊ घर सपनाके सोचल जसिन नै रहिन । जोन घरेम डुई प्राणीके बास रहे । जोन अवस्ठामे सपना घरहे छोरके गैल रही उसिन नै रहिन । घरक छँपरा ठाउँठाउँ उजरल भित्ता ठाउँ ठाउँ भस्कल रहिन । डवारिम टाला मारल उहे फे बहुट पुरान होरलेरहे टालक् । यी सब डेख्के सपनाके हृडय टक्रा टुक्रा हुइ पुग्ठिन । अपन सारा सामान ढर्टीम गिराडेली ओ उहे ठाउँमे बैठगिली । आँखिमसे टपटप आँश गिरे लग्ठिन । सपनाहे सारा डुनियाँ घुमेहस लग्ठिन । एकघचिक सपना उहै बैठके खोप रोइठी । अपन सोंचल जसिन नै पाके ओ अपन विगट के डिन हे समझके ।
सपनाहे विगटके सारा याड आईटहिन । एक डुई करट करट छिमेकी घरक मनैनके भेला होगैल रहिन । उहाँक मनै सपनाहे चिन्हे नै सेकटहिट । काकरे कि सपनाके रुपरंग पहिलकसे फरक होगिल रहिन । गाँउक जीवन ओ शहरिया जीवनके रहन सहन फरक होगिल रहिन । भर्खर १७–१८ के उमेरमे घर छोरके गैल रही सपना । ओ ढेर वर्ष पाछे गाउँमे अइलक कारण चिन्हे नै सेकटहिन । यह करममे पाछेसे एकठो आवाज सुन्ली सपना “बाबु सपना” कना आवाज । सपना झसक्के हेर्ली टे गाउँके रामे डाडा हे डेख्ली । सपना रोइटी पुछ्ली डाडा यी मै का डेखटु । किरण कहाँ ? डाडा मोर किरण कहाँ गैला ? रामे डाडा डुःखी हुइटी कलिन बाबु सपना टोर घर छोरके गैल पर किरण बहुट रोइल । पागल हस करे । पाछे पाछे जहाँ टहाँ टोर नाउँ लिख्टी नेगें । जाने खाना खाए कि नाई ऊ । टोर गैल पर एक–डुई बरस रहल टबसे जाने कहाँ गैल पटै नै हो ।
सपना चिल्ला चिल्लाके खोपसे रोई लग्ली ओ किरणहे खोजके लान डेऊ कैक रोइठी । टर के जाई खोजे, कहाँ जैही बिना ठेगानके । सपना घरक डवारिम् लगाइल टाला टुरे कठिन । टब गाउँक मनै टाला टुरके खोलडेठै । जब सपना घरेम पेल्ठी टे सारा भित्तामे सपनाके नाउँ किल लिखल डेख्ठि । जहोर हेर्ठी ओहरे सपना, सपना, सपना केल लिखल । यी सब डेख्के सपनाके आँश नै रुकटहिन । सपना हे आप पटा चलटहिन कि किरण कत्रा मैया करिट । सपनाके घरेम छोरके गैल बाँकी सामान सजोक लगाके ढैडेले रहिन । सपना सारा घर घुम्ली आँखीभर आँश लेके कवाके एहोर ओहोर हेर्टिरहिन । सपना हे बिटल डिनके याड झलझली आइटहिन । उहे घरेम डुलहीके श्रृंगारमे सजल ओ कोमल पैला टेक्के उहे घरेम् प्रवेश कर्ले रही सपना । डेउटा जसिन पटि भेटैले रही सपना टर आज ऊ श्रीमान् हे गुमाई पुगली ।
सपना घरक कोन्टिमे घुम्ठी, बहुट फुहर ढुरेढुर मकरनके झोलेझोल होरठिन घर । वर्षो से बिना मनैन्के घर । सपना अपन घर लिपपोट पारके सुग्घर बनैठी ओ अपन प्यारो पटि किरणके याड कर्ठी । सायड आज किरण रटै कलेसे कत्रा खुशी क्षण रने रहे कटि विस्टारा मे अकेली एहोर ओहोर करोट लेके राट बिटिठन । सपना सोंच्ठी आज किरण रटै कलेसे राट भर अपन मनक बाट सुनैटु । अपन भुल गल्टि स्वीकार कर्टु । हुँकार पाउ परटु ओ रो रो मनक पिराके आँशु हुँकार पाउमे बहैटु ।
सपनाके नजर भित्तामे झुलाईल भोजक डिन खिचल फोटु मे पर्ठिन । डुनु जे भोजहा पहिरनमे सजल फोटो डेख्के फेन से सपना हे भोजक डिनके याड आजैठिन । एकओर जुगुर जुगुर डिया बर्टी रहट सपना खटियामे अकेली कबु एहोंर, कबु ओहोंर करोट लेटी रठी । सुनसान राट कोई चिजके आवाज अइलसे सपना झस्कना करीन, कही किरन टे ना आगैला कैके । सपना उठ्के एहोंर ओहोंर हेर्ना करी टर किहु फे नै डेखी । सपना आँखी भर आँश लेके जाने कब निडा जैठी ओ किरणके सँग बिटाईल दिनके सपना डेखे लग्ठी । सपनामे किरण हे घरे आइल ओ अँगालोम लेहल, माया करल ओ मिठ मिठ बाट करल डेख्ठी ओ अपन सारा गल्टिके माफी मागल डेख्ठी । किरणके पाउ परके रोइकल डेख्ठी । रमाइलो जिन्डगी, सुखी शान्टि परिवार अपन कोखमे किरण सुन्डर बच्चा खेल्लक ओ किरणके सँग रमैलक हस्लक सपना डेख्के झसक्के जग्ठि ।
जब सपना जग्ठी टे मुर्गा फे भिन्सार हुईलक आवाज करट । सपना आँखी खोल्ठी फेन अकेली भेटैठि । टर अपन बाँकी जीवन ओ अपन डिलके राजा श्रीमान् किरणके अइना डगर हेर्टी घरक काम उसर्ना ओर लाग्जैठी । सपना राट डिन किरणके अइना अस्रामे हुँकार अइना डगर हेर्के लावा घर परिवार बनैना बाचा करके जिन्डगीक सु:ख डुःख सबसे सामना करके जीवन गुजारा कर्टी रठी । ओराल ।
ठकौनि
फोटुक एल्बम बिल्टैटी एक-एक फोटु हेर्टि रठैं । जोन एल्बम हुँकार संग घुम्लक् रमैलकप् हँस्लक बेलाके मेरमेरिक फोटुले भरल रठिन । फोटु हेर्ठै ओ उहे अपन डिलके रानिक् झलझली याड अइठिन रोशनहे ।
फोटु हेर्टि जैना क्रममे नजर उ फोटुम पर्ठिन । पूर्णिमा अपन संघरियक भोजेम गैल बेला संघरिया डुल्हिकसँग बैठके खिचाइल फोटु । यहे फोटु रोशनहे ऊ बेलाके याड कराडेथिन । जोन डिन पूर्णिमा डुलही सिंगारमे भोजमे आइल सारा मनैनके आघे टिका लगैना क्रममे ढर्टीम ढले पुग्लिन । उ घटनासे भोजहा घर उ गाउँ सारा खहल बहल होगिल रहे । उ डुःखड भयानक घटनामे सारा गाउँ सुनसान हुगैल रहे । उ बेला पूर्णिमा बिच डगरमे अपन डम टुलडेलीन । पूर्णिमा हे उ घरसे बिडाइ करटिहिन टर पूर्णिमा यि डुनियाँसे बिडा होडेलीन । आखिर काकरे पूर्णिमा अपन जिन्गीक अन्ट कर्लिन टे ? हर व्यक्तिनके मनेम् इहे प्रस्न आइ पुग्लिन । रोशन पूर्णिमाहे सम्झटि एल्बमके फोटु सुहरैटी आँखी भर आास लेले फोटु हेर्टि रठैं । रोशन पुर्णिमासे छोटी रहलमे खिंचल फोटु हेर्के उ बेलक याड अइठिन जबेकि स्कूल जाइबेरिक छ साट वर्षके उमेरमे खिचल फोटु रठिन ।
पूर्णिमा ओ रोशनके घर डगरमे वारपार रठिन । एक ओरसे पूर्णिमा संपरके निकरना करिट टे एक ओरसे रोशन, डुनुजे सँगे स्कुल जैना करिट । हँस्टि रमैटि स्कूल पुग्ना करिट । सँगे एक्के कक्षामे पूर्णिमा ओ रोशन डुनुजे पास हुइटी गैलाँ । रोशन पहिला हुइलेसे पूर्णिमा डोस्रा हुइन । रोशन डोस्रा हुइलेसे पूर्णिमा पहिला हुइना । अस्टके डुनु जहनके पह्राइ मजा हुइटि जैठिन । पूर्णिमा ओ रोशन जवान हुइटि गैलाँ । एकठो मिल्ना संघरिया रहिट । टर मनक भित्तरसे एक डोसरहे चहिट टर कहे नै सेक्ले रहिट । रोशन ओ पूर्णिमा के चाल स्वभावसे सब जहन लागिन कि यि डुईजे एक डोसर हे मैया कर्ठै । टर पूर्णिमा ओ रोशन एक डोसरहे कहे नै सेक्ले रहिट । छोटेसे सँगे स्कूल जैटि जैटि जवान अवस्ठामे पुग सेकल रठै टर अपन मनक् बाट कहे नै सेक्लेरहिंट । स्कूलमे सँगे, डगरमे सँगे, घरे सँगे कामेम सँगे जहाँ फेन सँग रठैं ।
डिन अस्टे बित्ती जैठिन । यी सब डेख्के पूर्णिमाके डाइक कानेम मनै फुके लग्ठिन । पूर्णिमा फलानासे खेलल कैक । यि बाट सुनके पूर्णिमाक् डाइ महाजोर रिसैठिन । ओ पूर्णिमाहे रोशनके सँग स्कूल जैना मे रोक लगाइ लग्ठिन । टर पूर्णिमा एक कान सुनके औरे कान उराडेठिन । पूर्णिमा रोशनहे यि बाट नै बटाइन कारण रोशनहे डुःख लग्हिन कैक । पूर्णिमा अपन डाइसे पिट्वा पाइन मने रोशनहे नै बटाइन । रोशन के मन डुखैना नै चाहिन । मनमे रोइलसे फेन ओठमे मुस्कुरैना करिन पूर्णिमा । पिट्वा पाके शरिर सोम्लै सोम्ला रलेसे फेंन रोशनके सामु अपन मुह नै खोलीन ।
पूर्णिमा ओ रोशन खेल्ठै कैके सब हल्ला रहिन टर पूर्णिमा सोंची रोशन मही मन परैठैं कि नाइ ! ओ रोशन फेन यह बाट सोच्ना करिट । एक डिन सुन्लै पूर्णिमाहे डाइ बरेजोर पिट्ले बटिन, रोशनसे खेल्ठे कैक । रोशन यि बाट सुन्के बहुट डुःखी हुइलैं । कारण पहिलचो सुन्ठैं पूर्णिमा अपन संग खेल्लक कारण पिट्वा पैलक । रोशन पूर्णिमाहे बहुट चहठैं । रोशन जन्ना चहठैं का जत्तिके पूर्णिमा महि चहठि ! पूर्णिमा ओ रोशन स्कूल जाइबर फेनसे भेट होजिठैं । उहे डगर उहे अंगना एकओरसे पूर्णिमा निक्रठी टे एक ओरसे रोशन । पूर्णिमा ओ रोशन के भेंट हुइठिन । पूर्णिमा के अनुहार निरास रहिन औरे डिनसे फरक रठिन । ओ रोशन के फेन औरे डिनसे फरक रठिन । रोशन पूर्णिमासे जन्ना चहठैं । सँगे स्कुल गैलक ओ महि से खेलठ् कैके पिटवा पैलक ।
रोशन पूर्णिमासे कठैं “पूर्णिमा टोहाँर डाइ टुहिन पिट्ली सुन्नु । टुँ महिसे खेल्ठो, महिसे लागल बटो कैके ना । पूर्णिमा डुःखी मढुर अवाजमे कली हाँ रोशन रोज पिटट ओ गरियाइट । ओकर सँग ना जाइस, ना नेगिस कैके । टै उहिसे भोज करे नै पैबे । टोर लवण्डा औरे बा उहे लवण्डाहे लेहे परि कहट । पूर्णिमा डर्ड भरल आवाजमे कठि । रोशन पूर्णिमाके आँखमे आँख मिलाके कठि पूर्णिमा का टुँ महि चहठो ? पुर्णिमा आँस भरल आँखिले हेर्टि कठिन हाँ रोशन मै टुहि चहठुँ केवल टुहिन । छोटेसे टुहिन मन पराउँ टर कहे नै सेकु । डर लागे टुँ मोर मैया अस्विकार कर्बो कि कना । रोशन फे उहे कठैं मै फे टुहिन मन परैठुँ, टुहिन चहठुँ । टुहाँर जस्टे मै फेंन कहे नै सेकल रहुँ ।
डुनुजे डगरके यात्रामे अपन मनक सुखडुःख के बाट कर्टि स्कुल पुग्ठै । पूर्णिमा ओ रोशन और ज्याडा एक डोसरके मायामे हेरा जैठाँ । स्कुलसे आइट जाइट ओ स्कूल मे सँगे । यि डेख्के रोशन ओ पूर्णिमा हे अलग कराइक लाग पूर्णिमाक् डाइ छुैना आउर कोसिस करे लग्लिन । कारण पूर्णिमा पेटेम रहल मे पूर्णिमक् डाइ अपन मिल्ना गोहीसे बाचा करले रहिन जे छाइ पाइ कलेसे अपन छाइ डि कैके । पूर्णिमा के डाइ यि बाजी मे हार खाइल रहिन । डुनु गोहिनके सँगे भोज हुइठिन ओ पूर्णिमाके डाइ पूर्णिमाहे जन्मैठी ओ गोही टाराहे । छाइ डेना बाचा करलक ओरसे पूर्णिमाके डाइ रोशन ओ पूर्णिमाके सम्बन्ढसे राजी नै रहिन ।
ओहोर तारा हे पटा नै रठिन । कि पूर्णिमा से हमार ठकौनी जल्मनासे पहिले हुइल बा कैके । यि बाट डुनु गोहिनहे किल पटा रठिन । जब पूर्णिमा ओ रोशन एक डोसरहे चाहे लग्लाँ यि डुईजे खेल्ठैं कना पूर्णिमाके डाइ पटा पैलिन टब जाके पुर्णिमा रोशन ओ टारा हे यि बाट पटा चल्लिन । पूर्णिमा ओ रोशन के बहुट विरोढ हुइठिन रोशनहे पूर्णिमासे अलग करैना चहठैं । ओहे बेला एक राट रोशन ओ पूर्णिमा एकान्ट ठाउँमे भेंट कर्ठै । ओ घण्टौं सम अपन मनक डुःखक बाट विछोडके डर्डनाक भाव एक डोसरहे सुनैठैं । डुनुजे बहुट डुःखी रहिट ।
पूर्णिमा रोशनके कोनामे सुटके जिन्डगीक भाग्य ओ डुर हुइ पर्लकमे बहुट डुःखी रठि । पूर्णिमा रो–रोके कटि रठि । रोशन यि कसिन जिन्डगी हो संसारमे सिर्जनासे पहिले औरेक उप्पर सौपना । औरे जहनके जिन्डगीक खेल्वार कर्ना । लवण्डा लवण्डिक इच्छा बिना जीवन जोरियाके नाट जोर्ना । हर कोइक अपन अपन चाहना रहट । हमार फेन कुछ लक्ष्य रहट, चाहना रहट । भोज कना चिज जिन्गिम एकचो कर जाइट । एक डोसरसे जिन्डगी बिटाई परट । भोज एक घचिकके नाटक करे जसिन नै हो । रोशन मोर जिन्डगीक खेल्वार हुइटा । मोर इच्छा बिना टारासे भोज कर्ना खोजटैं । टारा फेन महि नै चहठैं टर अपन डाइक ओ मोर डाइक कारण भोज कर्ना चहठैं । टर रोशन ओइने हमार खुशी छिन्के अप्ने खुशी हुइना चहठैं । हमार छोटसे रहल सम्बन्ढ ओ मैयाहे टुर्ना चाहटैं ।
अन्टमे पूर्णिमा कठि रोशन अगर टुहिनसे छिन्के जबरजस्टी औरे जहनसे भोज कर्ना प्रयास करहिं कलेसे उहे भोज मोर जिन्गिक अन्ट हुइ । यी मोर बाचा हो कैक पूर्णिमा कठी । पूर्णिमा रोशनसे बिन्टि कर्ठि अगर मोर भोजके टयारी करही कलेसे उ भोजमे जरुर अइहो रोशन, जसिक फेन अइहो । टुहिनहे अन्टिम पल्ट हेर्ना चाहटुँ । अन्टिम पल्ट टुहिनसे बोल्ना चाहटुँ । अन्टिम पल टुहिन छुना चहटुँ । यी बाटसे रोशन ओ पूर्णिमा एक डोसरके उक्वाँरमे बहुट रोइठाँ । कारण रोशन और पूर्णिमाके यि भेंट बहुट डुःखड रहिन । डुनु जहन पटा रहिन यि भेंट अन्टिम भेंट हो कैक । रोशन पूर्णिमाहे बहुट सम्झैठैं टर पूर्णिमा मनाही कर्टि गैली । पूर्णिमा कठि रोशन मोर जिना आढार केवल टुँ हुइटो । टुहिनसे कोइ अलग कराइ कलसे उ हे मोर अन्ट हो । कारण मोर जिन्डगी खेल्वार हुइटा । मै यि नियम हे टुर्के छोरम । बिना डेखल ठकौनी खैना ओ जबरजस्टी औरेक इच्छा बिना ठकौनी खाके जबरजस्टी भोज कर्ना नियम टुर्के छोरम रोशन कैक पूणिमा कठि ।
पूर्णिमा रोशनहे जिना आश डेठि । रोशन मोर कुछ होजाइ कलेसे जसिक फेन जिना प्रयास करहो । मोर ठाउँमे टुहाँर जिन्डगीमे औरे कोइ महिसे मजा अइही । महीसे ज्याडा मैया करही ख्याल करही । यि जुनीम मै टुँहार हुइ नैसेक्लेसे फेन औरे जुनिमे टुहाँर हुइ पाउँ कटि पूर्णिमा हे खोजट आपुग्ठैं । पूर्णिमाहे रोशनके सामुसे टानके लैजिठिन । पूर्णिमा नाइ मै नै जैम नाइ मै रोशनके हुँ, रोशन रोशन कैक चिल्लैने रोइठि ओ निप्चना प्रयास कर्ठि टर नैसेक्ठि । पूर्णिमा ओ रोशनहे अलग कराके छोर्ठै । जबरजस्टी पूर्णिमा हे टारासे पर्छना चहठैं । रोशन ओ पूर्णिमा अलग-अलग करुवा पाके टरप-टरपके जिए लग्ठैं ।
पूर्णिमाके भोज कार्यक्रम शुरु होजिठिन । टिकाके कार्यक्रम ढार्के भोज निप्टैना योजना बनैले रठैं । औरेओर रोशनहे पूर्णिमाके कहल बाट घरिघरि झस्काइ टहिन । रोशन अगर जबरजस्टी मोर भोज टारासे कर्ना प्रयास करही कलेसे उहे भोज मोर अन्ट हुई । पूर्णिमाहे टाराके घर पुगा सेक्ले रहिट । आज, काल्ह परौं करट भोजके डिन आजाइठ । पूर्णिमा बिन्टी कर्ले रही रोशनहे । रोशन भोजक उ डिन जसिक फेन अइहो । मैयाके कसम खओइले रहिन । रोशन पूर्णिमाके ऊ आँश बहाइल बिन्टीसे उ भोजमे उपस्ठिट हुइठैं ।
टिका लगैना कार्यक्रम शुरु रहट । पूर्णिमा डुल्हिक सिंगारमे टाराकेसँग बैठल रहि । अनुहार मलिन रहिन उडास रहि पूर्णिमा । उ टिर्छि नजरसे रोशन हे हेर्ठी । रोशन ढिरेसे भोजहा अङ्नम पैला टेक्ठैं ओ पूर्णिमाके ओर परगा सर्ठै । जब रोशन उ भोजमे प्रवेश कर्ठै टे सारा जहनके नजर रोशनके उप्पर परजैठिन । सारा भोजक मनै यि डृस्य हेर्टि रठैं । बहुट डिन पाछे पूर्णिमा ओ रोशन के भेंट हुइठिन । पूर्णिमाके आँखिम् खुशी ओ डुःखके आँस भरगैल रहिन । रोशनहे पूर्णिमा कले रहिन “रोशन अगर जबरजस्टी मोर भोज टारासे कर्ना प्रयास करहि कलेसे उहे भोज मोर अन्ट हुइ ।” रोशन पूर्णिमाके लग्गे पुग्ठैं । पूर्णिमाके ढेवर कुछ कना चाह टहिन टर कहे नै सेकटहि ।
रोशन हाठेम टिका लेके पूर्णिमाके माठेम लगैना शुरु करलैं । डुनु जहनके आँख एक डोसरसे मिलल रठिन । डुनु जहनके आँख आँसले भरल रठिन । डुनु जहनके ढेवर कुछ कहक लाग कुलबुलाइ टहिन । मनके भित्तर हजारौं शब्ड अँटाइट नै रठिन । पूर्णिमा ढिरेसे ‘रोशन’ कठि । रोशन फेंन पूर्णिमा बाहेक कुछ कहे नै सेक्ठैं । रोशन ओ पूर्णिमा एक डोसरहे हेर्टिक हेर्टिक रठैं । पूर्णिमा कले रहि “रोशन मै टुहिन अन्टिम पल हेर्ना चहठुँ अपन मन भरके । अन्टिम पल बोल्ना चहठुँ ओ टुहाँर आवाज सुन्ना चहठुँ । अन्टिम पल टुहिनहे छुना चहठुँ । रोशन ओ पूर्णिमा, डुनुजे टिका लगाइक लगा कर्ठै ओ पूर्णिमा अपन कहल जसिन कर्टि रही यि सब डृश्य से ओ डुई जहनके मैयाँसे अचम्म हुइ पुगल रठैं ।
रोशन जस्टक अपन पैला पाछे का सर्ले रहिन । पूर्णिमा अचानक ढर्टिम ढले पुग्ठि । भोजक सारा मनैननके डौरढुप होजिठिन । पूर्णिमा जहर खा लेले रठिन । समय बहुट ढिला होसेकल रहठ । पूर्णिमा अन्टिम पल रोशनहे कठि “रोशन महि माफ करहो । मै कले रहुँ ना मै टुँहार बाहेक औरेक हुइनै सेकम ।”पूर्णिमा एक घचिक पाछे रोसनके कोनम अपन सास छोरडेठिन् । रोशन चिल्ला पर्ठैं टर पुर्णिमाके ओहे अन्ट रथिन । सबसे डुखड क्षन ओहे रठिन रोशनके । एकठो फिलिम के जसिन घट्ना रहे मने जाट्टिक रहे । उहाँ कौनो सुटिंग नै रहे । टर पुर्णिमा सडाके लाग आँखी बन्ड करसेकल रहिन । रोसन रोइने अपन छाटिम चप्टाके पुर्णिमाके अनुहार हेर्टि रहिंट । अचानक रोशनके लजर पुर्णिमाके छाटिम खोसल कागजके टुक्रामे पर्लिन । रोशन हलिहलि उ कागज निकारके हेर्ठैं । उ कागज में असिक लिखल रहे ।
रोशन माफ करहो । मोर कहल बाट याड करहो । ओहे राट जोन हमार मिलनके अन्टिम राट रहे । ओहे बेला मै कले रहुँ टुहार बाहेक अौरे केक्रो नै हुुँ । ओहे बेला टोहाँर आँखिक आँस मोर अनुहारमे टप्प टप्प गिरे पुगल रहे । महि पटा टुँ महि बहुट माया करठो । रोशन टुँहार कोख बाहेक अौरेक कोखमे सुत्ना नैचहठुँ । अन्टिम साँस सम्म टोहार कोनम रना चहठुँ रोसन । महि पटा बा टुँ जरुर अइबो भोजक डिन । ओ मै टुहिनहे हेरम ओ बोलम ओ टोहार कोखमे निडैम अन्टिम पल । टोहार लजरके सामु सडाके लग कर्ना चहठु इ पल्का । इ डिलके ढर्कन टोहार डिलसे जोेर्ना चहठु । अन्टिम पल टोहार कोनम सुट्ना चहठु । रोशन याड करहो बचपनसे लेके आझसमके सब बाट । रोशन माया त्याग हो कठैं । सत्य माया उ हो जे अपन मनैनके लाग ज्यान डैडेहठ् । रोशन मै इ समाजसे हार खा गैनु । मोर खुशी छिनके डोसरके संग भोज कर्ना कोसिस करटै । जोन भोज जिवनमे एकचो किल कर जाइठ् । रोशन महि माफ करहो । अपन मनक बाट प्रत्यक्ष कहे नैपैलक ओरसे इ कागज ओ कलमके साहारासे मनक बाट लिखे परल बा । मोर बिस्वास बा टुँ जरुर अइबो भोजेम । मोर लजर मे लजर मिलैबो ।महिहे छुबो महिसे बोल्बो । हाँ रोसन टु जरुर अइबो । मोर जिन्गिक अन्टिम पल मे जरुर अइबो ना विश्वास बा ओ मरणशिल शरिरहे अपन कोनामे उठैबो । हाँ रोसन मै टोहाँर मुटुक टुक्रा पुर्णिमा । रोशन पुर्णिमाहे अपन छाटिम चप्टाके रोइना बाहेक कुछ करे नै सेल्लै ।
पूर्णिमाके इच्छा बिना उ भोज टहसनहस होजैठिन । पूर्णिमाके जन्मनासे पहिले खाइल ठकौनी ओ जबरजस्टी भोज कर्नाके कारण पूर्णिमाहे गुमाइ पुग्ठैं । पूर्णिमाके जिन्गीक खेल्वार कर्ठै । छाइनके जिन्डगी कसिन एक टे अपन जन्म घर छोर्के पराइ घर जाइ पर्ना ।उहे घर जुनि बिटाइ पर्ना । उहे फेंन इच्छा विपरिट भोज करे पर्ना कत्रा डुखके बाट । हर व्यक्ति स्वटन्त्र जिना अढिकार बा । मजा बाट बटैना ओ सिखैना हर व्यक्तिनके कर्टव्य हो । जिन्गिक लक्ष्य, योजना चाहना अपन अपन रहठ । ओराइल ।
अर्पन
जेठके जरेहस लग्ना घाम । बयाल ओ ढुर बराबर औरे हस चलट । गल्ली मनिक डुब्बा घाँस फेन सुखाके चुरचुर होरहट । टाटुल भौगरहस ढुर । उहे जरेहस लग्ना घामेम उहे टाटुल भौगरहस ढुरिमे अपन पैला चप्प–चप्प ढर्टी नेगल करटहिन कुमारी । टाटुल ढुरिम नेङ्गे नै सक्के सुखाइल घाँसे घाँसे नेङ्गे खोजीन । सुख्खा ढर्टी, टाटुल बयालके सँगे ढुर फेन उहे मेर उरट । ढुरेकिल कपार, सुखाइल सुखाइल ढेबर उहे फेन सुखाके फाटल रहिन कुमारीके । जाने कै डिनके भुखाइल रहिन कुमारी । मन मरल भुखेले पेट पैंठल रठिन । केकरो साठ ओ बसेराके खोजीमे निकरल बेसाहारा यात्री रही । कहाँ पुग्ना हो कोइ पटा नैहिन । ढुरेकिल शरीर, डेख्नामे बौरही हो कना फेन करिन । टर कुमारी बौरहिया नैहिन ।
कुमारी डगरके किनार रहल छोटमोट झंगली टिर बैठके घुम-घुमके इन्ड्र के ओर हेर्टी रहनि । जेकर टेकर मुहमहे सुन मिलट एकठो बोरही आइल बा । इन्ड्र अपन घरक अंगनामेसे कुमारीहे हेर्टि रहिट । कुमारीहे डेख्के इन्ड्र हे डया लग्ठिन ओ अपन पैला कुमारी बैठलक ठाउँ ओर सर्ठै । कुमारी एक औरे इन्ड्र हे हेर्टी रठी । आँखीमसे आँस गिराइ टहिन । इन्ड्र कुमारीक लग्गे जाके हुकिनसे बोल्ना प्रयास कर्ठै । इन्ड्र कठैं सुनि टे... कुमारी इन्ड्रके अनुहार हेर्टी कलिन । हजुर... जब कुमारी अत्रा मजासे बोल्ली इन्ड्रहे लग्लिन यि बौरही हुई नै सेकही मनै खाली बौरही कहिके हल्ला फैलैले बटैं । मजै मनैन सबजे बौरही कलेसे किहि मजा लागी । विचारी कुमारी मनक पिर बिना बुझल सबजे बौरही बटाडिन । कत्रा डुःखल हुहिन हुँकार मन । मनैन हे बिगर्ना समाज हो सपरैना फेन समाज । विचारी कुमारी हे समाज के नजरमे बौरही रहिन जे जस्टे सुने ओस्टे डेखे लागे । हुइना फेन हो जस्टे सुन्ठैं मनै ओस्टे डेखे लग्ठै ।
कुमारी के नरम, मढुर, डुखी आवाजसे इन्ड्रहे डया लागे पुग्ठिन । कुमारीक बारेम जन्नास लग्ठिन । इन्ड्र कुमारीके सामु बैठके हुँकार पिडा बुझना शुरु कर्ठै । एक घचिक टे उ टरे मुन्टि लगाके सुस्कर सुस्कर रोइली । नाउँ ठेगाना घर डुवार पुछे बेर । कुमारी रोइने बोल्ने कर्ठि कहाँ बटाउ अपन घर जबकी घर डुवार सारा उजरगिल । कहाँ सम्म बटाडिउ अपन जिन्डगीक सफर जब कि मोर डगरके अन्ट नै हो । कसिक बटाउ अपन हाल खबर जबकी घृणा बडनाम ओ ठुकाइ के कमि नै हो । कसिक सुनाउ अपन फुटल हृडयके डुखाइ सहे नै सेक्ना हो । मनक भित्रे भित्रे चिल्लाई पुग्ठु । कसिके सुनाउ अपन आँसके कहानी जोन एक एक आँसक बंडामे मोर मनक पिडा छुपल बा । यि जिन्डगी यात्रा मे कोइ नै हो मोर जिन्डगीक पीडा सुनडेहुया ।
डाडा आज अप्ने हे डेख्के असिन लगटा कोइ बा मोर मनक बाट बुझइया । सब जे महि डेख्के डुरेसे खरकके जैठैं । ओइन्के हेराई घृणासे भरल रठिन । बौरही हो कहिके कोइ मोर लग्गे नै आइट । ना टे कोइ मजासे बोलट ना टे कोइ खैना पुछट । कुक्कुर जस्टे सम्झठै टर डाडा मै पागल निहु । मोहि डेख्के बौरहिया सम्झठै । कसिक कहुँ मै पागल निहुँ । मोर बाट कोइ सुन्ना नै चाहट । पागलके बाट का सुन्ना कैक अपन डगर लाग्जैठा ।
कुमारीके बाट से इन्ड्रके आँखी रसाई पुग्ठिन । मन पिघल जैठिन । कुमारी अपन मनक बाट आघे सुनैटि जैठी । डाडा मै अप्न आप से ढोखा खाइल बटु । मै अप्ने आपहे लुटैनु । मै एक जहन भरोसा कर्नु । टर उ मोर जिन्डगीसे खेलल । उ मोर जिन्डगी हे टहस नहस पार डेहल । मै जिन्डगी मे भारी लक्ष्य बोक्ले रहुँ । टर मोर सारा कुछ खटम करडेहल । कुमारी अपन जिन्डगीके कहानी सुनैना शुरु कर्ठि । इन्ड्र हुँकार डुःख डर्ड भरल आवाज सुन्टि रठै ।
डाडा मै भारी लक्ष्य बोक्के नेगल रहुँ । अपन डाइ बाबाके नामी छाइ बनके डेखैम । अपन डाइ बाबा, गाउ ठाउँ ओ डेश के नाउँ उठैम । जिन्डगीमे कुछ करके डेखैना मोर लक्ष्य रहे । पह्राइ मे खेलकुडमे बहुट रुचि रहे मोर । साइकिल के यात्रा करके स्कुल जाउ । हर खेलकुडमे भाग लेडारु । पह्राइमे खेल कुडमे सबसे आघे रहुँ । सबजे प्रशंसा करिट । बहुट जे संघरियाके बन्लैं । कत्राजे जिवन संघरियाके लाग प्रस्टाव ढर्ला टर मे अपन लक्ष्य पूरा नै हुइटसम संघरिया बाहेक कौनो उत्तर नै डेनु ।
प्रेम मोर बरे मिल्ना संघरिया रहिट । मोर हर काममे साठ डेना । कै पल्ट टे प्रेम फेन महिसे जीवन संघरियाके प्रस्टाव ढर्लै टर मै केवल संघरियाके नाटासे हेर्ना । टर ढिरढिरे प्रेम प्रटि मैया लटपटैटि गैल । प्रेमके साठ सहयोग हरडम मिल्टि गैल । प्रेम बिना जिन्डगी अढुरा लागे लागल । सुनसान लागे, नेग्लक, बटओइलक बानी अकेली रहे नै सेक्जाए ।
संघर्या फेन बहर्लै ओ बहुट जे मोर पर व्यक्तिगट रिस ढार्के मोर बडनाम कर्ना प्रयास कर्लै । महिसे प्रेमके नाटक कर्के फसैना प्रयास कर्लै । टर मै प्रेमहे मै अपन मन डेसेक्ले रहुँ । प्रेमके एक-एक शब्ड मोर कानेम गुञ्जे ओ मन छुजाए । प्रेमके उ शब्ड “कुमारी यि ज्यान टुँहार मैयामे अर्पण करडेम । चाहे मै टुँहार हुइ नापाउ । जात्ति से कुमारी यि जिन्डगी भर टुँहार गुलाम बनडेम चाहे टुहाँर हुइ नापाउ । जिन्डगी भर टुँहार सेवा करम । महि अपन डिलमे ठाउँ नै डेलेसे फेन । एकपल महि समझ डेलेसे पुगजाई । प्रेमके एक–एक शब्डसे मोर मन छु जाए । पटा नै पैनु कबअ पन मन डेसेकल रहुँ । यी सब बाट प्रेमसे छुपैले रहुँ कि मे प्रेम हे चाहे लागल रहुँ ।
प्रेम डिवसके डिन रह । प्रेम जोरी हुँक्रे अपन मैया एक डोसरसे साँटिक साँटा कर्ठै । उ डिन हम्रे फेन भेट कर्ना चहली । उहे बेला मै अपन चोखा मैया अपन जिन्डगी प्रेम हे सोप्नु । बहुट खुशीके डिन रहे । हमार लाग यि डुनियाँ बहुट सुन्डर बनगैल रहे । हम्रे एक डोसरसे बहुट खुशी रही । काम काज पह्राई चल्टी रहे । प्रेम हे मै अपन जिन्गि सोप सेकल रहुँ । जिन्डगी भर साठ नै छोर्ना बाचा रहे हमार ।
एक डिन अचानक मोर डुर्घटना हुइ पुगल । ओ कपारिम चोट लागे पुगल जेकर कारण मोर डिमाक काम कर्ना छोरडेहल । महि कुछ पटा नै हुइल अचानक गारीमे लरे पुग्नु अत्रे पटा बा । अस्पटालमे जाके मोर होस खुलल् उ बेला रोर शरिर के कुछ अंग काम नै करतहे । महि सपना जस्टे फेन लागटहे तर सब हकिकट रहे । मोर एक पाजरके सारा हंग लुल होगैल रहे । मोर अाँस भलभल भलभल निकरे लागल बोल्ना फेन सम्या रहे । अरोट करोट लेना लेना फेन सम्स्या । महिनौं पाछे ठोर ठोर उठ्ना बैठ्ना हुइनु मने ओरे जहनके सहारा से ।
प्रम हेर चाह कर्टि गिलै । कुछ महिना पाछे महि महि होयल चेयर डेगैल । उहे मोर यात्रा रहे । घुम्नास लागर ठाउँ हेर्नास लागे सिट्टर हावा मे घुम्नास लागे टे प्रेम घुमैना करिट । हमार घुम घाम करम मे प्रेमसे बाटछछिट् करि । एकठो डुखके बाट मै डाइ बने नै सेक्ना होगैल रहुँ । मोर खुसीके संगे प्रेम के खुसी फेन हेरागिल रहिन । मोर कोखके सन्तान डेखे नै पैना होगिल रहि । डिन हमार अस्टे चल्टि रहे । प्रेम महि से समय कम डेहे लग्लै । ओ बरे राट पाछे घरे आइ लग्लै । महिसे बहुट बाट छुपाइ लग्लै । मै इ सब डेख्के अपन जिन्गिक भाग्य हे डोस लगाके रोउ ।
टब प्रेमके याड आइल ओ प्रेम हे खोजे लग्नु । टर मोर उ शब्डसे प्रेम महिसे बहुट डुर होगैल रहिट । जोन हमार नाटा रहे उ टुट सेकल रहे । कारणमे बेहोशमे बोलल शब्डसे प्रेमके डिलमे चोट लगाइ पुगल रहुँ । प्रेमहे मै अस्विकार कर्नु हुन । मै खुड नाटा टुर्नु हुन । मोर कारण प्रेम महिसे डुर होसेकल रहिट । जब प्रेमसे बिटाइल पल, उ मैया महि टडपाई लागल टे प्रेमसे भेट कर्ना चहनु टर प्रेम उ नाटासे नाहि केवल संघरियाके नाटासे भेट कर्ना चहलैं ।
कारण प्रेम जिन्डगीमे कोइ औरे जीवन संघरिया आगैल रहिन । एक सुग्घर परिवार रहिन । यि सब सुनके मोर सारा मन टुटगिल । रोइनु चिल्लैनु । अपन जिन्डगी हे ढिक्कर्नु । अपन बिटल पलहे समझके रोइनु । असिन लागे महि जिन्डगी असिन ढोखा डेहल कि भाग्य अपन बुझे नै सेक्नु । समय असिक बडलगिल कि कुछ सोंचे नैसेक्नु । कुछ महिना पाछे पटा चलल कि मोर पेटमे प्रेमके बच्चा बा । यि बाट जानके मोर जिन्डगी सारा उजरल सम्झनु । मोर गल्टी कहु कि भाग्य । मोर गल्टी कहु कि भाग्य या प्रेमके गल्टी कहुँ । मैया मोर जिन्डगीसे छलकरल । मै अपन सारा डिलसे प्रेम हे अपन मान सेकल रहुँ । ओ अप्ने आप हे अर्पण करडेनु । जिन्डगी भर साठ नै छुटना बाचा रहे टर पल भरमे जिन्डगी बडल गैल । पेटमे हमार मैयाके चिन्हा हुर्कटी गैल । मै निर्डोस बच्चाहे अपन गल्टीके कारण हटया कर्ना नै चहनु । संसार डेखैना चहनु । ओ हुँकार बच्चा, हुकिन अर्पण करडेम मै प्रेमके हुई नैपैलेसे फेन उ बच्चा जरुर बाबक घरेम हक पाइ कैक प्रेमके बच्चा हे जन्म डेना निर्णय कर्नु । डाइ बाबाके घरेम रहके पेटके बच्चाहे हुर्कैनु । ओ जन्म डेनु । बच्चा सुन्डर रहे । प्रेमके लाग छावा जन्माडेनु । बच्चाहे अपन छाटीक डूढ चुसाके ममटाके पहिलो मैया डेनु । मै अपन जिन्डगीके यात्राहे सम्झनु मोर आघे पाछे कोइनै रहे । सबजे बौरही नाउँसे जाने लग्लै । यी बाटसे महि अप्ने आपहे समाजसे घृणा लागे लागल । अप्ने आपहे कौन डुनियाँ मे लैजाउ । कहाँ जाके जिउ कैसिक रहुँ यि स्वार्ठी समाजमे कैक राट आँसके सँग निडैना करु । प्रेमके डिलमे मोर लग ठाउँ नै रहिन । कारण हुँकार एकठो जीवन संघरिया रहिन । महि कुछ समझ नै आए । बच्चाके भविष्य हेरु या अपन । प्रेमके साठ खोजु कलेसे उहाँ मोर कौनौ अढिकार नैरहे ।
एक राट मे अपन मुटुक टुक्रा पहिलो मैयक चिन्हा प्रेमके बच्चाहे हुकिन अर्पण करके निकरजिम अपन जिन्डगिक खोजमे जहाँ पुगाई जिन्डगीक डगर अपन यात्रा शुरु करम । अगर मिलजाइ कौनो घर ओ केक्रो साहारा उहि अपन जिन्गीक बसेरा बनैम कैक सोच बनैनु । ओ अपन डाइ बाबनके घरक डुवार मसे अपन पैला निकर्नु ओ कोनम बच्चा लेके अपन छाटिम चप्टाके आँखिमसे आँस नै रुकटहे अपन मुटुक टुक्राहे अपन छाटिमसे छुटाके फेकाइलहस प्रेमके घरक डुवारमे छोरके जाइटहुँ । डाइ बाबा के हो कुछ पटा नै रहल बच्चाहे प्रेमहे अर्पण करके प्रेमके जिन्डगीसे सडाके लाग डुर जाइटहु । सेक नै सेक निर्डोस अन्जान बच्चाहे सुनसान राटमे प्रेमके घरक डुवारके आघे छोेर्के एकठो चिठी लिख्के उहाँसे निकर गैनु । चाहके फेन प्रेमके हुइ नैपैनु । नैचाहके फेन मोर मुटुक टुक्रा निर्डोस बच्चा हे छोरके नेगेपरल । कटि कुमारी इन्ड्रके अनुहारमे हेर्टि रही । आँखीमे आँस भरके पल्कामसे टप टप गिर टहिन । कोइ नै बुझले हे कुमारीके मनक पिडा । नाटे कोइ पुछले रहे हुँकार घर डुवार । ना कोइ जाने चहले रहे हुँकार जिन्डगीके असर । केवल हाँस टहे कुमारीहे डेख्के समाज । घृणा करटहे ठुक टहे । बौरहीके नाउँ डेलै रहे ।
यि सब सहके कुमारी अपन जिन्डगीक यात्रामे निक्रल रठी । केक्रो सहाराके खोजीमे । एकठो जिन्डगीके बसेरा घरके खोजीमे निक्रल रठि । कुमारी सुस्कर सुस्कर रोइठी ओ आँस पोछके उठके जाइलग्ठी । उहेबोला इन्ड्र अपन हाँठ नफाके कुमारी के उ नरम आँसले भिजल हाँठ पकरके रोक्लै । इन्ड्रके आँखीमे आँख मिलाके मैया भरल नजरले हेर्ली कुमारी । इन्ड्र कठैं कुमारी मै डेम टुहिन साठ । ओ टुहिन अपन डिलमे बास डेम । जहाँसम चली मोर सास । कुमारी टुँ राजी बटो कलेसे चलो मोरसँग कैक इन्ड्र कलै । कुमारी ढिरेसे कपार हिलैली ओ इन्ड्रके सँग हुँकार घर जैना टयार हुइली । असिके इन्ड्र ओ कुमारी एक डोसर हे साठ डेना बाचा करके । एक डोसरहे अप्ने आपहे अर्पण करडेठैं ।
ओराइल।
सारा मनैनमे आनन्ड छाइल रठिन । घर अंगना पटङ्गसे सजल रहठ । गीट बाजा बोल्टि रहठ । कोइ नाचट टे कोइ फोहैटि एहोर ओहोर घुम्ठैं । झिकिर मिकिर बिजलि बर रहठ । लवन्डा लौवन्डि अपन अपन संघरियनसँग भुलल रठैं । उहे भोजहा घरसे रेस्माहे भोजहा नेउटा गैल रहिन । रेस्मा उहे भोजहा घरक अंगनामे मन मर्ले कोनम अपन लर्का लेके बैठल रहि । अन्ढरिया राटमे भोजहा घर चिकमिक चिकमिक बिजलि चारुओर लगैलक कारण बरे सुहावन डेखा परठ । सबजे रमठै मने रेस्मा कोनम लर्का लेले कवाइल रठि । रेस्मा हलिहलि चुन्निले आँस पोछ्ठि । सायड रेस्माहे अपन उ डिनके याड आइल हुइहिन । याड काकरे नै अइहिन कबु बिस्राइ नै सेक्ना घटना जिन्डगीमे घटे पुगल रठिन । कोना मे रहल बच्चाके अनुहार हेर्टी, बच्चक अनुहार सुहरैटी रेस्मा उहे रमेश हे सम्झे पुग्ठी जेकर बच्चा कोनामे खेलटहिन । उ मासुुम बच्चाहे का पटा मोर बाबा के हो कैक । टर रेस्मा बच्चा हे हेर्टी रमेश के ढोखा हुंकार नक्कली मैया के खेल झुठा बाचा बार बार रुवाई पुग्ठिन ।
रेस्माके रमेश से पहिला भेट बस मे हुइल रठिन । रेस्मा अपन डिडिक गाऊ संघर्यक भोजमे जाई टहि । रेस्मा बसमे चहुर्ठी टर बैठना सिट खाली नैरहिन । उह बेला अन्जान कबुना डेखल ना जानल रमेश अपन बैठल सिट डेठिन, रमेश के इ चालसे रेस्मा हे अचम्म लागटहिन । रमेश सिट मसे उठलै ओ मुस्कुरैटी रेस्मा के आँखी मे आँख मिलैटी कल पिलिज यहाँ बैठो ना । रेस्मा इन्कार कर्टी कलि नाई रहनडेऊ ठिके बा मोर कुछ डुर सम केल जैना बा पुगजैम । टर रमेश रेस्मा हे बैठाके छोरलै । रेस्मा सिट मे बैठली ओ हुकार मनमे कहोर कहोर गुडगुडाई हास लगठिन । रेस्मा रमेश हुकार अनुहार मे हेर्टी कठि ढन्यबाड । रमेश मुुस्कुरैटी कठै ढन्यबाड टे मै टुहिन कहे पर्ना हो मोर बाट मान डेलो ।
रेस्मा हुकिन रमेशके उ बोली सुनके अचम्म लाग टहिन । कबु ना डेखल ना चिन्हल टब फे चिन्हल जसिन बाट करटहिट । रेस्मा ओ रमेश अपन अपन मनक बाट सुरु कर्ठै । रेस्मा जब अपन डिडिक गाँउक नाउ लेली टे रमेश पच्चसे कह मर्लैै मै फेन टे उहे गाउँक हुँ । रेस्मा ओ रमेश के परिचय उहे बेला हुइगिल । डुई घण्टा के डगर बिटलग पटैनै पैठा, छोटी समय के मिलन टर बरे गहिर मैया होगिल रहिन डुनु जहनके ।
रेस्मा के जिन्डगीमे असिन पहिले कबु नै हुइल रहिन । पहिलचो असिन हुई पुगल रहिन । छुट्ना मन नै होके फेन डुनु जहनहे फे छुटे पर्लिन । डुनु जे बिडाई के हाट हिलैटी अपन अपन डग्गर लगठैं । औहोर रेस्मा के भाटु सब कुछ हेर्टिटी रठिन । लेह लाइल रठिन रेस्मा के भाटु । जब रेस्मा भाटुक मोटर साईकलमे बैटठी टे भाटु खेलवार करे लग्ठिन । का हो साली साह्रु बनाइटो का । भाटु से साली फे कम नाही रेस्मा फे खेलवार कर्टी कठिन हाँ टे काहुन औरे डिन डेख्बो मोर भोज कैक भाटु से गफ मर्ठी ।
रेस्मा ओ रमेश के फोन मे बाट चल्टी रठिन । ओहोर संघर्यक भोज डुई डिन बाँकी रहगिल रहिन । रेस्मा रमेशके मैया मे हेरागैल रहि खाना फे मजा से नै खैना । डिडि कहिट रेस्मा टै खाना काजे नै खैठै हुँ । कहिट टे अनेक बहाना बनैना करिन । भोज के डिन फे आजैठिन । उहे भोज रठिन रेस्मा ओ रमेश के मैया के सुरवाट हुई ठिन । भोजेम रमैना से ज्याडा रेश्मा रमेश से रमैटी रठी । जीन्डगी मे पहिलचो उ खुसी छाईल रठिन । भोजभार रेस्मा ओ रमेश संगै रठै । रेस्मा डुलहिक संगे ओ रमेश डुल्हक संगे । डुनु जे एक डोसर के नजर मे रठै । खुसीक बाहर छाइल रहट उ भोजहा घर । चारु ओर सजि सजाउ रहट भोजहा घर । ओजरिया राट बिजली से झिकिर मिकिर रहट भोजहा घर । उह ठाउँ म उह घर क अगना मे सारा जे नाच नाचके रमैटी रठैं। उहे राट रेस्मा ओ रमेश ओजरीया राट मे जोन्हया ओ असंख्य टोरैमाके सामु बाचा कसम खाई पुग्लै । रेस्मा रेमेशहे उह बेला अपन सारा कुछ सौप डेली । डुनु जे एक डोसर के माया मे हेराई पुग्ठै । जिन्डगी भर एक डोसर हे अस्टके साठ डेना बाचा कर्ठै । रेस्मा रमेश से पुछना करी रमेश टु मही कत्रा माया कर्ठो हुँ, रमेश जोन्हया ओ टोरैया के कसम बा जस्टक यी टोरैया ओ जोन्यहा सडियो से एक जस्टै बा ओस्टै मोर मैया फे पली रही । रेस्मा मै टुहिन बहुट मैया कर्ठु ओ कर्टी रहम मुना डिन सम । टुहिन से अलग हुईम टे केबल मृट्यु पाछे । कना करिट रमेश ।
रेस्मा ओ रमेशके मैया के सिलसिला चल्लक डुई टिन बर्ष होगिल रहिन । रेस्मा ओ रमेश से जीन्डगीमे भारी सपना सजैले रहिट । हम्रे भोज करब और हमार भोज फेन ढुमढाम के संग हुई । ठुलाबरा मनै आर्शिवाड डिहि । ढेउर संघर्यन से भेंट हुई । हमार जोरी सुहावन हुई । रेस्मा यी सारा सपना जिन्गीम सजैले रठी ।
एक डिन रमेश रेस्मा है बलैठैं । रेस्मा सोच्ठी सायड आप हमार भोजक डिन लग्गे आगिल बा कैके । टर उ डिन रेस्मा के सारा सपना टहस महस हुइना डिन रहिन । रेस्मा जब रमेश के कुछ बाट सुन्ली मनमे अनेक बाट खेले लग्लिन । रमेश के कुछ बाट सटय हस कुछ बाट बनौटी हस लाग टहिन । रेस्मा उ राट के याड आइठिन जोन राट अपन सब कुछ रमेश हे सोप्ले रही रमेश के उ बाचा कसम सारा झुठ लागटहिन । जब की जोन्या ओ टोरैंया के कसम खैटी कले रहिट जस्टक जोन्यहा ओ टोरैया सडियो से एक जस्टै बा औस्टके मोर मैया पलि रहि । अलग हुइम टे मृत्यु पाछे कना मनै अत्रा हली महिसे अलग हुइटै कैक रेशमा सोच्टी रठी । रमेश रेस्मासे बहुट डुर जाई टहिट एक प्रडेशी बनके । रमेश के बिडेश के भिसा आगैल रठिन ओ रेस्मा से अन्टिम पल भेट कर्ना चहठैं । रमेश रेस्मा हे आशा भरोसा विश्वास करैटी कठैं । रेश्मा मै हली अईम ओ हम्रे भोज करब ।
आशा करहो, भरोसा करहो, मोर बाटमे विश्वास करहो । हमार भोज हुई ढुमढामसे हुइ । यह भोजके लाग टे रुपया कमाइ जाइटु । टुहारसँग भोज ढुमढामसे हुइ रेस्मा कटि रठैं । रेस्मा कुछ कहे नै सेक्के रमेशके छाटिम चपटके केवल आँखिमसे आँस गिरैठि । हाँ कनासे औरे जवाफ नै रठिन रेस्माके । रेस्मा रमेशके सारा बाटमे विश्वास करलेठि । ओ रमेशके अस्रामे रना निर्णय करलेठि । रेस्माहे पटा नैरठिन कि मोर पेटमे रमेशके मैयाके चिन्हा हुर्कटा । जब रमेश घरसे बहुट डुर गैगिल रठै टब रेस्मा पटा पैठि कि मोर पेटमे रमेशके मैया चिन्हा हुर्कटा । यि बाट ना रेस्मा हे ना रमेश हे पटा रहिन । जब रमेश गैल रेस्माहे सब सुनसान लागेलग्लिन । ना बोल्नास ना ट खैनास । ना ट हँस्नास । संघरियासे बोल्नास फेन मन नै लग्ठिन रेस्माहे । रेस्मा रमेशके याडमे कवाके बैठे पुगि । जब रमेश ठाउँमे पुग्लै टे कुछ डिन पाछे रेस्माहे फोन लगैले । कि मजैसे पुग्नु कैक अपन हाल खबर बटैलै, रेस्मा फेन मजै रहिन ।
ढिरेढिरे रेस्माके पेटेम लर्का हुर्कटि जाइतहिन । यि बाट गाउँ घरमे फैले लग्लिन, बिना भोज करल रेस्मा पैनाहा होगिल बा कैक । जाने केकर पेट बोकल बा कैक रमेशके ठन खबर पुगाडेठिन । रमेश यि चिब्लिक बाट सुन्ठैं टे बरे जोर रिसैठैं । चिब्लि खैना मनै बाट बर्हाके बट्ओइले रठै । रमेश रेस्माके बारेम नै मजा सोचे पुग्ठै ओ रन्डि कहिके गरि डेठैं । रमेश रिसक झोके सारा नाटा अपन करल बाचा कसम टुर डेठैं । रेश्मा रमेशहे बहुट सम्झैना प्रयास कर्ठि । रेस्मा रो–रोके कठि नाइ रमेश नाइ महि गलट ना सोंचो बच्चा टुहाँर हो । महि झूठा आरोप ना लगाउ । महि अत्रा भारि सजाय ना डेउ । गल्टि मोर कहुँ या टुहाँर । अत्रा स्वार्ठि ना बनो रमेश, टुँ महि अपन बनैना बाचा कसम खैलो । जुनि जुनि भर साठ डेम कैके आशा डेखैलो । भोज कर्ना बाचा कर्लो ओ मोर शरीरसँग खेल्लो । आज उ बाचा कसम कत्रा सजिलोसे टुरडेलो । कत्रा सजिलो बा बाचा कर्ना ओ जब चाहे टब टुर डेना । वाह रमेश वाह का चाल खेल्लो अपन प्यास मेटाइक लाग । अपन मनक इच्छा पूरा करक लाग । आज महि रन्डि ना । जब कि पहिला प्यार टुँ हुइटो कैक रेस्मा अपन मनक बह छिट्कैठि ।
उ डिनसे रेस्माके ठन रमेशके फोन अइना बन्ड होगिलिन । कुछ डिन पाछे विडेसमे ओहोरे रमेश भोज करल सु परठ् । इ बाट चारु ओर फैल जाइट कि रमेश रेस्माहे छोर्के डोसरसे भोज करल । आखिर सब केकर डोस रहे । रमेश ओ रेश्माके सम्बन्ध टुर्ना काम के करल ? ओ हे झुठ चिब्लिक बाट ओ समाज ना । एक थो कहकुट बा कौवा कान लैगिल कहटिमे कौवक पाछे नै डौरे परठ् । पहिले अपन कान छाम्हे परठ । कहल बा मनैनके जिभिम घाटक बीस भरल रहठ् । जौन मनैनके जिन्गिहे टहस नहस पार डेहठ् । जिभ डुइ ढारे टरवार जस्टे हो । उल्टा सुल्टा पटे नै चलठ् । कहगिल बा एक्के शब्दसे मनैके सँपार डेहट ओ एक्के सब्दसे बर्बाद हुइ पुगट । रमेश ओ रेश्मा के जिन्गिम आगिलगाके बर्बाद करुया मनैनके बोली रहिन । रेश्माके खुशि छिनके अगिलगादेलै । रेश्मा केवल रमेशके रहिन, अपन जवानी केवल रमेश के लाग सजाके ढर्ले रहिन । टर समाज के लजर गलट बनादेहल । गलठ डेख्के डुइ बिचमे फुट करडेलैं । रेश्मक जिन्गिम आँशक लडिया बहादेलै । ओहोर रमेश मनैनके बाट सुन्के रेश्मासे नफरट करे लाग्लैं । रेश्मा हजार बिन्टि कर्लिन मने रमेश नै सुन्लै । अाखिर अोपन जिन्गिक निर्णय कर्के छोर्लै । विडेशमे ओरे लौन्डिसे संगे सुटे बैठे लग्लैं ।
रमेश उहे लौन्डिसे रमाई लग्लै । सारा कर्च ओक्रे मे करे लग्लै, एक साल डुई साल करट् गरेम रुपया कमैना फेन बन्द करडेठैं । घरक मनै फेन रमेशके पर रिसाइ लग्ठिन । ढिरे ढिरे समाज फेन रमेशके बाट काटे लागठ् । देवि जसिन रेश्मा से सम्बन्ध टुरके रमेश अपन गोरम अप्नेहे कुरहार मर्ले रहिंट । रमेश हे उ लौन्डि लुट सेकल रहे । कुछ पैसा बचाइ नै सेकटहिट रमेश । रमेशके जिन्गिम सराप परल हस रहिन । निर्दोस रेश्मा हे बिना सोछछल बिना बुझल इन्कार करके जिन्गि बेहाल करैलै मन आप उहे बडला अपनमे आसेकल रहिन । रमेश रेश्मा हे धोखा डेले रहिट आप अप्ने धोखा पासेकल रहिट । एकओर रमेश टरप टरपके जिए टहिट टे एक ओर रेस्माके जिन्डगीमे अन्ढरिया छाजिठिन । जिन्डगी टीट होगिल रठिन । ना मरे सेक्ना ना जिए सेक्ना होजिठिन, समाजके नजरमे घृणिट होके आँशक घुटका पि पिके रेस्मा जिना प्रयास करे लग्लि । आफन्टफे ठुके लग्ठिन । अपन डिडीफे नैमजा माने लग्लिन । कहिन–टुहिहे सोंचे पर्ना रहे, अपन इज्जटके ख्याल अपन जिन्डगीक ख्याल करे पर्ना रहे । आप पटा चलल हुइ ना डुनियक मनै कत्रा स्वार्ठी मैया कर्ठै कैक । खै टोर रमेश ? बहुट मजा बा कहिस, बहुट मैया कर्ठै कहिस, खै टोर रमेश के मैया ? ओ अपन हालट हेर का बना सेकल बटे कैक डिडी कहिन ।
रेस्माके जिन्डगी डुःख कष्टम गुजरटि रठिन । कुछ महिना पाछे रेस्मा एकठो लर्का जल्मैठि । बिना बाबक नाउँक बच्चा कैक मनै खिसि काटे लग्ठिन । टर रेस्माहे सब कुछ पटा रठिन कि केकर बच्चा हो । रेस्मा रमेशसे भारी ढोका पाइल रठि । रेस्मा अपन मैयक चिन्हा मासुम लर्कक् अनुहार हेर्लि टे आँखिमसे ढरढरसे आँस गिरे पुग्लिन कसिक इन्कार करे सेक्टि रेस्माक निर्डोष बच्चाहे । रेस्मा उ अपन कोखके निर्डोष अन्जना बच्चाहे बचाइक लाग हुइलेसे फेन यि स्वार्ठी मनैनके माझ बडनाम सहके फेन बच्ना चहठि केवल अपन कोखके बच्चाके लाग हुइलेसे फेन । ओहोर रमेश रेश्मा कहल एकएक बिन्टि याद अठिन ओ घरे जाके रेश्मा हे स्विकार करके अपन दुलहि बनैना निर्णय करलेठैं ।
ओराइल ।
डाइ
ठोर ठोर बड्री लागल रहट । हावा फेंन चल्टी रहट साँझके समय सित्तर होरहठ । वर्षा पिपल चौटारा मे बैठल जाने का सम्झठी । असिन लागे ऊ बहुट गहिरसे बिटल डिनके याड मे डुबल बटी । वर्षा हे उ स्कूलमे पहरलक, याड नै अइना टे बाट नै हो । जोन स्कूलमे बचपनसे पह्रे आइन, सालौ से हप्टामे छ डिन उहे स्कूलमे आढा डिन संघर्यन सँगे खेल्के पहरके बिटल ।
वर्षक ऊ रेश्मी भुत्तला, हावा सरसरसर उरैटी रहिन । ऊ सुन्डर अनुहार हे हावा आके भुटलाले छोपडिन । वर्षा अपन भुटला सवर्टी शान्ट स्वभावमे याडमे डुबल रठी । सौटिन्या डाइक करल बेह्वारसे हुँकार मन डुखल रहिन । वर्षा अपन जन्म डेना डाइ हे डेख्ना टे डुरके बाट हो एक घुट्का डुढ फेन चुसे नैपैलीन । टर वर्षा अपन डाडा के बटाइल घटनाके याड अइठिन । वर्षा छोटमे सौटिन्या डाइक हेल्हासे रोइटी डाडक् कोनामे जाके डाइक बाट सुनैना करीन । उह बेला डाडा राजु कना करिन बाबु ऊ टोर जलम डेहल डाइ नै हो टबे टुही असिक कराइट । हमार जलम डेना डाइटे टुही जल्माके यी संसारसे बिडा होके गैसेकल । डाडा राजु फोटो डेखैटी कना करिन । ओ अपन जिन्डगीक् कठा सुनैना करि ।
बाबु वर्षा जब मै पाँच छ वर्षके रहुँ उहेबेला डाइ हम्रहिन सडाके लाग छोरके गैगिल । डाइ बहुट कमजोर रहे । बहुट माया करे मही । बाबा डाइक लाग लानल फलफूल स्याउ, अंगुर अप्नफे खाए ओ मही फे खवाए । डाइ कहे राजु छावा टै बहुट कमजोर बटे ले फलफूल खा । टर मै कहुँ नाइ डाइ टै बेराम बटे टै खा कहुँ ट डाइक् आँखिमसे आँश गिरे लागिस । डाइ कहे राजु टै मोर चिन्टा ना कर । मोर टे आज हो कि काल्ह पटा नै हो ।
डिन बिटटी गैल एक डिन डाइ अचानक बहुट जोरसे बेराम होगैल । डाइ हे अस्पटाल मे लैगिलाँ । उहे डिनसे मै डाईक आवाज नै सुने पैनु । उहे डिनसे मै डाईक डंडुर कोनासे अलग होगैनु । डाई मही छोर्के बहुट डुर गैगिल, कबु नै घुम्ना कैक । जब अस्पटालसे एम्बुलेन्स आइल टे मै बहुट खुशी हुइनु मोर डाई आइल कैहिके । मै डौरटी गैनु बाबक कोनामे एक छुटीमुटी बच्चा डेख्नु । बाबक आँखी रोके लाल होरठिस । बाबासे पुछ्नु, बाबा इ के हो ? बाबा कहल टोर बाबु हो उ टै रहिस। मै अन्जान बालक टुहिन हे डेख्के बहुट खुशी हुइनु । एक घचिक पाछे डाईहे निकर्लै डाई निडाईल जसिन रहे । बाबु टै जोरजोरसे रोइटहिस । मै डाइहे जगाई गैनु । डाइ डाइ उठ बाबु रोइटा कटी मै बहुट जगैनु टर डाइ निजागल । मै रोइलग्नु, महिन औरे मनै डाइसे अलग करैना प्रयास कर्लै । मै बहुट रोइनु । डाई कुछ नै बोलल, एकचो फे नै हेरल, चालचुल फे नै करल ट मही मजा नै लागल । डाईक का होगेलिस कैक बहुट रोइनु । भारी भारी मनै फेन रोइटहिट । एकघचिक पाछे डाईहे उठाके लैगिला । ओ ऊ जर्टी रहल डाईक चिटा आजसम झलझली आँखीम आइट । डाइके माया नै पाइल मै एक टुवरा ओ बाबु टै जुन डाईक अनुहार फेंन डेखे नै पैले कटी राजु वर्षासे अपन जानल डेखल सब सुनैना करिट ।
उहे बाट वर्षाहे झलझली याड आइ टहिन । आँखी आँसले भरगिल रठिन ओ अपन डाडा राजुके बाट सम्झठिन । बाबु टै डाईक अनुहार टक डेखे नै पैले ओ डाइक डंडुर कोना कसिन रहट कना फें पटा नै पैले । डाईक् अमृट जसिन डुढ एक घुट्का फे पिए नै पैले । हाँ बाबु टै भुखेले बहुट रोइस । डाईक् कोनक लाग ओ डुढ चुसक लाग । टब बाबा टुही अपन कोनामे लेके भलभल भलभल आँश गिरैटी रोए । बाबा डाईक नाउँ लेना करे ओ कहे मिना कसिन जिम्मेवारी छोर गैले । आज मोर कोनामे एकठो छाई । कैसिक डिउ यी छाई हे डाई के माया । हेरो मिना यी छाई हे । टुहाँर लाग टरपटा, हाँ टुहाँर लाग टपरटा कहिके बहुट रोए । बाबा हे औरे डाई लन्ना मजबुरी हुइलिस टब यी छोट्की डाई हे लानल ओ बाबु टुहिहे छोट्की डाई टोर हेरचाह करे लागल टुही बह्राइल । मै फेंन डाई के माया नै पाके रोइना करु । छोट्की डाई मही ओ टुहिन अपने बच्चा जसिन माया डेह लागल टर जब भैया जल्मल टे टबे से डाईक माया हमार प्रटि कम हुई लग्लिस । ओ हमनसे ज्याडा भैयाके बास्टा करेलागल ।
वर्षा अस्टे अस्टे बाट सम्झटी रठीन । वर्षा डाईक ओ डाडा राजुके माया साठ पाके हुर्कठी । डाडा राजु ओ भैया केसँग खेल्के डिन बिटाई लग्ठी । वर्षाहे याड अइठिन डाडासे स्कूल अइलक सँगे खेल्लक रमैलक । वर्षौ से संघर्यन सँग बिटाईल उ डिन समझके बर्षाके डिलमे माया आइ पुग्ठिन । उहे सँगे बहरलक हँस्लक खेल्लक संघर्यन अपन–अपन जीवनके लक्ष्य ओर डौरल रहिट । सबजे अपन–अपन डौडमे रहिट । टर वर्षा आज अकेली उहे स्कूलके चौटारामे बैठल रही । असिन लागटहिन कोई संघर्यन अइटै टे का नै । मीठ–मीठ सुख डुःखके बाट कर्टी रमैटी हँस्टी । टर यी सब वर्षाके सोंचाईमे रहिजिठिन ।
वर्षा अपन डाडा राजुके डँडुर कोना कबु नै बिस्रैठी । जब छोट्की डाईसे एकठो भैयाके जलम हुइठिन । वर्षा फेंनसेडाईक ऊ डंडुर कोना से डुर हुइ पुग्ली । कारण आप ऊ कोना भैयाके होगिल रहिन । भैया जल्मल पाछे वर्षाके हेरचाह कर्ना सब राजु के उप्पर आजैठिन । वर्षाहे हेर्ना, खवैना लुगा कपरा हेर्ना सब काम राजुके होजिठिन । एकओर बाबा डाईक विछोडके पाछे डारुहे अहार बनैले रहिन । डारु ज्याडा पिलक कारण बाबा फेंन खंन्जरा जाईठिन । राजु बाबाहे सम्झैना फेंन करिट डारु ना पिईश मजा चिज नै हो कहिके । टर बाबा कना करिन टोर डाईक याड भुलाईक लाग पिठु छावा । कुछ डिन पाछे बाबाक् फे डारुक् कारण ज्यान चलजैठिन । बाबाक् मृत्यु पाछे राजु ओ बर्षाक् सौटिन्या डाई औरे थारुके सँग चल जैठिन ।
राजु ओ वर्षाके जिन्डगी मे अन्ढरिया परजैठिन । छोटी उमेरमे बिना बाबा डाईक । डुनु जहनके जीवन आँश मे बिटे लग्लिन । का खाउँ का लगाउँ कसिक करी । डुनु जने अलपत्रे होजैठैं । राजु ओ वर्षाके जिन्डगी पल भरमे करोट लेह पुग्ठिन । हँस्टी रमैटी खेल्टी जिन्डगीमे आँढी, आके सारा कुछ उराके लैगिल रहिन । विछोडमे विछोड, डुःखमे डुःख ठप्टी जैठिन । डाईके मृत्यु पाछे, बाबाके मृत्यु ओ बाबाके मृत्यु पाछे छोट्की डाइ फेन चालजैठिन । अनौठा बा यी संसारके जिन्डगी ना मरे सकेजाइठ ना जिए । कबु खुशी टे कबु हाँसो कबु मिलन टे कबु बिछोड कबु आँशु टे कबु ओठ म खुशी के मुस्कान आइ पुगट । डाइ ना बाबाके लर्का राजु ओ वर्षा । समुन्डर के छाल्का मे परल जसिन जिन्डगी होगिल रहिन डुनु जहनके । समस्यासे लट्पटाईल रहिन ।
वर्षा अपन बयालले उरैटी रहल भुट्ला सवर्टी रठी । बयाल अपन सुरमे चल्टी रहट । वर्षा उहे अपन स्कूलके पिपल चौटारामे बैठल रही । आँश बहके डुन गाल भिजगैल रठिन । छुटिके याड नै अइनाटे बाटे नै रहिन वर्षाके । बाबाके बिटल पाछे डाईफेन औरे ठार्वा लेके गैल पाछे डाडा राजुके करल भूमिका कबु नै बिस्रैठिन । डाई बाबाके माया कैसिन रहट कना पटा नै रहिन । टर डाई ओ बाबा डुनु जहनके भूमिका पूरा करटहिट राजु । छोटीमोटी बाबु, डोंगिल डोंगिल डाइक डुढ पिए नै पैलक । कुछ करे नै सेक्ना बाबु हे हेर्ना, हुुर्कैना सारा जिम्मेवारी राजुके रठिन । वर्षा सम्झठिन अपन डाडाके करल गुन, माया सब कुछ । वर्षा बाबा डाइहे समझके रोइना करी टर राजु बाबु वर्षा हे अपन छाटिम लगाके सुफ्लैना करीट । जिन्गिम कुछ करे नै सेक्ना हुइलक मारे राजु बाबू पर्हाके कुछ बनैना सोच बनाके बाबुहे पह्रैठैं । वर्षाके पह्राई मजा रहिन । हर चिजमे सम्मान पैना करिन । डाइ रटिन टे कत्रा कत्रा खुशि हुइटिन ।
राजु अपन पह्राइ छुटाके वर्षाके भविष्य ओजरार कराईक लाग अपन सारा योजना सपना बडल डेलैं । बाबु वर्षा के जिन्डगी बिग्रे नैडेना बाचा कर्के राट डिन बाबुक सेवामे जिवन सोप डेलैं । बाबुक लुगा ढोडेना, सरसफाइ कराके स्कुल सम्म पठैना ओ लेह जैना रोज डिनके काम रहिन राजुके । राजु अपन ओ बाबुक जीवन गुजाराके लाग ओ वर्षाके पह्राई खर्च के लाग एकठो होटल मे काम पकर लेठैं । उहे होटलके कमाहीसे ठोरठोर डुनु जहनके गुजारा चले लग्ठिन । होटलमेसे बचल खैना चिज राजु लानिट ओ डुुन डाडु बहिन्या खुशीसे खैना कर्ठै ।
डिन अस्टे चल्टि जैठिन डुनु जहनके । एकओर राजु अपन डाइहे सम्झे पुग्ठै । डाइक हाँठेले भाट खैलक । अपन बठा फलफूल खओइलक । डाइक डंडुर कोनामे सुटलक । डाइके कहल एक–एक बाट राजुके मन खेल्टी रठिन । एस.एल.सी. पाछे राजु वर्षाहे डुर सहरमे भारी कलेजमे पह्रैना सोंच बनाके पठैलै रहिट । वर्षा अपन पह्राई पुरा कर्के आइल रठी । ओ अपन मन बहलाइक लग उहे स्कुल ओर घुमे गैल रठीन ।
पानी अइना हस बड्रि लागल रहठ् । जुर जुर बयाल मे बैठल चिरै चुरुङ्गानके जिन्गिहे सम्झटि रठिन । आँधि अइना हसकर्टि रहठ चिरै चिरचिर चुरचुर कर्टि एहेर आहोर उर्ठै । ना ओइनके घर हुइन ना आँधि पानीसे बच्ना कौनो चिज । रुखुवा चिरैनके घर हुइन कठैं टर उहे रुखुवा आँधिसे टुट्ना हस गिर्हस करठ् । चिरैं घरि उ रुखवामे घरि उ रुखुवामे कर्टि रठैं । बिचारन के जिउ बचैना कर्रा । पानी अइलेसे भिजे पर्ना ना छाइ ना बाबा सबजे अपन जिउ बचैना उपाय लगैले रठैं । सब हजनके डाइ बाबा छोटमे खओइलिन बह्रैलिन ओ उरे सिखाके छोर डेले रहिन । अपन पेटके लाग घाम पानी सहके चह्रे जाइ पर्ना ना ओइनके घर रहिन ना अनाज ढर्ना डेहरि कुठ्ला । ना ओइनके ओहोर्ना बिछौना लुगा रहिन ना घल्ना लुगा । जिन्डगि भर उहे ओहर्ना ओहे घल्ना टब फेन कैसिके जिन्गि कटालेठैं ।
वर्षा चिरैनके जिन्गि हेर्ठिन ओ अपन मनैक जिन्गि सम्झठी । ओइन से कै गुना मजा सम्झठिन अपन जीवन टर अपन फेन ओहे हाल रहिन डाइ ना बाबा । वर्षा चिरैनके जिवन से कुछ सिख्ठिन । अगर चिरैं अत्रा छोट होके आँधी पानी घाम जार सहके दु:ख भुखसे संघर्स करठैं कलेसे मै के हुँ । मोर टे घर बा घाम पानी से बच्ना छंपरा बा, जारेम ओहोर्ना बिछौना लुगा बा, अनाज ढर्ना भाँरा बा । अपन चाहल जसिन लगाइटुँ खाइटुँ टर पन्छिनके लाग टे खैना गाँस टक पटा नै रठिन । काल्ह का हुइ ! कसिन मौसम हुइ! खाइ पैम कि नै पैम ! कहाँ पैम कुछ पटा नै रठिन टब फेन रमाइल रठैं, आकाश मे उरल रठैं । जिन्गिम कबु हार नै खैठैं । अपन जिन्गिक लक्ष्य ओर लागल रठैं । अन्तमे शरिर हे ठेगान लगुइया कोइ नै रठिन । वर्षा घण्टौ सम ओहे ठाँउमे बैठल चिरैनके जिन्गि ओ अपन हे सम्झठिन । हुकार मे एकठो लावा उत्साह जोस ओ जिन्गिम कुछ कर्के डेखैना हिम्मट जग्ठिन वर्षा के ।
ओहोर बाबु घण्टौंसम्म घरे नै अइलक कारण छट्पटि लाग्टहिन ओ वर्षा हे खोजे निकर पर्लै । वर्षा उहै स्कुलके पिपल चौटारामे उहे अवस्ठामे बैठल रही । राजु खोजट–खोजट उहै पुग्जिठैं । राजु वर्षाके लग्गे जैठैं ओ बाबुक सामु बैठजिठैं । वर्षाके आँखिमसे आँस बहल डेख्के राजु वर्षासे पुछे लग्ठैं । बाबु का हुइल ? काहे रोइटे बटा ? वर्षा सुमढुर आवाज मे कली डाडा मही यी स्कुल म पहर्लक हँस्लक संघर्यन सँगे खेल्लक ओ छोटीमे टुहिसे यहे पिपरा टिर बैठके भाट खैलक बहुट याड आइल । डाडा टै मही लावा जिन्डगी डेले । डाडा मै टोर यी गुन मै युगौं युग सम्म भुलाई नै सेकम हाँ डाडा हाँ कैक वर्षा, राजुके कोनम खोपसे रोई लग्ठीन । ओ अपन मनक बाट रोरोके कटी रठि । डाडा आज डाइ रहट कलसे कत्रा खुशी परिवार रने रहे । कत्रा मजा जिन्डगी रनेरहे हमार । डाडा मै अपन जलम डेना डाइक एक शब्डफे सुनै नैपैनु । एकर दोस मोर बा । डाडा डाइके हटयारा के हो टुही पटा बा ? डाडा डाईक हटयारा मै हुँ मोर कारण डाइक मृटयु हुइ पुग्लिस । यडि मै डाइक गर्भम नै अइटु कलसे मोर डाइ ज्यान नै गुमैने रहे । मही जीवन डेके डाई अपन ज्यान डेहे पुगल । कत्रा ढेर मैया करल डाइ मही यी संसार डेखाइल । मही जीवन डेहल अपन ज्यानके कोइ परवाह नै करल । महि यी संसार म छोरके अप्ने चलगैल । कहिके वर्षा खोपसे रोइ लग्ठिन ।
राजु बाबु हे सम्झैटी हुँकार आँश पोछ्टी सुफ्लैटी कठैं । बाबु अप्ने आपहे सम्हार । अपन जीवनके ख्याल कर । टुहीहे डाई यी संसारमे कुछ करके डेखाइक लग जलम डेके गैल बा । यी जिन्गीसे हरेश ना खा । हम्रिहिन डाइक आत्माके खुशीके लग कुछ कर्ना बा । मजा काम कर्के, एक नमूना बन्के, लावा जिन्गीक् सुरवाट कर्ना बा । बाबु टै अपन काम कर्टि जा मै हमेशा टुहिन साठ डेम कैक राजु बाचा कर्ठै । ओ अपन जिन्डगीक लक्ष्य पुरा कर्के छोर्ना आँट कर्के लागल रठैं । आखिर वर्षा हे एक डाक्टर बनाके छोर्ठै । समाज सेवाके लाग, पीडिट, डुःखी रोगी हुकन सेवा करक लाग । ओराइल ।
बिडाइ
सुनसान राट घर फेन सुनसान असिन सुनसान कि एक सुईगिर्लेसे फेन पटा पैना मेर्के । उह सुन घरम कोठामे अकेली बैठके एक से एक चुरोट सुगैनै, सुर्कने कर कहिन । कोठा चुरोटके ढुवाँसे भरल रहठ टहुँ फेन चुरोट सुर्कना छोर्ले नै रहिट । अलपत्रे जान मिल्ना रहे कि डिनेश के मन डुखल बिन ओ चिन्टिट बटै कना । बहुट गँहिर सोंचमे डुबल डिनेश हाँठेम सुगाइल चुरोट जरके डहे पुगिट । आँखि आँशले रसाइ ओ मन टुटल रहिन । अपन मन ठाम्के वर्षौ से जिन्गि बिटाइ टहिट । अपन मनै केक्रो डोसरके मायामें जिअल रलेसे जिन्गि उडास काहे नै हुइ ।
डिनेशके जिन्गीमे अस्टे घटना घटल रठिन । मासुम बच्चा हाँठ नफैटि रहल अपन जलम डेना डाई छोरके जाइ बार । छुटि भर डाइक दूध पिके बह्रल बाच्चा अाब उहे डाइ छोरके जाइ बेर कसिन लागल हुइहिस उ बच्चाहे । रबिनाके ढुङ्गाके मन होगिल रहिन । एकचो घुमके फेंन नै हेर्लिन् । आखिर काहे अत्रा नफरट इ डुइ जहन से काहे छोरे करल हुहिन ।
बाट यहाँ से सुरु हुइट । बर्षौ से रबिना डुइ लाइमे गोरा टेकल मनै हस जिन्गि कटाइ टहिन । माने रबिना डुइ जहनके मायाँ मे बाझल रहिन ।
रबिना ओ डिनेशके बाबा बहुट मिल्ना संघरिया रलक मारेसे डुनुजे लावा नाट बनालेला । डिनेश ओ रबिनाके घर परिवारमे सबचिज पुगल रठिन ओ एक डोसरहे बहुट मजासे चिन्ल्हे रहिट । काहेकि डुनुजे एक्के गाउँक ओ छुटिसे एक्के स्कुलमे पहर्ना खेल्ना करिंट । रबिना ओ डिनेश अपन मनके बाट एक डोसरसे छुपाइ नै सेकिन ।
रबिना ओ डिनेश केवल बहुट मिल्ना संघर्या रहिट । रविना के डिनेश मिल्ना संघर्या रहिन टर विजय से भोज कर्ना बाचा हुइल रहिन, जीवन संघिरया के रुपमे रोज्ले रही । यी बाट डिनेश हे पटा हो के फेन रबिना हे मायाँ करिट । पटा रलेसे फेन रविना ओ विजयके भोज हुइना असम्भव रठिन कारण रविनाके घरक परिवार विजयहे मन नै परैठैं । विजय गरिब घरके के रठैं, छाइ लगैना मनै कै भाइ बटै कहिके हेरठैं ओ जग्गा जमिन सम्पति कट्ठुक बटिस कैके हेर्ठै । गरिब रलेसे फेंन डिलके सच्चा इमान्डार, नम्र, दयालु स्वभावके लौन्डा रहिट बिजय । गरिब रहिंट मने पर्हल, ज्ञानी रहिट, इज्जटडार लौन्डा रहिट । सब जहनसे मिल्के रना मिलनसार रहिट विजय । उहे मारे हुई रविना विजयसे मैया लगाई पुग्ली ।
एक डिन रविना अचानक अपन भोजक बाट सुन्ली टे हुँकार अनुहार मलिन डेखा पर्लिन । सब डिन हाँस हाँसके बाट कर्ना मनै निराश होगैल रहिन । डिनेशसे सँगे घुमफिर कर्ना मनै कम बोले लग्ली । रबिनाके अनुहार ओ आँखी बटाई टहिन हुँकार मन डुःखी बटिन कैक । रबिना अपन मनके बाट डिनेशके सामु आँश गिरैटी कटिरहिन, डिनेश टुहन सब पटा बा मै विजयसे भोज कर्ना चहठु । जीवन संघरियाके रुपमे राजे सेकल बटुँ टर डिनेश मोर भोज टुहाँरसँग करडेना पक्का करसेकल बा मोर बाबा । टर हम्रे टे केवल संघर्या हुइ ना । रविना विजय हन रोज्ले रहिन कलसे डिनेश रविनाहे अपन डिलमे बैठा सेक्ले रहिट । दिलसे प्यार किरट डिनेश रबिना हे मने कहे नै सेकल रहिट काहेकि पटा रहिन रबिना बिजय हे मन परैठिन कहिके ।
सब कुछ ढिला होसेकल रहिन । डिनेशसे जसिक फेंन भोज करही पर्ना रहिन रविना हे । ढिरेढिरे भोजक लच्क्यागिल रठिन । आजकाल करट भोजक डिन आगैल । डुल्हा रमेश डुल्हीहे लेहे जैठा ओहोर रविना डुल्हिक सिंगारमे संपरके बैठल रठिन । डुल्हा फेंन अपन डुल्ही रविनाकेसँग बैठल रठैं । रविनाके अनुहार खुशी नै रहिन । हुँकार आँखिम आँश टलबलाई टहिन । रविनाके बाढ्यटा रहिन डिनेशसे भोज कर्ना । बहुट रोक्ना चहली रविना भोज हे टर नै सेक्ली । बचन हार सेकल रहिन बाबा । डाइ बाबक वचन पूरा करक लाग रबिना केवल भोजक नाटक करे हस करटहिन । रविना के खुशी छिनगैल रहिन हुँकार मनमे इहे बाट घुम्ठिन । यी कैसिन जिन्डगी लौवन्डिनके अपन जिन्डगीके लाग फेन सोंचे नै पैना । अपन हक अढिकारके लाग फेंन बोले नै पैना । एकचो के जिन्गीफें खुशीसे जिए नै पैना । जिन्गि कटैना टे मोर हो ना, विजयके ठन अब्बा धन सम्तिकिल कम बटिन आरउर चिजमे टे कमि नै हुइट । कहिगिल बा माया जिन्डगी हो । ढन बा मान सम्मान बा टर माया नै हो कलसे जिन्डगी सडा सुनसान रहट । खुशीसे खाइल एक कौरा भोजन फेंन जिउमे लागट कठैं । मन खुशी नै रहट कलेसे सारा जिन्डगी अन्ढार रहट । भोजके पाछे रविनाहे सेकटसम खुशी करैना, पूरा माया डेना प्रयास कर्ठै । हुँकार कुछ फेन कमी नै हुइ डेना कोसिस डिनेश कर्टी गिलै । टर रविना अचानक रोइ पुगिट । अकेलि कवैना करी ।
डिन, हप्टा, महिना करट साल बिट्टी जाइट । रविना एक लरकक् डाइ बनसेकल रहिन टब फेन रविना विजयहे बिस्राइ नै सेक्ले रहिन । रविना विजयहे अत्रा ज्याडा मैया करिन कि अपन सब कुछ अर्पण करसेकल रही । मन्दिर खाइल बाचा से रबिना हे असान्ति करैना करिन । जुनी भर साठ डेना बाचा करके फेंन एक डोसरके हुई नै सेकल रहिट विजय ओ रविना । रविना भोज डिनेशसे कर्ले रहिट टर सारा विजयके ओर रहिन । याड नै अइना ट बाटे नै रहिन वर्षो विजयके माया भुलल् । ठाउँ ठाउँ घुम्लक मिठ मिठ बाट करलक ओ कबु अलग नै हुइना बाचा मन्डिरमे करलक समझके अचानक रबिना रोई पुगी ।
वर्षौ बिटगिल रहिन, एकठो बच्चा जलम लेसेकलमे फेंन रबिनाके उहे हाल रहिन । यी सब बाट डिनेश हे पटा रहिन । जब रबिना एकान्ट ठाउँमे जाके मनके भित्तरसे रोइना करीन, डिनेश कहिंट रबिना आज फे विजयके याड आइटा ना ? । रबिना कहिन डिनेश टुिहन पटैटे बा जब अपन मनैनसे विछोड हुइलेसे कसिन लागट । मही पटा बा टुँ मही बहुट मैया कर्ठो । मोर लाग रुइठो ओ एकपल रह नै सेक्ठो । टर हमार किसमट के खेल कना हो कि डाइ बाबाके जिड्डि, हमार बाट नै सुनडेला डाइ बाबा । आखिर काहे असिक कर्ला, एक डोसरके खुशी ओ ईच्छा बिना भोज कर्ना मजा हो का ? इ बाट मोर मनेम घुम्टी रहट । इच्छा बिना केक्रो फेन जबरजस्टी भोज कर्ना मजा नि हो । जिन्गीक खेल्वार करे नै परल । हम्रे डुनुजे अपन डाइ बाबा के इज्जट बचाइक लाग भोज कर्लि । टर विजय मोर मायामे अभिन सम भोज नै कर्ले हुइट ओ नैकरम कठैं । पागलहस होगिल बटै उ, मोर माया साठ नै पाके । उ बाट बट्वाइ टहिन ओ अाँखिम से अाँशक बुँडा पल्कमसे टप्पसे गिर्ठिन । रबिना बिजयहे बहुट सम्झैठिन हौटसला डेठिन जिना आसा डेठिन खुशी करैना कोसिस कर्टिन ।
डिनेश रबिनाके गोसिन्या रलसे फेन खुशी नै रहि रबिना । केवल भोजक नाटक करल जस्टे रहिन । आखिर रबिनाहे रोके नै सेक्लै डिनेश । रबिना जिन्डगीमे खुशी लाने नै सेक्लै डिनेश । एक डिन छोर्के गैगिली रबिना । डिनेशसे माफी मग्टी बिडाई लेके सडाके लाग नाटा टुर्के उ बच्चा ओ डिनेशहे रुवाके ।
उहे रोज से देनेशके जिन्गिम अंधरिया परगैलिन । उ छोटमोट लर्कक मुह हेर्के रहे लग्लैं । उ बच्चा बाबक कोनम सुटके डाइ कहाँ गैलबा बाबा ? कहे बर दिनेश कहिट मामा घर । कब आइ बाबा डाइ ? पाछे आइ कहिके बच्चक आशा जगैना करिट । रोज अस्टक सु्फ्लाके बच्चाहे सुटैना करिट । लर्का निदैले से दिनेश अकेलि रोइना करिट । उहे रबिना के बिछोडके पल समझके ओ बर्षोसे संगे बिटाइल डिन समझके । दिनेश रबिना हे भुलैना कोसिस बहुट कर्ठै मन नै सेक्ठैं । डिन डसा आउर खराब हुइटि जैठिन । अस्टे अवस्थामे रेनुका दिनेशके जिन्गिम अइना कोसिस कर्ठिन । रेनुका सम्झैटि कठिन मै डेम टुहिन साथ, आप टु लावा जिन्गिक सुरुवाट करो दिनेश । ढिरेढिरे रेनुका दिनेशके मनेम लागल चोटके पिर चोख्ओइना कोसिस कर्थिन ।
कुछ बरस पाछे एक रोज के बाट हो । दिनेशहे बिटल पल बेचैन कारइ टहिन । उहे बिछोड हुइल ओ रबिना हे सम्झैलक एक एक बाट याद आइतहिन । आधा रात अकेली सुन सान रहे चारु ओर । पानी अपन सुरमर बर्सटि रहे । मन जानाइ टहिन आझ दिनेशके जिन्गिम बाज मारक लाग बिटिन । कुछना कुन जरुर हुइना रहिन दिनेसके जिन्गिम । उहे बेला डुवारिम कोइ आइल जसिन संकेट पैठैं । दिनेश ढिरेसे डुवार खोल्लैं ते पानिले जम्मा भिजल रबिना हे डेख्लै । इ सब डेख्के दिनेशके डिलमे बद्रि ठरके हस हुइलिन, अचानक कहाँसे अत्रा रात रबिना कहिके । रबिना दिनेशके पाउमे गिर्लिन ओ सुसकर सुसकर रोइ लग्लिन ।
दिनेश हे रबिना छोरके जाइबर सम्झैलक बाट याड अइठिन । कले रहिंट जरुर घुमके हेर्बो टे रोइबो रबिना, जरुर पस्टैबो । मोर हृदय भिट्टरके मैयाँ महसुस कर्को उ बेला बुझबो मोर मैयाँ कत्रा गहिंर बा । जाउ रबिना तर याद करहो मोर मैयाके सागर हे । तर एकठो मोर इ बाट हरपल याड करहो अगर जिन्गिम छुक सम्सया परि कलेसे टुहार लाग इ दिल डुवार हमेसा खुलल् रहि । एक कलक सम्झटि रबिना उठैटि अपन सिनामे चप्टैटि कलै स्वागत बा रबिना टुहिन । टुहार हर गल्टि पहिलहि माफ होसेकल बा । रबिना रोना बाहेक कुछ कहे नै सेक्ठिन । दिनेशहे पटा होगैल रहिन रबिना उहाँ पिडिट बटिन । गोस्या फेन ओरागैल बटिन, सहारा कोइ नै हुइन कना ।
रबिना रो-रो के माफि मंठिन, दया ओ सहाराके भिख मंगठिन । दिनेशके डिलमे एकठो कोनुवामे हुइलेसे फेन बैठना बास मंग्ठिन । इहे डिनके प्रतिक्षामे रठैं दिनेश । एक रोज जरुर अइहिन रबिना ओ लर्कक अस्रा पूरा हुइहिस ओ अपन डाइक मैयाँ पाई कना । रेनुका फेन रबिना हे स्विकार कर्लिन । नारिनके पिर बुझले रहिन रेनुका । गल्टि हर मनैनसे हुइट । डुनुजे रबिना हे स्विकार कर्ठै ओ एक डोसरहे साथ डेहेलग्ठैं । ओराइल ।
जारक मौसम रहठ् डिन ढिरेसे निक्रट अपन केर्नी चारुओर फैलैटी । जारेले सारा मनै सुुइसुइ–सुइसुइ कर्टि कोइ आगि अगोर्ले रठै टे कोइ गुड्री घुमुर्ले पट्ठिरिम चिम्ठाइल रठैं । जस्टक डिन निकरट ओ डडुर केर्नी फेकाइ लागट टे मनै घरेम से निक्रे भिरठाँ घाम टापे । कोइ घमौनी बैठल चिल्लुर हेर्ठै टे कोइ गाला मार्के बैठल रठैं । कोइ घरक अँगनम रठै टे कोइ डगरेमे बैठके गाला मारल रठैं । सबजे अपन-अपन ढुनमे रठै । कोइ हाँसट टे कोइ बटवाइट । डगरमे मेरमेरिक यात्री ओइने अपन सुरमे रठैं । लर्का अपन बगालसँग खेल्ठाँ, जवान अपन बगाल सँग रमेठैं ओ घरक टर्निन अपन-अपन घरक कामक् बाट बटओइटी गाला मरल डेखा परट ।
शनिच्चरके डिन रहट । उहे डगरमे ७०/७५ उमेरके बुह्राइल सुमित्री चौधरी घुँघुर मुँघुर लुगरा ओहेरले ढिरेढिरे अपन पैला सर्टी नेंगट डेखा परठिन । हाँठेम टेक्नी पकरले चारपाँच पैला नेगिन फेन ठरहया जाइन विचारी । रोगिहा शरिर ओ गोरामे बिरुवक पट्टि बाँढल रठिन । सेक नै सेक कैके जिन्डगीक सफरमे रहिन सुमित्री । सारा डुःख पिडासे संघर्ष कर्टि उ डगरमे यात्रा करटहिन । मात्र एकठो आशा लेके, कबु निरासा नै करैना । मृट्यु पाछे जरुर स्वर्गमे रहे पैम । जहाँ कबु डुःख नै हो । उ ठाउँ सोनक डगरमे नेंगम । मोटीले सजल डुवार सोझ पैठके । सोनक बनाइल घरेम रहे पैना पक्का विश्वास ओ आशा कर्के । दु:खके सफर हे आनन्दके समझ टहिन सुमित्री । दु:खी जिन्डगी कष्टमय यात्रा रलसे फेन अनुहार मे उहे आसा बिल्गाइ तहिन ।
सुमित्री डगर यात्रामे बिसाइक लाग एक घचिक ठरह्याइन ओ लर्कन हे खेलट हेरिन । सायड उ बेला सुमित्री हे अपन बचपनके याड आइल हुहिन । अपन छोटमे खेल्लक रमैल जवानी के उ पल झलझली आइल हुहिन । हर मनैनके चाह रहट कि फेन उहे डिन उहे जवानी, उहे खुशीक पल घुमके आइट कना । मने उ डिनके बाट केवल कहानी (बटकोही) बनजाइट । सुमित्री फेन अपन बिटल डिनके रमाइलो बाट करके हँस्ना करिन ओ डुःखके पल समझके आँश गिरैना करिन ।
दाङ, डेउखरके चैलाही गाउँक, सुखी परिवारमे जलम हुइठिन सुमित्रीके । रोइटी यी डुनियाँ मे प्रवेश हुइठिन । उ चैलाही गाउँक टोलमे लर्क रुवाइ सुनजाइठ उ रुवाइ सुमित्रि के रठिन । दाङ जिल्लाके लमही बजारसे पुरुब डख्खिन पर्ना चैलाही गाउँमे बहर्ठिन सुमित्री । छोटिएसे छमछम चटपटहा बटकहर रठिन उ । उमार थरके परिवारमे जलम लेलिन खैलिन पिलिन बर्हलिन । करिब २००२ साल ओर सुमित्री चैलाही गाउँक भुमीमे बर्हलिन पहुर्लिन हँस्लिन खेल्लिन । आजसे करिब ७०/७५ साल पहिले उहे चैलाही गाउँ ठाउँ मै अपन गोहिनसँग हँस्टि रमैटि जवानि बिटैठिन । चम्पन चैनार गाउँ नाचकोर फेन खोपसे हुइना । लहंगा, चोलिया, टरिया, सुटया, माला झिलमिल्यासे संपरल बठिन्यनके बगाले बगाल नै नेङनाटे बाटे नै हो । उहे गाउँमे सुमित्री जवानी बिटैठिन । टीन बहिन्यामे से मझली रहिन । डुई भाइ ओ डाइबाबा मिलाके साट जहनके खुशी ओ सुखी परिवार रहिन ।
परमेश्वरके बनाइल रिट अनुसार सुमित्री के भोज दाङ, डेउखरके सटबरिया गाउँमे हुइ पुग्ठिन । अप्ने बैसन मने डुल्हा भर्खरिक अनारी अपनसे पाँच छ बरष छोट रहिन । डाइ बाबाके आडर कर्के सुमित्री भोज कर्नामे राजी हुइठिन । पहिलक चलाउ अनसार डाइ बाबा के मन पर्लेसे भोजके लाग पक्का करडेना करिट । पाँच भाइमे सबसे बर्की बने जैठिन सुमित्री । सस्रार घर फेन खानपिन सक्कु पुगल परिवार रहिन । कुछ वर्ष पाछे सुमित्री सन्टान जन्मैठिन । एक–डुई करट पाँच लर्कनके महटारी बनेपुग्ठिन । डुईठो छावा टिनठो छाईन के डाइ बन्ठिन । सुमित्री अपन लर्कनके मजा डेखभाल कर्ठिन । हुर्कैठिन बहै्रठिन डाईकब मजा भूमिका पुरा कर्ले रहिन । कारण बस अपन लर्कन स्कूल डेखाइ नै सेक्ले रहिन । अप्ने फेन स्कूलके मुह टक नै डेखेपाइल रहिन । ज्या जसिन हुइलेसे फेन सुमित्री अपन लर्कनके सक्कु चिजमे ख्याल कर्ले रहिन ।
यह क्रममे अपन बालबच्चाके भविष्यके सुख सुविढाके लाग दाङ डेउखरके सटबरियासे कञ्चनपुरके भुराकोट गाउँ ओर बसाइ साराइ कर्ना सोंच बनालेठैं डुनु प्राणी । सुमित्रीके गोस्या सन्टराम उमार जब कञ्चनपुरके बेलौरी क्षेत्र ओर बसोबासके लाग ठाउँ टयार करे आइल बेला सुमित्री सटबरिया अकेलि बहुट बाट सुन्वा पैलिन । उ बेला सुमित्री के मन डुखे पुगल रहिन ओ खोप रोइलिन । सुमित्री अपन लर्कनके बहुट ख्याल कर्लक ओरसे लर्कन लाग कुछ करे पर्ना सोंच्टी रठिन । कुछ डिन पाछे सन्टराम सब व्यवस्ठा मिलाके अपन परिवार सारा बाल बच्चा लेहे अइठैं । ओ दाङ डेउखरके सटबरियासे अपन सारा परिवार लेके बुह्रान ओर प्रस्ठान कर्ठैं । लम्मायात्रा कै रात डिन लगाके बुह्रान पुगठैं । सुमित्री अपन गोस्यक पाछे-पाछे अप्ने सब जहनके लुगा भौंकामे हुर्के ढर्ले रहिन उहे भौंका कपारिम बोक्ले ओ पिंठिम छोटमोट लर्कन बोक्ले बरे साँसट से यात्रा कर्टि रहिट । ओर सन्टराम ढुङ्गरोहुवा कुसुम्या फेन भठ्ठामे छिट्वा झुलाके डुनु पाँजर अपन छोट-छोट डुइठो लर्कन भर्वा बनाके बोक्ले टीन डिन टीनराट, जहाँ राट ओहे बास, लेटी कञ्चनपुर बेलौरी पुग्ठैं । दाङ डेखउरके सटबरियामे अपन डाइ बाबा भैया भटिज्जान हे छोर्के । अपन जलम घर छोर्के । जलमलक ठाउँक माया लाग्के फेन बाध्यटाले लावा ठाउँमे अपन पैला टेक्ले रहिन सुमित्री । गाउँ ठाउँ सबकुछ लावा रहिन उ परिवारके लाग । एकठो छोटमोटी बुक्रासे शुरु हुइठिन । उ परिवारके जिन्डगी । लावा ठाउँ आके खैनाके लाग काम करे पर्ना रहिन । सुमित्री ओ सन्टराम अपन परिवार पालक लाग कमैया लाग्के बालबच्चा पल्ठै । कुछ वर्ष अस्टकेजीवन गुजारा हुइठिन सुखी खुशीके सँग खेटी रमैटी आनन्ड कर्टि रठैं ।
लावा सोच ओ योजना
हर डाइ बाबाके अस्रा रहट बच्चा भारी हुही ओ हम्रहिन सुख मिली कामकाजमे साठ मिली । छावा बाबाके काममे साठ ओ छाइ डाइके काममे साठ डेटी जैठा । सुमित्री अपन लर्कन कबु भुखे रहे नै डिन । कुटना, पिस्ना खैना पिना बनैना बस काममे डरगर रहिन । कुट्ना पिस्ना हुइलेसे राट्टी उठे पर्ना । ढेंकीमे घन्टौं सम घामे गरौओर हो के निनके मारे ओघा-ओघा ढान कुटके चौरक भाट खओइन । चक्यामे डिनभर लगाके गोहुँ पिस्के सन्झा एक छाँक रोटी खओइन । मुरघक कुकुरी काँ कना बोली के सँग सुमित्री कुटे पिसे भन्सा करे उठिन कलेसे सन्टराम भिन्सरही हर मच्याके खेटवा ओर लग्ना करिन । असिके अपन परिवार बालबच्चा के हेरचाह कर्टि जैठा । सुमित्री के कोख से फेन से छाइ ओ छावा के जलम हुठिन । सुमित्रीके कोखसे जम्मा मिला टिनठो छावा ओ चारठो छाइ जलम लेठिन । (चारठो छाइ मेसे मझली छाइके कोखसे संगम चौधरी हरचब्बा के जलम हुइठिन ।)
सुमित्री के लर्का जस्टक जवान हुइटी जैठिन ओस्टक सब लर्कनके भोज कर्टि जैठिन । छावनके लाग पटुहिया लन्ना ओ छाईन हे बिडाइ करैना । सुमित्री सक्कु छावा छाइनके भोज कर्के अपन डाइक जिम्मेवारी कर्टव्य पूरा कर्ठिन । जिन्गिक सफर अनौठो ओ कष्टमय करटहिन । मन शान्टि, सन्टुष्टि नै रहठ कलेसे सारा जिन्डगी सुन्य लागट । केक्रो उटसाह ओ कोइ चिजके आशा रहट कलेसे जिन्डगी जैसिन डुख अइलसे फेन मन कबु निरासा नै हुइट । सुमित्री के फेन एक चिजके अस्रा रठिन । हरडम कना करिन डुःख पाछे सुख जरुर आइट । मनैनके हेल्हा मजा हो मने भगवानके मजा नै हो कहिके हरडम कहिन सुमित्री । सुख डुःख जिन्डगीक सफर कर्टि २०६५ ओर अपन जिन्डगी ख्रिष्ट येशु म अर्पण करडेलिन । संसारके ज्योटि कहला जिना ख्रिष्ट येशुके बचनमे आशा विश्वास भरोसा कर्के जिन्डगीक् सफरमे परगा सरठिन । करिब टीन घण्टा पैरल नेंङके बेलौरी भुराकोट से पुनर्वास अमरैया जीवन मण्डलीमे ख्रिष्ट येशुके आराढना करे पुगिन सुमित्री । कारण सुमित्री अपन सारा मनसे अपन सारा टनसे, अपन सारा समझसे सारा संसारके सृष्टिकर्टा परमेश्ववर हे प्रेम करिन । सुमित्री अपन श्रीमान् सन्टरामहे बहुट माया करिन । बहुट ख्याल करिन, सेवा सुसार कर्ना करिन । सुमित्री पहुननके बहुट मान सम्मान कर्ना करिन । कौनो पहुनन फेन अपन हाँठक रिझाइल बिना नै खओइले बिडाइ नै करिन । डया मायाले भरल कोमल हृडयके रहिन सुमित्री । बुह्राइल अवस्ठामे फेन ख्रिष्ट प्रभु येशूमे रमैना करिन । मुहारमे खुशी आनन्ड डेखा परिन । परमेश्वरके आज्ञाकारी जीवन बिटैटी गैलिन । छोटमोटी बुक्रा रलेसे फेन खुशी आनन्डके जीवन बिटाइ टहिन । हरेक हप्टा एक बगाल ख्रिष्टियन जवान लवण्डा लवण्डी उहे सुन्डर बुक्रामे खुशी आनन्डसे गीट गाके संगटी लगैना करिंट । अपन मझली छाइक छावा नाना संगम चौधरी ओ बुडु सिलास चौधरी लगायट सारा बगाल हे बहुट मान सम्मान करिन । मिठ मिठ खैना बनाके खओइना करिन । ओ बहुट खुशी हुइना करिन । बुह्राइल अवस्ठामे आके जवान ओइनसे रमाइ पाके हँस्ना खुशी हुइना करिन ।
सुमित्री अपन जवानी मे बिटाइल पलके कहानी सुनैना करिन । अपन गोहिनसँग हस्लक खेल्लक बाट कर्के हँस्ना करिन । दाङ, डेउखर चैलाही गाउँक बयान कर्ना करिन । छोटमोटी परिवारमे जलम लेके रोइटी यि ढर्टीम प्रवेश कर्लिन सुमित्री । केकर का पटा जिन्डगीक सफरमे कौन मनैया कहाँ पुगट । अस्टेक सुमित्री हे फेन जिन्डगीक सफर कहाँसे कहाँ पुगा सेकल रहिन । अपन जलम डेना डाइ बाबा छोर्के, हस्लक हुर्कलक घर छोर्के पराइ घर जिन्गी काटे पर्ना । कत्रा रोइल हुहिन सुमित्री अपन डाइ बाबाहे छोरे बेला । नै चाहके फेन अपन डाइ बाबा घर डुवार छोर्के पराइ घर जाके जिन्गी बिटाइ पर्ना ।
सुमित्री अपन जम्मा लर्कनके भोज कराके ओइन हे अपन अपन जिम्मेवारी सौप डेठिन । ओ अपने कष्टमय जिन्डगीक सफरमे रठिन । सुमित्री शरिरमे कमजोर हुइटी जैठिन । बेराम पर्ठिन टब फेंन अपन पैला नै रोक्ठिन । सेक नैसेक कर्के अपन कर्ना काम कर्टि रठिन । जिन्डगिक् अन्टिम साससे लरटिरठिन सुमित्री । अपन मनैनसे हँस्लक बाट कर्लक ओ चर्चमे सारा विश्वासिन सँग संगटि करलक येशुके गिट गैलक समझके आखिमसे आस गिर्ना करिन । बल टागट रहल बेला घाम पानी जार सहके बेलौरी भुराकोट गाउँसे पुनर्वास अमरैया जीवन मण्डलीमे परमेश्वरके आराढना करे अइना सुमित्री जिन्डगीक अन्टिम साससे संघर्ष करटिरठिन । सुमित्री छ घण्टा आहोर डोहोर करके अपन छाइ डमाड ओइनसे भेट करे ओ संगटी करे पाइलमे खुशी हुइना करिन । अपन नाना नानी आजा आजिनसँग भेटकरे पाके हँस्ना करिन सुमित्री ।
जब सुमित्री कमजोर हुइलिन, बुह्रागिलिन ओ हाँठेम टेक्नि लग्लिन उह बेला सुमित्री अपन छुटिमुटि बुक्रामे एकान्ट एक कोन्वा मे बैठके अपन बाल बच्चा नाटि नटिन्या ओ अपन सक्कु परवारके सुरक्षा, शान्टि मेलमिलाप ओ हरेक काममे प्रगटिके लाग रो-रोके येशूसे प्रार्थना कर्ना करिन । सुमित्री चाहिन मोर अपन सन्टान, अपन मनै येशूमे अनन्ट जीवन पाइ सेकिट सुमित्री हे पटा होसेकल रहिन कि मोर जिन्डगीक अन्टिम आसेकल बा । एकर पाछे महि जाइ पर्ना बा । यि संसारसे सडाके लाग । यि बुक्रा छोर्के उ स्वर्गके घरमे । जहाँ कबु डुःखके आँस नै गिरी । जहाँ कबु राट नै परी । उहाँ कुछ चिजके जरुरट नैपरी ना डिनक आजरार चाहि । सडा खुशी आनन्डके घर रहे पैना आशामे सुमित्री जिन्डगी अन्टिम साससे संघर्ष कर्टि खटियामे छटपटैटि रठिन । शनिच्चरके रोज सारा ओ चर्च मे परमेश्वरके आराढना हुइटहे । सुमित्री जुन अपन बुक्रम अन्टिम साससे लर्टि रहिन । हर शनिबार येशुक आराढना करे चर्च जैना सुमित्री खटियामे छटपटैटि येशुक नाउँ मनेम गुन्जठिन । सुमित्री उहे रोज जिन्डगीक अन्टिम सास ख्रिष्ट येशू छोर डेठिन । मिटि २०७२ चैत्र ६ गटे शनिबार सुमित्री यि डुनियाँसे सडाके लाग अपन लर्कन अपन श्रीमान् अपन सारा मनैन छोर्के स्वर्गके घर चलगैलिन । सुमित्रीके चाहना रहिन मै जहाँ रहम मोर लर्कनहे फेन उहे ठाउँ डेखे पाउँ । मोर छाटिक डुढ चुसाइल अपन लर्कन हे रो ढोके, भुख्ले प्यासे होके हुर्कैनु उ लर्कन स्वर्गके घरेम सँगे रहे मिले । यि ढर्टिम संगै रहे नै पइलेसे फेन सडाभर स्वर्ग घर रहे पैना चाहना रहिन सुमित्री के । यि चाहना के लाग सुमित्री राट डिन रो-रोके प्रार्थना कर्ना करिन ।
मोर नानिक कहल अमर वचन महि आझ इ ठाउँ पुगैले बा । साटठो लर्का टीन भाइ ओ चार बहिन्याके पुर्खा सुमित्री । अपन मझली छाइक कोखसे जलमल मै संगम चौधरीहे छोटीमे कना करिन नाना पह्राइमे ढयान डिस । पहरबे टे अपनलाग पहरबे । अपन जानल ज्ञानगुनके किटाब पहर्टि रहिस् । ओ लिख्नामे कलम चलैटि रहिस । नानिक आशिर्वाद! पाइल मै संगम हारचब्बा ।
ओराइल ।
धन्यवाद!
एक टिप्पणी भेजें
0टिप्पणियाँ