डसिया के बटिया

कुछ बरस पहिलक बाट हो डसिया हेर्ना बरे मन लागल रहे काहेकि नम्मा समय टक गाउँ भवाइल लागे एक गाउँ टे का सक्कु गाउँ सुन लागे । 

कोरोना माहामारि के कारन सक्कु मनैनमे डु:ख ओ डर फैलगैल रहे मरैना टे डुरिक बाट हो । बाट २०७८ ओरिक हो कोरोना सारा डुनिया हिलाके गैल रहे मनै मनैन से डरैना बेला  रहे राहरंगि कर्ना टे डुरिक बाट हो ना मजासे भोज करे पैना ना संगे बैठके खाइपिए पैना एक डोसर हे डेख्के खरक्के नेङना डिन रहे । अपन नाटपाँटन से भेंट कर्ना फेन जाइ नै पैना, जैना टे बरे डुरिक बाट हो कोइ मनै घरेम आनाजाए कना डर रहे कि कहुँ कोरोना लेके आइल बा कि कना डर हुइना । 

माहोल अस्टे रहे मने सब जहनके चाहना रहे इ रोग हलि भागे कना ओ सक्कु ओर सान्ति आए कना । घरेम रहट रहट मिच्छावन लग्ना नेङनास घुम्नास लग्ना मने कहाँ जैना कसिक जैना जाउँ कलेसे अपन फेन कोरोना सिल्गि कि कना डर ओ औरे जे फेन कोरोना फैलाई आइल बा किहिके डराके  डुरे भग्ना इहिसे टे घरहिं पलिरना ठिक । 

माहोल सान्ट हुइटि गैल ढिरे ढिरे पुट्ठा हिलैटि घरक केवार पकरके मनै झक्याके अङ्गना ओ गल्लिओर चिटाइ लग्लै । संपरके ढिरे ढिरे परोसिन घर खेले जाइ लग्लै ओ अपन मनक डु:खी भावना ओ जिन्गिक कहानि सुनाइ लग्लैं । गोटगाट ठाउँ घिल्टुङ घिल्टुङ मन्डरा बोलट फेल सुन परे लागल, भल्नमसान अंङ्गना ओर डशैहिया पैया लगुइयन पट्निपाँट नेगे लग्नै। कोइ लहंगा चोलिया मे टे कोइ गोनिया चोलिया घालके संपरके छोक्रा झुम्रा सखिया नाचेम पुट्ठा डुम्कैटि कुम्हा चम्काइ लग्लैं । मंडरिया काकु उलर उलर मंडरा बोजाइ लग्लै गित गउइया ठोपरि मार मार के उलरे लग्लै । 

भलमन्सा, बरघरिया, महटावा ओ गुरुया ढरहरिया ओइन हे टीका लगैना सुरु होगैल रहे । माठेम टीका कानेम झोटिम जेउरा घालल बरे सुहावन ओ सबके मुहार मे खुशि डेखा परे लागल । ढुमढाम से भोज काज मे बाजा मागर गित मन्के लागल । जहोेर टहोर मेला सेमिनार लागे लागल । चेलि बेटि लैहर पहुनि खाइ जाइ लग्लै लौला डुल्हा ससरार जेंउरा लगाइ जाइ लग्लै । खुशिक बाट टे काबा कलेसे  छोट रहलमे डसिया आए टे लावा लावा लुगरा घालके मामन घर जाइ मिले । बरे खुशि माइलो लागे ढिक्रि पुजट मुर्घि पुजट डेक्के । सक्कु ओरसे नाटपाँट जुटिंट गाउँ चैनारे लग्ना एक और डशैहिया नाच टे एक ओर ओजरिया रात मे आउर मजा लागे । 

अभिन फेन याड आइट एक बगाल मंडरिया  अंङना भरल नचुनियन  रहर लग्टिक छिट्कल रना । सखिया नाच घाम ना जार ठिक्के सिजन मे ओ संपार रहल बेला नच्ना रलक मारे अस्टिम्कि फरहार पाछे नाचे भिरजिना सखिया नाच कन्हैया के लिला ओ पांन्डव ओइनके जीवन कहानिक गित मे पूरा हुइट । सखिया नाच थरुनके सबसे लम्मा नाच कहिके फेन कहिजाइट । सखिया सामुहिक नाच रजक मारे मंडरिया नचुया ठंरिया बठिन्या के हगिर सम्बन्ध फेन करैना करट । अबक जमनामे सखिया नाच नै नच्ना के कारन गाउँमे मंडरिया नै हुइकल बाट किल सुन परट । नचुनिया टयार बटै टर मंडरिया नै हुइटैं । कहुँरो गित गउइया मोह्रिन्या बटै टर नचुनिया मंडरिया नै हुइटै । कहुरो नचुनिया मंडरिया  बटै टर मोह्रनिया नै हुइटै । मन टे लागट डसिया मे उलर उलर मंडरा बोजैना टर सखिया नाचक बटिया हेरट हेरट डसिया ओराजाइ । भल्मनसान अंङना सुनसाने रहजाइट ।

संगम चौधरी ....✍️