जिउ बजाइक लाग ज्या काम फेन करना मोर छोटहि से बानि बा डु चार रुपयक् लाग धान गहुँक सिल्हा बिने जाउँ । डाइ बाबा से रुपया मागु टे काहा पैना हो कहिट टे मिठाई खाइक लाग घाम जार कुछ नै मानके झोला लेके सिल्हा बिने निकर जाउँ । मुसनके बिलम से ढेर ढेर धान निकार नानू । जस्टक भारि हुइनु बाबा हर जोटे मै पाछे पाछे नेगु बरेमजा डेखु माटि बिल्टट् । हर ठम्ना मेरिक हुइनु टे बाबा महि जोटे सिखाइ लागल । कहे हर जोटे जन्बे टब भाट खाइ मिलट खेटि करे सेकजाइट । मै ढिरे ढिरे हर जोटे लग्नु बाबक संगे खेटि कर्ना सिखे लग्नु जोट्ना खोड्ना लगैना । अपन मेहनट करल चिज डेखे लग्नु महि खुशि लग्ना हुइल ।
छोट मे रहर लागे खेल खेल काम करजाए । जस्टक भार हुइटि गैनु ओस्टक काम कर्ना जरुरि होगैल । काम कैलेसे सब कुछ मिलट खाइक लाग लगाइक लाग ओ डु:ख बेराम पर्लेसे रुपया चाहट कना अक्किल आइल । मोर जिन्गिम भारि भारि योजना सपना तयार हुइ लागल सब कुछ करक लाग रुपया चाहट रुपया बिना कुछ करे नै सेकजाइट अस्टे अस्टे भावना मनेम खेले लागल । मै माटिक संग गहिंर सम्बान्ध बनाके ओकरे संग खेले लग्नु मै पटा पासेकल रहु माटि बिना इ डुनिया मे कुछ नै हो । सबसे पहिला परगा टेकक् लाग धर्टि चाहल रहे उहे धर्टिमे मै लोटके बहर्नु धुर हिलासे लटपटाके खेल्नु इहे मे जिन्गिक सुरुवाट सुइलस ओ जन्नु अन्ट फेन इहे धर्टिम बा ।
महि एक एक मुठ्ठा माटि भारि किमटि लागल काहेकि टिना टकारि उहे टक मुठ्ठा माटिसे जिअटहे । जब मै एक किसान बन्नु टब जन्नु अनाज के एक एक गुडक् मोल । जब माटिक बियाँ गिरैना हुइट उ बियाके लाग माटिहे कसिन बानाइ परट कना काहेकि बियाँ से हमार जीवन गुजाराके लाग खैना ओ लगाइ लाग बेच्ना चिज टयार सुरु हुइट । बियाँ जमैना सबसे जरुरि रहट ओकर पाछे हर रोज ओकर स्यहार सुसार करके उहीँ बह्राइ परल एकर जिन्गि फेन हमारे जस्टे बहुट । संघर्स करके फारा फरेैना कोसिस करट ।
किसान ओइनके पहिला मैयाँ अपन लर्कन पर रहट कलेसे डोस्रा अपन खेटिक वारि बेउरा के । जस्टक अपन लर्कन सेवा करे परट ओस्टके टिना टाउवन अनाज के । महि खुशि का लागट कि किसान काम के लाग कौनौ डिग्रि करे नै परट एकर परमाण हमार पुर्खा बटै ओइने हर जोट्ना डिग्रि करले नै रहिंट टभु फेन भारि भारि परिवार बाल बच्चन पल्लै ओइन हे आज इ आढुनिक डुनिया मे रमैना मौका डेलै जोन हम्रे फेन हुइ । आझुक डुनिया मे रमैना मौका हमार आजा पुर्खा हुइट । ओइन के डु:ख के झक्याके हेर्ले बा ! सब जे अब्बक डुनिया के रमझम मे हेराइल बटै के करटा अपन जलम डेना डाइ बाबा के सम्झना ! उहे ओक्रे सम्झना बा मोर अत्रा हजारके मोबाइ काहाँ बा उ बिना मोर कामे नै हो । के करटा उ किसान डाइ बाबाके इज्जट जे घाम पानी जार के प्रवाह नै करके पेट भर खेैना जुराइटै तर आप के मानुस माटि खेलाके कुछ नै हुइ कठै साइड इहे मारे हुइ बजार मे पलास्टिके चाउर के प्रचार हुइ भिरल बा । पहिलक जसिन शुद्ध खैना चिज नै मिल्ठो ।
उहे मारे कठै जंगरक सु:ख पेटक डु:ख । महि मन पर्ना सबसे मजा काम खेटि हो खेटि से मानुस जिन्गिक अर्थ बुझजाइट काहे कि खेटिसे मानुसके जुनि सुरु हुइल हो खेटि करुइया पेट भर खाके सु:ख निनसे सुटे सेकट । हम्रे डुनिया मे सब काम करके रुपया टे कमाइ सेपब टर खाइक लाग उहे एक किसान के पसना चुहाके उत्पादन करल चिज अनाज, टरकारि ओ फलफुल के जरुरट परट । सलाम कर्ना चाहटु सक्कु किसान हे ।
संगम चौधरी...✍️
एक टिप्पणी भेजें
0टिप्पणियाँ