परिचय
छापा खेटि कलक झाला, पैरा, टिल्झा, खर ओ कुहना मेरिक चिजले छोपके कर्ना खेटि हो । हमार देश गाउँ ठाउँ म धेर जसिन टिमा लगाइल ठल्हा छोप्ना, अडुवा, घुइया, हर्डिक सुर्हा छोपल पाजाइट् ।
खु्ला मटि किल रलसे धेर समस्या टिना टावन म डेखा परट । माटिहे पानी पुहाडेना, घामले खुडेना । ज्यडा हावा लाग्के सुखा डेनाके कारन माटिम रहल फाइडा कर्ना जिवहुक्र नास होजैठ । टब ओरसे माटि बिग्रना ओ फेर डबल मेहनट लग्ना ओ डुख भोगे पर्ना हुइट् । यह ओरसे असिन समस्या हुइना से पहिले छापा डर्ना मजा रहठ् ।
छापा के फाइडा
) ओडि पलिरना ओरसे पानी डहकारे कम पर्ना ।
) माटिक उर्वराशक्ति बह्रेना के संगे माटिक संरक्षण हुइना ।
) घाँस जामे नै पैना ।
) मटिक टापक्रम ठिक्के करैले रना ओ ट्ल्वक जरक बिकास करैना ।
) माटिम रना रोगके रोग ठाम कर्ना ।
) माटिम रहल जिबाणु तथा सूक्ष्म जिवाणु हुँकन खाना ओ संरक्षणके व्यवस्था करैना ।
) माटि भरहर ओ मलगर करैना ।
) माटि उइर्ना टिना टाउन हे घामले बचाके काइल करैना ।
) कोर्ना जोट्ना कम करेपर्ना ।
) समयको ओ खर्चके बचट हुइना ।
छापा खेटि कर्ना टरिका
छापा खेटि डुई टरिका से करे सेकजाइट । हमार गाउँ घरेम कर्टि रहल छापा खेटिहे अस्थायी छापा खेटि कहजाइट । इ बाहेक स्थायी तरिका से पाछा डर्लसे माटिक उर्वराशक्ति वृद्धि होके रकम उत्पाडन म वृद्धि करे सेकजाइट् ।
१) अस्थायी छापा खेटि
अस्थायी छापा खेटिम कुछ डिनके लाग किल डारजाइट् । झाला, टिल्झा, पैंरा, खर अस्टे चिज मजके संगे जोटल तथा कोरल जग्गा म बाली लगाके छापा डारजाइट् ।
गाउँ घरम खेटि करुइया धानक बियाँ बुइबेर झाला, पैंरा, खरके छापा डर्ना कर्थैं । अस्टकौ टिना तरकारिक बियाँ डारेबर फेन सुखाइल घाँस पैंरा खरके छापा डर्ठैं । विशेष कैके अालु नसुन प्याज अन्य टिना मे छापा डर्लसे ढेर फाइडा रहट् । टर बाली टयार हुइट सम छापा सर रहट ओ कनजोट करेबार माटिम मिलैना मजा होरहट् ।
२) स्थायी छापा खेटि
स्थायी छापा खेटि मे जग्गा मा सरल नै सरल कइल सुख्ल मिलाके ठुलके डारके ओकर उप्पर टिना टावन लगैना टरिका हो । इ टरिका से बर्समे डुइछछो किल काइल छापा डर्लसे पुगट् ओ जोटे नै परट् । असिके स्थायी रुपमे छापा डर्लसे मटिम ओडि पलिरहट् । मटिक उर्वराशक्ति वृद्धि हुइना हुइट् । घरि घरि खनजोत करेनै परल ओरसे पैसा समय ओ मेहनट कम हुइना रहट् ।
स्थायी खेटि कसिक कर्ना टे
क) टयारि कर्ना टरिका
- अन्टिम पटक जग्गा जोट्लेसे पुगट् । अगर माटि भरहर ओ मलगर बा कलसे नै जोट्ले हुइट् ।
- मजासे सरल मल जग्गम पाटिर से डारे परट् ।
- एकर उप्पर सुखाल अथवा आढा सरल झाला पैंरा अथवा टिल्झा एक बिट्टा सम ठुल डर्ना । टब छापा हे पानीले भिजैना ।
- एकर पाछे काइल पाछे वारि पनैलक घाँस अथावा मेर्वा मनिक रौनिया झाला डारके फेर पानीले भिजैना ।
- आब बालिलगाइ सेकजाइट् ।
ख) बियाँ अथवा टेल्वा कसिक लगैना
- टिस्लोस किल्लाले भुइयाँ सम्म डोडर बनैना ओ हिलाके भारि करैना ।
- डोंडर मलगर माटिले आढा सम भर्ना ।
- उहाम बियाँ अथवा टल्वा ढ्यान लागाके डरे परट् ।
- टेल्वाहे डहैटि रहेपरट् ।
छापा डर्ना सिजन
स्थायी छापा डर्ना सबसे मजा बर्का ओराइट टब हो अथवा भदौ मे डर्लेसे हुइट् । काकरेकि इ बेला मटिमसे भाफ निकरके सेक राखट ओ ओडि पलिरहट् । छापा डर्लसे ओडि ढेरडिन सम पलिरहट् ।
एक टिप्पणी भेजें
0टिप्पणियाँ