ढकिया

ढकिया

ढकिया हमार थारुनके पहिचान मानगैल बा । हरचाली कर्ना बहानामे इ गोंरि बिन्ना काम कैजाइट । थारुनके जन्नि जात इ काममे धेर ध्यान लगैना काम कर्ठैं । गोरि बिन्ना नाउँसे ढेरमेरिक चिज बनैना करजाइट । जस्तके ढकिया, भौंका, नुइया, पैन, अस्टके ढेरमरिक चिज बनाजाइट । इ चिज सादा ओ पनुवा डारल रहट । पनुवा मे घोरि-घोरा, मजोर, पंखा जसिन चिज लाल, काइल, भंटहिया मेरिक रंगके कसुङ्गाले पनुवा डारल डेखजाइट । मने अबक दिनमे उँन ओ पलासटि बेलसल डेखा परट ।

मै यहाँ पलासटि बेलसल ढकिया के बाट करे जाइटु । अप्नेनहे ढकियक फोटु फेन डेखाडेले बटु । इ ढकिया पुंजा ओ कट्टा उघिलके निकारल सुटरि हो। जोन लाल काइल उज्जर पियर रंगके बा । असिके काम नै लग्ना चिजहे लावा चिज बनाके बेल्सना भारि मजा बाट हो । अब्बा आधुनिक समय में मेरमेरिक पलासटिक भाँरा बर्टन अइलेसे फेन ढकिया बोन्ना ओ बेलसना चलन छुटल नैहो । काहेकि ढकिया हमार समाजमे सगुन के रुपमे हेरजाइट ।

उहे मारे ढकियामे झालर डारके डेल्वा बनैना करजाइट । डेल्वा के उप्परके डिउँमे फुन्ना बनाके झालर लगाइल रहट । डेल्वा कोठाहे सुहाउन फेन बनैले रहट । कार्यक्रम के बेला टेबुल हे सोहाउन करैना फेन डेल्वक-ढकियक भारि भुमिका रठिस ।

                      -संगम चौधरी