डुर ना हुइहो

कोइ दिन रहे एक जहन बहुट मैया करु । उ फेन महिन ओत्रै मैंया करीन जस्ते लागे । समय गुजरट गैल, समय अन्सार सब कुछ कोइबड्लट गैल । रात बिटठ् दिन आए, दिन बिते रात आए । अस्तके मन फेन, करोट लेटिगैल । नै सोचाल चिज फेन बाँकी नै रहल, समय असिक करोट लेहल कि !

 

जब मै मुम्बई से दुई बरस पाछे अपन गाउँ अइनु, सब कुछ बडल गैलरहे । उ फेन महिसे दुर हुइना बाट करे लग्लीन, कारन पता नै रहे महि । अाखिर काहे असिक करटो कहिके पुंछु तो जवाफा नै मिले । हप्ता दिन बिटजाए मने कुछ जबाफ नै मिले, एकर पाछे मै एकथो चिठ्ठिक सहारा लेके मनक बाटबटैनु तो अोहोरसे जबाफ आइल जहाँ असिक लिखल रहे... तुहाँर बन्के मै कसीक जिन्गि बिटैम? ना धेर जग्गा हो ना कुछ । चार चार भाई बटो, महिनहे का रोडमे सुटैबो ? इ जबाफ से मोर मन हावा भरल सिसक बोटल फेहस झराक से हुइल । सार मनक सपना धर्तिम बिखर गैल । आँखिमसे टप्प टप्प पानिक बुंडा गिरे लागल, जोन बुंडा सवर्ना खोजु धर्तिम समाजाए । मै सुस्कर सुस्कर एक घचिक रोइनु ओ अपन थन रहल घाँस एक एक कर्के जम्मा उँकार सेकल रहुँ, बार बार उहे बाट मोर मनेम झट्का मारटहे । भुइएम छिट्कल लाहि हाँथ्ले उठाइ नै बने हस मोर छिट्कल मनक खुड्डुर बिटोरे नै सेकटहुँ । जत्रा सिमोटे खोजु रहजाए । अँगरिम थुक लगाके मोर नानी धर्ति छिट्कल लाहि बिटोरे उहे याद आइल । आँसेले भिजल लाग पोछटि दुनु हाँथ छातिम ढारके मन ठम्ना कोसिस करनु । ढिरे ढिरे मोर सुस्केरा कम हुइति गैल । अन्तमे लिखल रहे आपसे कोसिस फेन ना करहो बाई । मै इहो शब्दसे हुकिन दुर हुइना कोसिस करे लग्नु, मन से नाहि तनसे महि बहुट दुर कराइ लागल । उहे रोजसे मोर कनपट्टिम घाम लग्गस कि जन्निन मैंया नाहि रुपया चहठिन । आज सम महिउहे बाट हिला डेहठ । घर ओ समप्तिके बाट । साइड इहे बाटसे महि उँपरवाला रातदिन रुपया खेलैना बनैले बटै । मने एक बाट महि समझ नै आइठ रुपया भारि कि मैयाँ । जेकर थन रुपया बा उ मैंयक लाग टरपठ, जे मैयाँ पाइठ उ रूपया के लाग । उहे मारे महि लागठ मैंया रलेसे सबकुछ मिलठ । मै हुकिन सच्चा मैंया कैले बटु, अविन फेन बहुठ याद आइठ । टुँ बिसराईलेसे फेन मै टुहिन बिसराई नैहुँ । धन्यवाद! वा टु महि रुपया कमाइ सिखैलो, टुहारे कारन आज मै इ ठाउँमे पुगल बटु । जीवन साथी बने ते नै सिक्नु मने, बेस्ट फ्रेन्ड ते बने सेकम न ? मै टुहिन मैयाँ करुइया संघरिया । विशाल चौधरी ।