विशाल के बबाल

सफल्टा कथा

१० बरसके उमेरमे भारतके मुम्बै सहरमे आँस के संग डुई कौरा खाके जिउ पल्लै । महिनक हजार रुपया मे काम कैके खापिके २००/- रुपया बचिन, टहुँपर हार नै मानके  काम कर्टि गैले ओ सीप सिखलै, उहे दु:ख से लरके १५ बरस पाछे नेपाल मे भारि बबाल मचाडेलैं ।

बाट हो, कन्चनपुर लालझाडि गाउँ पालिका-१ बिनवारी गाँउमे जलम लेहल विशाल चौधरी के । विशाल एकठो गरिब बहुठ नाजुक परवारमे जलम लेहल इमन्डार, डयालु लौन्डा हुइट । घरक अवस्था बरे नाजुक रलक मारे बाबा नल गर्ना पेसा पकरके अपन परवारके पालपोस करना कोसिस कर्ले रहिन । 

बबा जोखन चौधरीके छावा विशाल चौचरी कठैं,"जब मै पाँच बरसके रहुँ उहे बेलासे महि ठोर ठोर याड बा, मोर बाबा हमार रेख डेख कसिक करे, कसिक खवाए पिवाए, बरे नाजुक अवस्था रहे हमार । छोटमोट झोपरिमे हमार बसेरा रहे । बाबा जसिक तसिक महि स्कुल पह्रैना कोसिस केर्लेरहे मने घरक अवस्थासे मोर पह्राइ मजा नै हुइल । मै जस्टक भारी हुइटिगैनु ओस्टक अपन घरक अवस्था बरे नाजुक रहल डेखेलग्नु । डाइ भारतके बसहि बजार ओ नेपालके आ०बि०आर०डि० मे काठि बेचे पुगे,  उहे रुपयाले नोन टेल किनके नाने ओ हम्रहिन खवाए । 

जस्टक मै बहर्टि गैनु ओस्टक अपन घरेम सबचिजके डारि रहल बुझेलग्नु । बाबनके सब भाइ घर फुटल रलक मारे सबजहनके कारोवार अल्गे रहिन । उहेबेला काकु भारतके मुम्बै गैलरहे ओ अपन घर मजासे चलैलेरहे । उहे काकुक संग मै 2004 ओर मुम्बै ओर सोझरडेनु, जबकि मोर उमेर जम्मा १० बरसके रहुँ । इ उमेरमे काम मिल्ला बरे मुस्किल रहठ काम भेटैना । टब फेन मै काम सिख्ना ओर लग्नु ओ महि जम्मा १०००/- महिनक मिले ।

उहे रुपयाले खाइपरे जम्मा महिनक २००/- बचे घल्ना लुग्गा किन्नाफेन नै होए । जस्टक काम सिख्नु ओस्टक रुपया फेन धेर मिलेलागल । 2009 ओरसे ३००/- रुपया डिनक मिलेलागल टब जाके मोर  पहिला सपना पूरा कैना मौका मिलल, उहो घर । इ समय सम हमार बसाइ कृष्णपुर नगर पालिका -४ किचाहि सर सेकल रहे । अस्टके 2016 ओर आके मोर जीवन करोट लेहल, मै अपन जिन्गिम सोचल से फेन ज्याडा खुशि महसुस कर्नु । रिन से जरजेटल परिवारहे छुतासेकल रहु ।

जिन्गिम सब कुछ पुगल महसुस हुइलेसे कुछ रमैनास लागठ कहेहस मोर मनेम फेन अपन जाटिनके कला संस्कृटिके मैयाँ जागल, ओ मुम्बैमे नेपाली संस्कृटिक कार्यक्रममे भाग लेहेलग्नु । यहे करममे कन्चनपुरके डाडा संगम से मोर बाट चिट हुइल कि एकठो थारु म्युजिक भिडियो बनैना चहठु कनु ओ एकठो गित बनैना अनुरोध कर्नु । कुछ डिनमे डाडा गित तयार कैडारल । गितके टाइटल रहे पहारी बठनिया, जोन गितमे गायिका सुम्मन ओ डाडा संगम के बा । पहारी बठिनिया ओ थारु छैला के मैयाँ बबाल मचैलक गित सुने मिलठ । सुटिङ्गके लाग मै मुम्बै से नेपाल पुग्नु उहे मोरलाग बरे खुशिक पल रहे । मोर मुख्य सहयोगी संगम डाडा रहे कलेसे मिडिया ओेरसे चरचिट कलाकार मुन कुस्मि रहिठ । अस्टके डाइरेक्टर मे प्रख्यात ब्याक्ति सुधराम दहित ओ सि. एस. फिल्मस के टिम रहिठ । भिडियो सुटिङ्ग कैलालिक भासु पहार से सुरू हुइल रहेकलेसे फुन पार्क, धनगढी जखौर ताल मे अन्त हुइल रहे । भिडियो सुटिङ्ग 2019 Aug 5-7 सम चलल रहे कलेसे यु टुयुव मे सार्वजनिक sep 9 मे हुइल रहे । 

मोर पहिल परगाके सफल्टासे बहुठ खुशि हुइनु । अब्बा 95K+Views पार करसेकल मोर भिडियो से बहुठ खुशि बटुँ । आब मोर दोसर परगा सर्ना कोसिसमे बटु साइड अपसन उहिसे उप्पर पुगम ।"

बिशालके बाट सुनके महि लागल आप विशाल बबाल जरुर मचैहि । एकठो असिन गितके तयारी हुइता जोनगित जरुर बबाल मचैने बा, सबके मुटु, कलेजा हिलाडेने बा । उहे म्युजिक भिडियो के तयारिम लागल बटै बिशाल । ओराइल ।

              

........✍️ संगम चौधौरी