जिन्गिक् भरुवा

जिन्गिक् भरुवा हरकोइ नै डेखट् । हरेक मनैके अपन मेरिक् भरुवा रहट् । भरुवा कलक् मै जोम्मेवारि हे जोरे जाइटु जोन हमार जिन्गिम बहुटसे योजना रहट् ढेर सपना सजैले रठि । ओकर लाग हम्रिन काम करे परट् । अपन सेक्ना मरिक जसिन काम रलेसेफेन कर्ना कोसिस कर्ठि काहेकि इ संसारमे जिअक् लाग कुछ ना कुछ करहि पर्ना रहट् । कठैं लाज मन्ना मनै भुल्ले रठैं ओ सफल्टा पाई नै सेक्ठैं । 

संसारमे जलम भेटैले बटि जोन बरे सुन्दर मोहनैना मेरिक बा जोन कि इ संसारसे छुट्नास मन नै लागट् । चाहे जत्रा दु:ख  अभाव हुइलेसे फेन इहे डुनिया प्यारा लागट् । अपन मनैनके माया साथ छोर्नास नै लागट् । जसिक् टसिक् क्याँट कुँट करके जिन्गिहे ढकेल्ना कोसिस कर्ठि । जिन्गिक् परगा अकेलि से सुरुहुइट् जब पाछे एकठो परिवार बनैना सोच आइ लागट् काहेकि संसारमे अकेलि बँच्ना मजा नै हो काहेकि हमार बनौट् अस्टे उपरवालाके हमार उप्पर योजना अस्टे बटिस । 

एकठो जोरियाके जरुरट् परट् ओ उहेमे फेन डोसर भरुवा फेन ठपजाइट् जोन हमार डोसर शरीर कलसे हुइ । एक डोसरके सु:ख दु:खमे कमि कमजोरिमे संगे जिन्गिक् भरुवा उठैंना बाचा करके गुजारा करना रहट् । अस्टके सन्तानके रहर फेन जागट् ओ सन्तान जलमजैठैं । आप उ सन्तान पर डुनु जहनके जिम्मेवारिक् भरुवा ठपजाइट् । अपन सन्टानके रेखडेख् ओइन हरेक् उन्टिके लाग सोचे पर्ना होजाइट् । जब जिन्गि यहाँ सम पुगट् टब आउर भारि भरुवा थपजाइट् । एक ठो जिउके भरुवा ओ ढेर जिउक् भरुवा उठैना बरे संसट्के बाट हो । 

भरुवा सक्कु जहनमे एक्के मेरिक नै रहट् । केकरो जिन्गिम डाइ बाबा नै होके छोटिएसे अपम बाबू भैया ओइन के रेखडेख करेपर्ना होजैठिन् टे केकरो बिना थरुवक् छोट् लर्का सहेर्ना होजैठिन् । केकरो बिना डाइ बाबाके छोट्हिसे टुवर जिन्गिक् भरुवा उठैटि जिअल रठैं ।  जिन्गिम खैना बैठ्ना लगैना के जरुरट् परट् ओकर लाग काम करे परट् । आप काम करक्लाग ज्युफेन मजा हुइपरट् । ज्यु मजानैहो कलसे भारि समस्याके भरुवा बोके पर्नट होजाइट् । 

असिन बेला ढेरजे सिहरजैठाँ जिन्गिक् डग्गरिम् हरेस मानजैठैं । ओ निरासा छाजैठिन जिन्गिम् । जब जिन्गिम असिन हुइट् उबेला इ सुन्दर संसार बेकार लागे लागट् । मनैनके ठोकर मिलेलागट् जेकर कारण इ संसार से घिन लागेलागट् । तर एकठो सत्य बाट कहो कि जिन्गिमे जब दु:ख परट् टब सु:खके आनन्द पटा छछलट् । आपट् बिपट्से हरेस नै मनुइया मनै जरुर एक रोज खुशिमे पहुँरट् । ओहे मारे जिन्गिम जसिन भरुवा रलसेफेन जिन्गिमे हरेस माने नै परट् ।