कंढम कोड्रा ओ हेल्का, पुठ्ठम डिल्या बहानके बस्सैढा बुडु खोल्टि खोल्टा झंक्कैटि बकु सिहालिक पख्वै पख्वा नगट बिल्गैठाँ टे कबु लडिया कुल्वा ओर ।
बिस्सैंढा बुडुक सिकार पच्छि बिना जाँर नै सट्कठिन । बुडि घरे नटिन्यनके अखोरि कर्ने गोंड्रि पट्कि गोंरिक हरचाली कर्ठिन बुडुजुन रोज मुसनके बिला हठ्लैटि खोल्टि खोल्टा छम्टि निग्ठैं बुडु कबुनै छुच्छे अइना । साँझके रोज खोट्यक टिना रना बुडु बुडिक बुक्रम । बुडुक मच्छि मर्ना ढेर मिरिक टरिका रहिन कम पानी रलेसे ओहडा मआरिन बहना पानीम बरेरुवा खोंघिया ओ जमल पानीमे ढरहिया लगैना करिट उमे मारे बुडुहे सबजे बिस्सैंढा बुडु कहिके चिन्हिन ।
बुडु मच्छि बझैना बनैना सक्कु चिजिक सिपार रहिंट ओ बनाके बेचना फेन करिट । जास्टे हेल्का, डिल्या, ढरहिया, जाल बनाके बेचना फेन करिट ओस्टके सुखाइल मच्छिक सिढरा बेचके अपन घलना लुगारा ओ माखुर खैना रुपया बनजाइन ।
बिस्सैंढा बुडु टुम्मक जाँर अगोर्ले डोस्टि डोन्यामे जाँर अगोर्ले डोन्यम सिढ्रक चट्नी एक ठोंठि मिर्चा । बुडु जब डु डोन्या जाँर सुर्कठैं टब टोंटा फोंफर हुइठिन ओ जंरहा मांगर निक्रे लग्ठिन । बुडु सिढरक चट्नि चाटके टोक्टारी मर्टि डु डोनिया स्वाट स्वार पर्ठैं ओ कपार महा जोर झिट्कर्ठैं । कबुकाल ढेर होके बुडु गेल्डुङ होजैठैं ।
संगम चौधरी....✍️
एक टिप्पणी भेजें
0टिप्पणियाँ