लजराना झुक्का

परिचय

टिना टावन अनाज बाली बोइले से ओ लगैले से झुक्का बनैना चलन टबडिनसे चलल आइल बा । मनैन के आकारमे बनाइल पुट्ला हो । इ घाँस पैंरा लुगरा झाला-पालाले बनाइल चिज हे कहजाइट । ढेर जसिन खेटि बालि टिना टावन फलफुलमे मे इ बेल्सल डेखजाइट । पुट्ला नै बनाके ढेरजे जानवरिनके खोप्पर लट्ठिम गारल डेखजाइट । अस्टके रंगि बिरंगि चिरकुट झुलाके फेन गारल डेखजाइट । असिन चलन हमार डेशमे किल नाइ अन्य डेशमे फेन किसान ओइनहे करल डेखजाइट मने इ कौन डेश काहाँ से सुरु हुइल के सुरु करल कना ढेर अनुसन्ढान करेपरि ।

झुक्का के फाइडा

झुक्का टिना टावन बालीहे बचैना ओ रोग बिरोग से बचैना काम टे नै करट मने जानवर चिंरैन से बचैना काम करट । झुक्का मनैनके पुटला रलक ओरसे जानवर ओ चिंरै झुक्काके डरैठैं ओ भगठैं । मनैनके  बिश्वास फेन बटिन झुक्का लजरानासे मनैनके लजर फेन लागे नै डेहट । बालीमे पर्ना लजर झुक्का अपन ओर खिचट ।

बनैना टरिका 

झुक्का मनैनके पुट्ला बनाके पुरान फाटल लुगरा झुलुवा पाइन्ट लपेट्ना घलैना टोपी बा कलेसे घलैनट नैटे लौकक् डब्बक् खोप्पर बनाके कपार बनाडेना । हरगर कराइक लाग लट्ठि डारके हाँठ गोर बनाडेना । बहुट से जानवरिनके खोप्पर के कपार बनैले रठैं । 

बाली बचैना टरिका 

१) सुरुमे बोइल बियाँ चिरैनसे बचाइक लाग झुक्का ठाउँ ठाउँ गारडेलेसे डाना खैना चिंरैन हे डुरवाके बचाइ सेकजाइट । झुक्का ज्याडा है हुइना ठाउँ गर्ले से चिंरै  डराके नै अइठैं । 

२) डुस्रा चरन जब जामवरिनके चर्हे बन्ना हुइलेसे ओइन डुरवाइक लाग है हुइना ठाउँ झुक्का गारडेलेसे जानवर डराके भग्ठैं । 

३) टिस्रा चरन बाली पाकलमे जानवरिनसे ओ चिंरैनसे बचाइ लाग फेन उहेव टरिका अप्नाने बनैलेसे मजा रहट ।

झुक्का कसिन बनैना

झुक्का डुरेसे डेखैना ओ चहकार मेरिक मजा रहट । सक भर उज्जर हरडियार चम्कना रंगके रलेसे आउर मजा । हावा लग्लेसे बोल्ना ओ रातके डुरेसे बिल्गैना झुक्का आउर मजा । चम्कना ओ हावाले हिल्ना ओ बोल्ना झुक्का से जानवर चिंरै झसक्के डराके भग्ठैं । असिके लजराना झुक्का से फाइडा लेहे सेकजाइट । ओराइल ।

संगम चौधरी....✍️