सुर्खेटसे पुग्नु कंचनपुर

नमस्ते स्वागत छ यस नयाँ संस्मरन मा । धन्यवाद !

 

सुर्खेट से कंचनपुर अइना सोचल टे नै रहु मने जिन्गि कहाँसे कहाँ पुगाडेहठ । मै सोच्लेफेन नैरहुँ । आझ मै जहाँ बटुँ यि ठाउँ मै डुलहि बनके अइम कहिके सोचल फेन नै रहुँ । 

मै छुटि रहुँ डिनडिने जवान हुइटि गैनु । जस्टक जवान हुइटि गैनु ओस्टक वियाहके बारेम जानकारि पैटि गैनु । महि मजा लागे भोज वियाहमे जैना डुल्हा डुलहि हेर्ना । डिन समय अनुसार महिफें एकडिन डुलहि बने परल । एकठो डुलहाके संग बैठे परल । मोर भोज हुइना बेला महिन मोर डाइक कलक बाट याड आइल । मोर डाइ बाबासे अन्टिम बिन्टि करके कहल रहे कि छाइनके भोज मजासे करहो । मोर बाबा डाइक बिन्टिसे मोर भोज बहुट मजासे करल । मोर भोज मजासे हुइल । मै अपन गोसियाके संग एकठो गोसिनियाके भुमिका निभाइ लग्नु । 

समय बिट्टि गैल । कुछ बरस बाड हमार मैयाँके पहिल उपहार एकठो छाइ डेलैं । आप मै एकठो डाइ बनगैल बटुँ । जब मै बच्चाहे अपन डुढ चुसाइ लग्नु उ बेला महि अपन डाइक याड आइल । जोन डाइ महि अस्टक अपन डुढ चुसाके हुर्काइल । उ डाइ आझ यि संसारमे नैहो महि डाइक खोब याड आइ लागल । डाइ महि कसिक नौनौ महिना सम अपन कोखमे लेके नेगल हुइ । उ डिन महि पटा चलल जब छाइ मोर पेटमे रहे । मोर डाइ मोर लाग कट्रा डुख खाँडल हुइ । मोर जिउ बचाइक लाग कट्रा रुइल हुइ । मोर डाइ महि अपन डँडुर कोनामे सुटाके जारेम महि डँडुर कराइट रहलहुइ । 

मै जन्ना बुझ्ना हुइट् सम डाइ बाबा मोर जिबनमे कौनो चिजके कमि नैकरैलैं। मै लगायट चारजे हमे्र लर्का ओ डाइ बाबा सहिट छ जहनके परिवार सुख शान्तिमे चल्टि रहे । हम्रे पुर्खाके अनुसार हिन्डु रिटिरिवाजमे रमइटि रहि खाइटहि पियटहि मजा परिवार रहे । 

डिन बिट्टि गैल । उ बेला हमार घरक् काकी रहि उ कहाँसे खिरिष्टियन होगैल रहि । काकी कब विस्वास कर्लि का करे विस्वास कर्लि महि कुछ पटा नैरहे । मै सोचुँ काकरे अपन पुर्खासे चलल चलनहे छोर्के यशुमे जैठैँ । मै खिरिष्टियन विस्वासहे घृणा करुँ । महि हिन्डु परमपरा मजा लागे हहपने चालचलन मजा लागे । डिन बिटटि जाइट् अचानक एकडिनके बाट हो मोर भैया बिमार परल । भैयाहे बचाइकलाग हम्रे हिन्डु परमपरा अनुसार आछट, पाटि, गुरै, पुजापाट सब कराडर्लि । अस्पटालफें कराडर्लि मने कुछ पटा नैचलल । आप भैयाहे बचाइकलाग एकठो किल उपाइ रहे यशुके चरणमे जैना । पास्टर हुँक्रे सुनैले रहिँट कि बिमारि मजा हुइट कैह्के । यिहे विस्वाससे मोर डाइ बाबा येशुके चरणमे गैलैं । हम्रे विस्वास कर्लि ओ  अचम्मके बाट भैया ढिरेढिरे मजा हुइ लागल । 

जिन्गिमे एकठो डु:ख मेटल मने औरे डुख ठपगैल । भैया मजा हुइटिकिल डाइहे भुट डुस्ट आत्मा आक्रमण करडारल । यी बाट २०६५ सालके हो । जौन डिन डिडि ओ मै पास हुइलक बाट से खुसिसे गडगड रहि मने उहे डिन डाइके डु:खके डिन सुरु होगैलिस । मोर डाइ हमार पह्राइमे बहुट ख्याल करे । समयके खेल कना होकि अपन भाग्य कना हो क्यामपस जैना सुरु हुइटि किल डाइहे बेमार सटाइ लग्लिस । एकओर क्यामपस पर्हे पाइलमे खुसि रहे मने एकओर डाइक डु:ख डेखके बहुट डु:ख लागे । डाइक उपचार कर्ना जारि रहे ओ हमार पर्हाइ फेन चल्टि रहल । बाट २०६५ सालके हो । बाबा डाइहे कोहलपुर मेडिकल कलेजमे लेके गैल । वहाँ हरेक रोगके चेकजाँचके पाछे अन्टमे डाइकमे क्यान्सर डेखा पर्लिस । इ बाट सुनके सारा परिवारमे सोक छागैल । सबके मनमे बस एकठो प्रस्न खडा होगैल । आप डाइक का हुइहिस ? डाइके उपचार कर्ना ढेर पैसा लग्ना हुइलिस । टबफेन बाँचट कि नै कौनो पटा नैरहे । बाबाहे मनै सल्लाह फेन डेलैं । जमिन बेँचके उपचार कराउ कैह्के । मने हमार बाबाके मनमे डाइ नैबाँचि कना जनासेकल रहिस । बाबाके कहाइ इहे रहिस जैना मनैयाँ टे चल जैहि मने बाँचल मनैनके हालट का हुइ । बाबा अपन लर्कनके मुह हेरके जग्गा बेंचना मन नैकरल । डाइके उपचार कराइ नैसेक्लेसे फेन डाइहे हमार मैयाँके बहुट खाँचो रहिस । डाइक डु:ख डेखके महि पर्हना मन फेन नैलागे । जब डाइ छटपटाइ लागे टे मै डाइके डु:ख डेखके बहुट रोउँ । इह डुखके उप्पर डाइहे हेरे अइना मनै आउर मन डुखैना बाट करिंट । मने कोइकोइ सान्त्वना डिइँट् । चिन्ता नाकरहो मजा होजैहि कहिंट । मनै ज्या जसिन कलेसे फेन अपन जन्म डेना डाइक डु:ख डेखके किहिन मजा लागि । कबुकाल्ह टे डाइक डु:ख डेखके अइसिन लागे डाइक ठाउँमे मै रटुँ टे कानै । मै डुख पैलेसे फेन मोर डाइ आरामके जिन्गि जिनेरहे । मने का कर्ना हो साइड परमेश्वरके इच्छा ओस्टे रहल हुइहिन । 

मोर डाइ आँखिमसे आँसके बुँडा गिरैटि कहे, मन्जु मै मुजिम टे टुर्हे डु:ख पैबो टुह्रिनके बाबा औरे डाइ लनहि । छाइ मन्जु मोर स्याहार सुसार करट करट टोर पर्हाइ फेन बिग्रटा । मै टे डुखि बटुँ बटुँ मने टुहरिन फेन डु:ख डेहटुँ । महिहे बिस डेउ ओ खाके मरजिम नैटे मोर घेंचामे लसरि बान्ढके झुलाडेउ मै मुजैम कैह्के मोर डाइ हम्रिहिन कहे । महिहे यी बाट सुनके बहुट डुख लागे । कैसिक अपन डाइहे बिस डेके मुवाइ सेकजाइ । कैसिके अपन डाइक घेंचामे लसरि बान्ढके झुलाइ सेकजाइ । मै डाइक अइसिन बाट सुनके रोइ लागु । मोर मनमे बहुट भारि ढुंगा झट्के हस लागे । मै मनमे साेंचे लागु । यदि डाइक कुछ होजैहिस कलेसे मोर जिबनमे का हुइ, कैसिक जिए सेकम मै । आझ सम मोर डाइ मोर जिवनमे कौनो चिजके कमि हुइ नैडेहल मनेर पाछे मोर जिबनके हालट का हुइ कैह्के मै बहुट गहिरसे सोंचुँ । 

करिब करिब छ महिना सम राट दिन डाइक सेवाम समय बिटैनु । परीक्षा अइना कुछ दिन किल रहिगैल रहे । महि नाटे पर्हे मिले ना सुटे, अस्टके मोर डाइक अन्टिम अबस्था आगैल रहिस । डाइक बाबाहे कहेपर्ना अन्टिम बाट असिन रहिस ‘संगति लेहे नाछोरहो, छाइनके भोज मजासे करहो, यदि टुँ भोज कर्बो कलेसे महिसे मजा भोज कर्हो, छुट्की छावाहे जत्रा सेक्बो पर्हैना प्रयास करहो । यिह बाट कहटि मोर डाइ सक्कु जहन छोरके इ संसारसे बिडा लेक गैगैल । यी संसारसे बिडा लेक गैगिल मोर डाइ । आझफें डाइ कना सब्ड सुन्ठुँ कलेसे ओहे मोर डाइक याड आइ लागठ । ओराइल ।

मन्जु चौधरी...✍️