लकडाउन के साल

आजसे टिन बरस पहिलक बाट हो । लकडाउन भरखर खुलल् रहे । मै पहुनि खैनास लागल । एकरोज सोना एण्ड सोना कृषि तथा पशुपन्छि विकास फारम प्रा.लि. ओर सोझर्नु । लगभग मिझ्निजुन हुइल रहे । ठिक्के परसे फारमके घरगोसिया रामसमझ डाजु से भेंट होगिल । मिझ्नि जुन हुइलक ओरसे भन्सरिया काकि भांरा खनमन्वाइ लागल रहिन । मच्छिक सिढ्रा,छेग्रिक सुक्ठि भुठके मिझ्नि बनादरलिन । घरगोसिया डाजुसे करिब एक–दुई घण्टा सम बाट बट्वागैल । 

रामसमझ राना डाजु कैलाली जिल्ला धनगढि उपमाहानगर पालिका वडा न.१५ उर्मा गाउँके बासिन्दा बाबुराम रानाके छावा हुंइट । उहाँ समाजिक कामसे फुरसड नै पैलेसे फेन एकठो मेहनटि,हिम्मटि,लगनसिल ओ इमान्डार नमुना कृषक मे परठै । समान्य किसानके कोखसे जलम लेहल रामसमझ राना डाजु छोटमोट सिँगार पसलसे ब्यपारओर अपन परगा सरटि राजनिति क्षेत्र हुइटि हाल कृषि फारम संचालन करके देशके नमुना कृषक बनके डेखैना लक्ष्यमे डौरल ब्यक्ति हुइटैं । 

नेपल हे कृषि प्रधान देश बनाइ परठ कना भासन करके किल देशके बिकास नै हुइ । ओकर लाग खुड अपने से सुरुकरे परठ कना । विचारमे कडम उठैलक बटैलै रामसमझ राना डाजु । उहाँ बटैलै फारम खोल्क टेसर बरस २०७८ मे चल्टा । सुरुमे दुई बिगहा जग्गामे पोखरी बनाके मच्छि पालन सुरु करनु । ओकर संगे छेग्रि ओ मुर्घि फारम टयार करके सोना कृषि फारम नाम डेनु । करिब एक सय छेग्रि ओ चार पाँच हजार मुर्घि से फारम चलैटि गैनु । हाल अब्बा आके चालिस भैंसिन्या फेन डरले बटु । एक ओर केरा फारम फेन सुरु करले बटुँ । तीन बिगहा जग्गा भारम लेके तेह्रलाख लगानिमे पहिल बरसमे जो केरा अपन जम्मा लगानि उठाडारल ओ बाँकि कुरासे आमदानी चालिस से पचास लाख हुइसेक्ना अनुमान बटैलै । हाल अब्बा लकडाउनके कारन छिमेकि देश भारत से केरा छिरे नै पैलक ओरसे बजार भाउ मजा मिलल रामसमझ राना डाजु बटैलै ।

अत्रे किलनाइ डुरगक्षेत्रमे फारम खोलके बहुट बेरोजगार युवा युतिन रोजगार बनैलक बटैलैं । केरा फारम मे डुईठो काडार ओ पशुपन्छि तथा पोखरी ओर साट जाने रोजगार हुइल बटैलै। लकडाउनके मारमे परल परिवारके चुल्हम आगि बरे पाइल बटिन । बाल बच्चनके पह्राइना ओ पाल–पोस करे सेकटै । परडेस जाइ नै सेक्ना युवा ओइने आपनै ठाँउम मजा काम भेटैइल मै खुसी ब्यक्त करल पागैल । लाखौ के लगानि से सुरु हुइल फारम अब्बा तीन करोड सम पुगसेकल ओ अभिन लगानि जारि रहल फारमके घरगोसिया बटैलै । 

उ बेला भैंसिन्या सत्तरी /अस्सी लिटर दूध डेटि रहल ओ उहे दुध सक्कु कामडार के टलव पुरा करटि रहल बटैलै । बाँकि आमडानि मच्छि, मुर्धि, छेग्रि,भैसिक बच्चा,मच्छिक बच्चा,मुर्घिक बच्चा ओ केरा से हुइटि रहक बटैलै । मासिक आमडानि ठिक्के कहेनै सेक्ना बटैलै लगानी चल्टिरहल ओरसे । सोना एण्ड सोना कृषि तथा पशुपन्छि विकास फारम कैलारी गाउँ पालिका वडा न.६ बन्कत्ता के संचालक तथा घरगोसिया अपन लक्ष्य ढेर जहन रोजगार डेहे सेकु । विदेश जाके डुख खांडलसे अपने देश,अपने स्थानमे काम करे सेकिट ओ काम सिखके औरे जहन फेन उत्साह प्रटसाहन डेहेसेकिट कना चाहना बटैलै । 

जात्तिक कानाहो कलेसे रामसमझ राना डाजुके सोच ओ लक्ष्य अनसार सक्कु युवा जैहि कलेसे नेपाल के बेरोगारके समस्या सामाधान हुइनाहस लग्लस । बेरोजगार युवा लम्ला सास लेहेपैहि जस्टे लग्लस । घर परिवारमे सान्टि आनन्ड फैल्ना हस लागल । विदेशमे जाके गुलामी करके जिन्गि बिताइलसे अपने देशमे विदेसके जसिन पस्ना चुहाके मेहनट करलेसे यहे देसमे सोन फराई सेकजिना बा । मै मिझनि खाके बिडाबारि लेके घरे ओर सोझर्नु । उ बेलासे झाइ नै मिललहो अभिन उहाँ जाके कुछ सिख्ना मन लागट् ।

ओराइल ।

संगम चौधरी ....✍️